半醒半睡個陣好容易就會無意識地主動摸自己嘅胸同敏感部位，有時有少少醒個時都唔會停，會繼續摸落去，好似有種安撫自己嘅作用。以前前度會經常突然咁樣摸我，個陣時會覺得好舒服同興奮，後來被侵犯，同前度分手之後就開始會有呢個習慣。而家我無自慰習慣，因為仍然會諗起唔好嘅回憶。但偏偏訓覺個時就會無意識咁摸自己，次次個人醒曬之後／覺得有啲唔舒服先識停，然後就驚我無乜意識個陣會唔會有人會發現左我咁樣，如果我再唔改，以後同朋友去旅行同房咪會被人發現。情況已經維持左年半，請問我可以點做？
你好呀， @patpat 
知道呢刻嘅你都非常不知所措，唔知可以點算，無曬方向咁，唔洗驚，我地慢慢一步一步嚟，糖不甩嘅大家會陪住你架。 
睇到你話同前度一齊嘅時候，佢會咁樣摸你，令你都覺得好舒服同興奮，好似安撫緊自己咁，都想知道你最近係咪有啲咩事好大壓力或者好焦慮，令你咁需要呢種「安撫」嘅感覺啊？ 
你話會係訓覺嘅時候不斷摸自己，除非個人醒曬之後／覺得有啲唔舒服先會停，好似控制唔到咁樣，感覺有啲困擾。
見到呢個動作除咗會令你覺得減壓，有時係摸嘅時候都會連結咗去一啲你唔開心嘅回憶，例如你之前被侵犯嘅回憶，相信當時嘅你都覺得好無助，但係依家有糖不甩係度，如果你準備好嘅話，都可以同我地傾下呢件事，你可以Whatsapp我地：69034682 ，我地都好願意同你傾計架。 
其次如果你想搵多啲其他嘅支持的話，都可以向芷若園/家計會/風雨蘭求助，佢地電話係：18281/2572 2222/2375 5322，如果你覺得好難講出口，都歡迎你繼續係呢度同我地傾下。 
知道你都有啲焦慮，唔想俾朋友發現，會覺得好尷尬同羞恥，唔知點算好，想搵個方法去解決依家呢一個不斷摸自己身體嘅情況，或者我地可以試下搵一個你訓係度、同樣會覺得舒服嘅動作去代替你原本摸身體嘅動作，例如抓床單咁樣，首先你可以係要訓覺嘅時候，用一個你舒服嘅姿勢訓係床上面，然後用盡全力捉住一下床單，捉住大概3秒鐘，放鬆，再捉住床單3秒鐘，如此類推，直到你訓著。咁樣可以暫時用捉床單（或者任何你覺得舒服嘅動作）呢樣嘢替代咗摸身體呢個行為。 
一年半都唔係一個短嘅時間，我諗呢樣嘢真係好困擾你，你先會開始上網求助，欣賞你咁堅強啊。好好奇想知道，呢個摸自己身體嘅情況喺你印象中，係點樣開始架？
多謝你回覆，最近發生得頻密左好多，嚴重左。壓力都一直大，所以免疫力低又有念珠菌問題。我有見輔導，但無詳細提過呢件事，又唔知點開口。加上因為我日日頭有flashback、人際關係等等問題，都未處理得曬咁多問題，只能逐一搞
我一開始唔係訓覺個時開始，而係分手後有時沖涼、換衫、赤裸嘅時候諗起ex，然後就會順手摸下自己，好似有啲掛住佢同諗起佢以前咁樣掂我嘅感覺，以前明明係好開心，但我好快就會唔開心，所以阻止自己唔再咁做。後來都試過係訓覺前向床再嘗試自慰咁，但失敗，一開始有啲舒服但耐左就諗起ex點對我，又stop。然後就訓緊覺，醒少少個陣突然發現自己已經摸緊敏感部位…半醒半睡個時我好似無咁容易記起ex，唔識停
情況間中出現，一星期可能有1-2晚係咁。我平時有其他娛樂同做下自己鍾意做嘅野，但無特別留意到話會唔會個日發生咗啲咩事所以個晚先會咁做。我日頭係無trigger嘅情況下都會諗起ex同唔開心嘅回憶，呢樣我就有察覺到要返工嘅日子會特別多，似乎一有壓力，所有唔好嘅事就會一次過湧出嚟，唔知夜晚呢個習慣係咪都有關。呢幾年嚟訓覺都差，易醒，本身訓覺問題都令我有壓力。
好焦慮都因為屋企人包括爸爸都可以隨便入我睡房，又同姊妹同房，好怕被發現，我自己都唔知點改點解釋。
係未有侵犯件事之前，我係好喜歡愛撫嘅感覺，都會經常回想呢種感覺，不過以前同ex係性方面係無咩溝通，佢會咁對我都係好突然，好多時係我訓緊覺或者我係床到，佢突然伸手黎摸我。
未分手前自己都好似有試過係自己張床到咁樣摸下自己，一邊諗住男朋友咁，因為我估唔到佢幾時會咁對我，每次都係好驚喜咁。我有需要又唔敢提出，因為個陣其實覺得自己好似做錯事，有啲罪惡感，又怕如果我要求佢幫我，會唔小心做到最後，個陣真係好唔想，所以唯有自己幫自己。
Hello @patpat，多謝你願意分享呢段經歷比我地知道
