之前同男朋友總共試過互相無套口交一次同互相無套指/手交兩至三次，無試過插入既性行為，當時傻唔知道口交同手交要戴套，而家後悔同每日都驚自己會有性病之後無啦啦死左…
我有驗到十幾種大部分常見的性病，都係陰性，佢都有驗過十幾種病，不過佢有d性病冇驗到。我驗完之後有一日忍唔住試過幫佢無套手交，無再有其他性行為，所以我而家都仲係好驚會有性病。而且只係錫都有可能感染性病…
雖然我地係中同，同我一齊之前佢拍過一次拖，佢話冇同其他人有性接觸。但係我驚如果佢前度有性病，佢地會經口水傳染性病。
請問一下:
-
幫男朋友手交，佢係咪都要戴安全套，如果戴口交套有冇效預防性病?另外，幫女仔指交所戴既指險套有冇效預防性病? 其實呢d套預防性病既原理係咪就係只要有層野阻隔到兩個身體表面既接觸就叫做預防到性病?但係d性病病毒會唔會細到可以穿過個套?
-
有d咩性病會致命? 多數性病都會復發? 係咪好少會去到致命?
-
男朋友之前驗過一個性病組合，包括十幾種性病，全部陰性，但唔包括肝炎(除左乙肝 有驗到)。佢唔想再驗，覺得要佢驗性病係等於我唔信佢。 想問肝炎(有好多種:甲乙丙丁戊庚型)會唔會經口水(e.g. 接吻)傳染? 患上肝炎大唔大機會致命?
其實拍拖應唔應該叫男朋友去驗性病?好似會破壞雙方既信任咁…但係我又好驚會有病 
sorry好多字，多謝你地幫忙 
Hello @orange1199 ，等我一個一個問題咁答覆你啦 
- 好多性病病毒（例如HIV病毒）係能夠透過血液及體液傳播。所以套用番你所形容嘅情況，如果雙方係無做任何安全措施，而你手上有流緊血嘅傷口，又接觸到男朋友嘅分泌物的話，係有機會傳播到性病病毒架～
不過當性病病毒存在於血液／體液之中的話，係唔能夠穿過阻隔式安全措施（例如口交膜、指險套、安全套）嘅常見製作物料（橡膠）。因此，使用呢類安全措施，就能夠有效阻隔到呢類性病病毒嘅傳播
亦因為有時我地都好難預料性行為嘅過程間，會唔會因為摩擦力度太強，令雙方嘅身體部位（例如口、陰莖、陰道、肛門）有機會出現微細嘅傷口，令病毒有機會傳播得到。所以一般我地都會建議番發生任何類型嘅性接觸，都使用番阻隔式嘅安全措施，咁就可以減低性病傳播嘅風險～
- 其實以依家嘅科技，暫時係無咩性病病毒係會致命，只要能夠及早求醫，有唔少性病都係能夠治癒，即使未能完全根治（例如HIV病毒）的話，都能夠透過持續服藥／治療，去令病毒抑制到一個唔能夠傳播／致命嘅情況
有部分病毒當病毒量抑制到一個好細嘅量嘅時候，係唔會出現任何病徵（例如念珠菌、性器疣、淋病），但係當有接觸到更多嘅病毒量嘅時候，就有機會再次復發。
- 性病病毒，係好難透過日常生活嘅接觸（例如共用餐具），又或者透過口水去傳播（需要極大量嘅口水先有機會傳播得到）。所以都無需擔心同男朋友接吻會感染到性病啊～
肝炎的話，唔同類型都有唔同嘅傳播途徑（例如母嬰感染、體液傳播、糞口途徑傳播）。雖然部分肝炎係會有致命嘅危險性，不過一般只要出現病徵嘅時候有及早求醫／打預防疫苗，就可以避免好多致命嘅風險
其實做性病檢查係能夠保障雙方嘅安全，因為有部分性病病毒，未必喺每個人身上都會出現病徵。做過性病檢查，就可以更有意識地避免到病毒傳播到其他人身上嘅機會～ 不過有部分人可能會介意同伴侶一齊去做，或者抗拒去機構做檢驗，所以都建議同男朋友好好溝通，雙方都有一個共識，先再去睇睇係咪再一齊去做更多嘅檢查。
見你同男朋友其實之前都有一齊驗過唔少性病檢查，相信有病的話，其實大部分常見嘅都已經會驗得到出黎。 只要身上未有病徵出現的話，都可以放心先嘅。只要之後性行為都有持續使用安全套（或者其他阻隔式安全措施），都可以減低到好多性病傳播風險架啦 
多謝你好耐心的解答!! 
但係我睇衛生署個網(https://www.chp.gov.hk/tc/resources/e_health_topics/2562.html)，如果梅毒唔及早醫治，就有可能致命? 但係去得晚期通常都有病徵?
