唔知係唔係有左...未黎M..

[naomichuu]

我之前經期好唔準，今年開始記錄低發現自己週期係34日到 ，上個月5月26黎M到31號， 正常應該今個月29號黎， 但我遲左仲未黎
今個月做左三次 ，18號有套 外射 、22號冇套 外射 、之後我驚得制24號就去左家計會食事後丸，之後25號冇套入左幾下 之後就用手決解 。

我近依三個月會係黎經前黎經後有啲啡色血定白帶流幾日甘唔痛唔太多，今個月就10號到開始有啡色血定白帶甘，三日到就冇左。
由27號個肚開始有啲腹痛好似黎m個種痛但又好似肚痛甘，仲有本身我42-43kg冇啦啦24號個日磅重得40kg，我驚得制就28就去左買驗孕棒驗得一條線。 29凌晨開始去廁所發現有少少血以為自己嚟M，點知去完個一次就冇血又冇黎搞到個人訓唔到失眠。

因為平時我都好夜瞓既人2-3點到，但最近22號開始就有擔心個人訓唔好又越嚟越遲瞓甘，同男朋友係最近先開始做三個月到，頭兩個月到係各做左一次有套，有一兩次做完下面會有少少啡色血流出，可能因為今次冇套過個人擔心左好多，想問下幾時驗最準同埋我懷孕機會大唔大？因為睇自己既症狀同懷孕又有啲似，但又冇作嘔突然改變口味個啲 連有時黎m胸口會有啲漲痛甘今次到冇，我要唔要睇左普通科醫生先？

[Ana_StickyRiceLove]

Hello~ 首先想你知道男性受到性刺激嘅時候會自動分泌一啲透明、黏黏地嘅液體，叫做尿道球腺液，當中都合有少量精子嘅，所以即使係有用套外射或者無套插入幾下，都係有機會懷孕嘅。睇返你講嗰三次性行為，18號嗰次因為有使用安全套而且亦都係體外射精，所以懷孕嘅機會好低，唔需要太擔心 而22號嗰次雖然因為無使用安全套而有一定嘅懷孕機會，但係因為你之後有到家計會服食緊急避孕藥，所以懷孕嘅機會亦都係非常低嘅 至於25號嗰次性行為雖然陰莖插入陰道嘅時間唔長，但因為同樣無使用安全套，所以係有機會懷孕嘅，但係因為緊急避孕藥嘅副作用較大，唔可以喺同一個月經週期內同服用多於一次，所以並唔建議再次服食緊急避孕藥。

見你提到28號去左買驗孕棒驗孕，但係因為驗孕棒最早可以喺性行為嘅7日後驗出初步結果，所以28號嘅驗孕結果只係適用於18號嗰次性行為，即係依次性行為應該係無造成懷孕啦 驗孕棒最早要喺性行為嘅7日後先可以驗出初步結果係同佢嘅檢驗原理有關，因為驗孕棒係透過檢測尿液中嘅人绒毛膜促性腺激素(hCG)水平去驗測有無懷孕，hCG係會喺卵子著床之後開始分泌嘅，而卵子著床大概需要6-9日嘅時間，所以喺性行為嘅7日後可以用驗孕棒測出初步結果，如果想得出更準確嘅結果就可以喺性行為嘅11日後進行驗孕。所以你可以計算返可以驗孕嘅日子，再去買驗孕捧進行驗孕，如果結果係陰性嘅話就應該係無懷孕架啦

至於月經遲黎其實係受好多唔同嘅因素影響嘅，其中有服食過緊急避孕藥就係一個重要嘅因素，因為緊急避孕藥含有高水平嘅雌激素，部分女性服用緊急避孕藥後可能會有點滴出血嘅情況，所以你提到29號嗰陣發現有少少血但又唔係黎經有機會係服食緊急避孕藥後嘅點滴出血。另外，服食緊急避孕藥亦都有機會令月經比預期來潮嘅時間略早或者延遲，通常如果比預期遲多過一個星期先有機會係懷孕，睇返你宜家距離預期來經嘅日子未超過一個星期，所以暫時唔需要太擔心先 而其他影響經期嘅因素有生活習慣改變、心理壓力大、長期處於擔心嘅狀態等等，所以你提到嘅失眠同埋擔心嘅狀態都有機會係月經遲黎嘅原因。

所以現階段你可以先嘗試放鬆心情同埋調整返作息時間，亦都可以喺25嗰次性行為嘅7日後(即係2/7)進行驗孕，如果距離預期黎經嘅日子過左一個星期仍未黎經嘅話，就可以去睇醫生了解返身體狀況 另外，如果暫時未有計劃生育嘅話，建議每次性行為時都使用安全套，你亦都可以同男朋友傾下安全套係唔係最適合你地嘅避孕方法，同時可以了解下其他有效嘅避孕方法，例如: 口服避孕藥、避孕針、子宮環等等，如果想了解多啲嘅話可以參閱我地嘅ig、facebook或者網站內有關唔同避孕方法嘅文章