有關驗孕棒問題

通常比較cheap嘅驗孕棒說明書,都要求用家用晨尿嚟test,因為第一篤尿嘅HCG level比較高,準確率高啲。
但係如果我已經喺親密行為後一個月,月經遲左接近一星期後,喺夜晚使用平價驗孕棒,個結果係咪都準確?隔咗咁耐,係咪即使懷孕,全日嘅HCG level都不太大分別,咩時候都足以test得出?
平時月經不會遲到,今次遲到已經好擔心。琴晚用平價嘅驗孕棒check係好明確嘅Negative,但都放心唔曬。求解答

其實一般嚟講,如果係係可靠嘅銷售點購買,例如超級市場或者個人護理用品店,會買到嘅牌子都係有一定準確度嘅,亦同佢嘅售價無太大關係。但係如果個個牌子嘅說明書寫明要用晨尿去驗,其實都建議跟進返,因為咁樣係代表呢隻牌子嘅驗孕棒係需要比較高濃度嘅hCG先可以被檢測得到。

至於hCG嘅水平,其實由卵子受精著床開始體內就會開始釋放呢種激素,而呢個過程大概需要6-9日,所以先會話最快係性行為後7日已經開檢測到初步嘅結果。而hCG嘅含量的確會隨著懷孕週數逐漸上升,一直到大概11/12週左右就會維持同慢慢下降。但上升嘅速率其實都因人而異嘅,但一般係性行為後1個月去驗都可以驗得出㗎啦。不過即使係懷孕,其實都仍然係晨尿當中嘅含量會係最高,因為雖然體內已經會有一定嘅hCG,但係因為晨尿本身比起日間嘅其他尿液會較濃縮(因為成晚都無排過尿),所以先會話係「含量最高」嘅。

雖然以結果去睇你而家係懷孕嘅機率唔高,但既然你覺得擔心,不如聽日按照說明書嘅步驟再驗一次啦,相信咁樣先會令妳覺得安心啲。要留意因為每個牌子嘅等候時間/步驟都可能有啲分別,所以必需要按照用緊嘅牌子指示去做先至可以得到準確嘅結果架。