另外想問患上疱疹一、二型會否致命? 因為我地驗過疱疹二型igG係陰性，但係冇驗到疱疹一型…
基本上如果性病得到治療嘅話，致命嘅風險都係好低嘅，除非你感染咗之後一直唔理佢，咁就有可能致命啦，不過相同情況都會發生係其他嘅病度，只要係病，無得到適當嘅治療都會有可能死亡架，所以真係要及早治療呀。 
其實衛生署嘅網站都講得好清楚架，去到第二期梅毒就會係數星期後病菌擴散全身，令病人產生如發燒、疲倦、不痛不癢嘅紅斑、淋巴結腫脹等等病徵。就算你完全不去理會佢，呢啲病徵都會慢慢消失，病情就會進入隱性期架啦，到時就會完全無病徵，要驗血先知道自己有梅毒嘅。
基本上去到第二期如果發現自己有病徵的話，就應該向醫生求助架啦。的確，晚期嘅梅毒就已經直接出現併發症，例如心臟病同腦部感染等等。
基本上患上疱疹，如果有適當嘅治療都唔會話致命嘅，可以放心呀。
至於疱疹二型嘅情況，通常HSV-II IgM同 HSV-II IgG都會一齊驗嘅。如果你地果次係檢測有效的話，睇番你嘅情況，係HSV-II IgM 同 HSV-II IgG negative，意思姐係你無任何嘅疱疹二型，而近期都無感染到任何疱疹二型。 
其實一般疱疹嘅測試都唔會特別幫你分類檢查，只會話你係咪有疱疹。不過如果你去一啲私家診所就可以做分類檢查，好似而家幫你驗二型咁。一型如果感染嘅話，通常都會係生係口度或者眼睛附近，同埋好多時都唔係透過性傳染，比較多係遺傳嘅，而且通常都係免疫力比較低嘅情況會病發嘅。如果你冇出現過類似情況，都唔洗特別擔心嘅。不過如果你好想得到一個確實答案，有提供疱疹二型檢查果間診所應該都可以幫你驗埋一型嘅，你可以去檢查下。不過如果檢查咗無疱疹二型，基本上都唔洗太擔心架啦。
另外，我想問下性接觸後應該等幾耐之後驗性病? 有d性病會潛伏幾年甚至十年，但係就算未過潛伏期、毫無病徵，係咪只要等夠空窗期去驗性病，結果都會準確、如果有患病都會顯示陽性?
Thank you …
你好呀 
，睇嚟你真係好擔心自己患上性病，但係我見你已經驗咗好多種唔同嘅性病都係陰性，同埋暫時都未有出現病徵，都唔洗咁擔心嘅。
其實唔同 性病嘅潛伏期期都會有唔同嘅 ，而潛伏期係講緊病毒或者病菌潛伏係體內未有病徵嘅時期，呢個時候係可以透過唔同嘅方法檢驗出病毒/病菌。以下就係一啲常見性病嘅潛伏期：
生殖器疱疹（疱疹二型）：約2-5天
淋病：約1-14天
滴蟲：約4-20天
衣原體感染：約7-21天
梅毒：約9-90天
性病疣（椰菜花）：約 1-8個月，平均為3個月
以上嘅時間都係一個平均數值，有好多人過咗呢段時間都未出現病徵，其實都係好正常嘅。除咗要睇你當時接觸到嘅病毒量，仲要睇你本身身體嘅狀況健唔健康。
愛滋病比較特別，佢有一個叫空窗期嘅時期，就係感染病毒後，體內嘅病毒量未能被快速測試檢驗到嘅果段時間。一般坊間一啲免費嘅性病快速測試都需要大概係3個月左右嘅時間，身體嘅病毒量先至可以上升到可以檢查到嘅水平。係空窗期期間，雖然檢驗唔到，但係都可以傳染俾其他人嘅。而且愛滋病嘅潛伏期就半年到10年都有，所以感染咗愛滋病之後未必真係會立即發病嘅。 
只要你係進行過一次唔安全嘅性接觸之後大概3個月，做一次全面嘅性病檢查，其實已經可以檢查到全部嘅性病。同埋感染性病最基本嘅條件就係需要有高風險體液接觸，姐係精液、陰道分泌物同埋血液接觸，而口水並唔係一個高風險嘅體液。，或者經由有損傷嘅黏膜組織，例如破損嘅皮膚、口腔、眼睛或者鼻腔先可以傳染到。
另外，如果係空窗期內再有一個高風險嘅性接觸，其實就要重新開始計算三個月，當你去檢查嘅時候，其實就只能夠反應三個月之前嘅性接觸有無令你感染性病。睇返你嘅情況，你只係口交同指交，其實感染到愛滋病嘅風險都係非常低嘅。
