我女朋友本身應該6月24號尼ｍ，但係到依加都仲未有，已經成８日，但佢個胸都有脹緊，腹都有脹同痛有時仲會好似有ｄ野想湧出黎既ｆｅｅｌ。。。而之前最遲都係３—４日就尼。。同埋佢手機ｃｈｅｃｋ過自己排卵期係6月9號，點知遲左一個星期，姐係１６號先開始排卵，而我今個月同佢有３次性愛都有帶套做足安全，事後ｃｈｅｃｋ過個套係冇穿，我仲有幫佢用紙巾抹下體，而我幫佢抹同時間見到ｄ白色液體，唔知係佢定我。。因為我都唔識分。。但明明ｃｈｅｃｋ過個套係冇穿，定係有機會係套到什出黎？？而個３次性愛，我係跟返個手機ａｐｐｓ，排卵期個幾日係唔會做。。。點知佢又遲左排卵。。之後搞到都唔知會唔會係佢排卵個幾日做左。。所以咁樣會唔會有大機會中左懷孕？？定係因為佢排卵期遲左所以令到月經都遲尼？？好驚好驚好驚有左ｂｂ。。。有冇人可以解笞到。。。。ｐｌｚ 同埋係唔係應該買支驗孕棒俾佢驗下好d?如果驗完之後係一條線 但又未尼m 咁仲信唔信棒既結果再等幾日尼m??定係去睇醫生??
你好呀， @wing9536。 
其實影響月經週期嘅因素有好多，例如生活習慣嘅改變、會唔會好夜訓、最近會唔會好大壓力、有無食緊藥物、會唔會有嘢好擔心等等，都會令月經早到或者遲嚟，正如你女朋友之前都會遲3-4日咁，係一件好平常嘅事，只不過今次遲多咗幾日，所以月經遲嚟並唔代表會懷孕架，唔洗擔心架。 
至於你話佢會胸脹同埋腹痛，係月經嚟之前都會有機會有下腹同胸部脹痛，可以觀察多幾日，話唔定好快就嚟M架啦。 
其實懷孕同月經前症狀會因為身體嘅情況而有唔同，都係正常嘅，同時都唔一定每次懷孕或者每次月經都會出現呢啲狀況，所以唔可以淨係用呢啲症狀去判斷係咪就嚟月經或者懷孕，例如有時有啲人都係懷孕咗半年先突然有一日發現自己懷孕，所以懷孕或者月經前出現咩症狀都係好睇個人體質同埋當時嘅身體狀況嘅。 
當你有正確用安全套，而且你係事後都有檢查到無穿嘅話，其實懷孕嘅風險好低。安全套如果穿咗嘅話，好多時候都係會破裂嘅，姐係你會好明顯咁睇到一個破口，唔會有滲漏嘅情況，其實好難話有一個窿之後唔破裂淨係有滲漏，因為係做愛嘅過程中會不斷拉扯安全套，安全套一旦有窿，就好容易破裂架啦，所以如果你檢查咗無漏嘅話，就唔會有滲漏嘅情況架啦。 
女性係做愛嘅時候會陰道分泌一種白色或者透明嘅液體，顏色係由當時嘅身體狀況決定，兩種都係正常嘅，作用係喺做愛嘅過程中提供潤滑同埋保護陰道，避免因為摩擦而受傷，因此唔洗擔心，白色嘅液體係你女朋友陰道自然嘅分泌物嚟架。另外係做愛嘅過程中，有可能混合咗安全套嘅潤滑劑而令陰道分泌物由透明變成白色，同時係抽擦嘅過程中都會令佢變成比較黏稠嘅狀態。 
至於手機嘅apps，其實係一個參考用途，Apps只係用嚟輔助女性去睇月經週期嘅工具，係用過往週期嘅平均值或者Apps裡面指定嘅週期嚟幫你及返嚟M嘅日子，都未必一定百分百準確，就好似頭先咁講，月經週期受好多嘢影響架。 
另外apps裡面個排卵期其實並唔準確，除非你真係日日用排卵棒去檢查，如果唔係好難單憑一個apps去計算出嚟，因為排卵嘅日子可能每個月都會唔同，有時會早啲，有時會遲啲，呢啲都係受到會唔會早訓或者遲訓、有無食緊藥、會唔會好大壓力等等影響，如果唔係，一般都唔會好準時一定係手機上面顯示嘅果幾日排卵嘅。同埋用apps嚟睇幾時係安全期都係唔準嘅，而且計算安全期都唔係一個有效嘅避孕方法 ，因為每個人排卵嘅時間都唔一樣，尤其係週期比較短嘅女性，嚟咗M都有機會已經排咗卵，所以都唔能夠單靠日子上去避孕，因此係安全期期間做愛都有懷孕嘅風險架。 
其實你懷孕嘅風險係非常低嘅，不過如果你非常非常擔心，都可以去買驗孕棒驗孕令你安心啲嘅，其實只要根據返說明書上面嘅指示去做同埋係指定嘅時間內睇結果，個結果其實都準確架啦，因為驗孕棒係透過檢測尿液中嘅人绒毛膜促性腺激素(hCG)水平去驗測有無懷孕，hCG係會喺卵子著床之後開始分泌嘅，而卵子著床大概需要6-9日嘅時間，所以喺最近一次性行為嘅7日後可以用驗孕棒測出初步結果，如果想得出更準確嘅結果就可以喺性行為嘅11日後進行驗孕。
其實驗孕棒係一件好偉大嘅發明嚟，佢個用意就係方便大家，令大家唔洗次次都去診所／醫院檢查，簡單快捷咁知道自己有無懷孕。而且驗孕之後都唔代表你女朋友即刻就會嚟M架，驗孕棒只係話俾你聽你女朋友無懷孕。當然如果你用完驗孕棒之後都係好擔心，都可以去診所／醫院要求驗血，個結果就會好準確架啦。