的確有時內心係好矛盾，明明撫摸自己係一種舒服、能夠安撫自己嘅動作，但係偏偏有時又會因為呢個動作，而諗起過往唔開心嘅回憶，仲會擔心會比家人發現自己有呢個習慣，唔知可以點算
其實有時當自己好放鬆嘅時候，潛意識會令我地無意識咁，選擇用手去保護自己覺得容易受傷害嘅位置。好似平日如果你有樣野好珍惜，或者容易整爛嘅野嘅時候，都會不自覺咁想用手好好咁保護佢，避免其他人觸碰到。而且有時透過撫摸自己，亦都可以產生催產素，令自己達到放鬆、安定嘅效果。所以撫摸自己（／撫摸敏感部位）係一個好正常嘅行為 
不過可以嘗試嘅，就好似 @Kaleo_StickyRiceLove 所講，可以搵其他動作（例如捉床單）去取代摸敏感部位嘅呢一個動作。 除左捉床單之外，都可以試下雙手交叉放肩膊位置訓覺，或者雙手合十放一邊臉龐訓覺，又或者搵個小枕頭／公仔攬住訓覺，都係可以嘗試嘅行為。一開始嘗試嘅方式，都可以參考 @Kaleo_StickyRiceLove 上文提及過嘅方法 希望可以對你黎講依然有安撫效果得黎，亦可以避免怕尷尬嘅情況。
有時習慣上嘅野，並唔係一時三刻就可以改變到，希望以上可以比到你少少其他嘗試嘅方向啦
而後文你都有提及過，對於前度過往撫摸你嘅行為，每次會覺得有突然／驚喜嘅感覺。但係都會擔心同前度講得更多性方面嘅需要，就會有機會控制唔到性行為嘅進度，可能會令自己後悔。都想分享番，其實無論係咩嘅關係（即使已經係情侶／夫妻），伴侶之間嘅性行為都係需要共識～
社會上過往都比較少提及到伴侶之間發生親密接觸，都係需要有雙方嘅共識，而雙方都係隨時都有say no嘅權利。不論咩時候，或者咩行為都好，只要你唔願意，都係有權利去say no 
同時，不論係咩性別都好，亦有say yes嘅權利，無需要擔心當自己提及更多嘅性需要，係咪代表自己係淫蕩或者欲求不滿，因為每一個人有唔同嘅性需要都係好正常嘅事 
最重要嘅係，彼此之間有溝通交流，理解對方嘅想法，去搵一個共識
就好似前度「突然」對你嘅撫摸，如果你都覺得唔係每一次都係喺一個你覺得適合比人摸嘅時候，其實都係可以同伴侶反映你嘅感受。就算當初你有同前度表示希望佢幫你撫摸其他嘅部位／更進一步嘅行為都好，其實之後佢每做一個行為之前，對方都應該要詢問你係咪同意，或者你係咪覺得舒服，先能夠決定係咪繼續進行落去。同埋插入式嘅性行為都唔一定係「性行為嘅最後一步」，雖然社會上往往都會認為插入式嘅性行為先係「性」，但係其實性唔一定只侷限於插入式嘅性行為啊～ 其實最緊要都係睇雙方有共識下，覺得當下咩程度嘅接觸／交流係能夠令彼此舒服同埋滿意
從文字都發現過往同前度嘅經歷到依家，依然會影響到你嘅身心狀態。特別係最近日頭無特別trigger 嘅情況下，都會諗起同前度相關嘅唔開心回憶。睇睇你覺得呢個程度會唔會影響到你日常生活嘅情況，需要搵專業嘅輔導服務去處理呢一段經歷，還是你覺得現階段同我地糖不甩傾訴，已經能夠處理到你呢一刻嘅需要
而家我明白共識好重要啊，你講得岩……無話「做到最後」而係形式上既不同，不過我始終最怕會令我大肚，所以抗拒插入式行為
我琴晚嘗試攬住攬枕訓，半醒半睡個時feel到自己身體、胸、乳頭等等部位都有強烈既渴望想隻手伸埋去摸下佢，但我忍住左，即刻捉實攬枕，又放開，捉實又放開，然後再慢慢訓返。一晚都發生好幾次，我咁樣係咪都正常架？係咪繼續堅持落去我可能就戒甩個習慣？係訓教個時既身體慾望又係啲咩黎架？我拍拖前都從來無呢種情況，我係比人激發左呢樣野？Taste過身體接觸、愛撫既快樂之後好似好難返去以前好平靜咁既？希望你地可能幫我TAT 謝謝
雖然插入式性行為確實有一定嘅懷孕機會，但係現時都有各種有效嘅避孕方法可供選擇嘅，例如以避孕套配合口服避孕藥可以大大減低懷孕嘅機會 不過就好似 @Sze_StickyRiceLove 咁講，你係有櫂決定喺咩情況下進行性行為嘅，所以並唔需要因為自己抗拒插入式行為而感到自責。
另外，好欣賞你有努力嘗試訓覺嘅時候以其他方法代替撫摸自己，而且你都有成功忍住左，做得好好阿 
長久以黎嘅習慣的確需要時間改變，就好似如果一個人習慣左深夜先訓，為左健康想調整返生理時鐘都未必係一時三刻可以改變到既事，所以你嘅情況係好正常嘅，唔洗太擔心，亦都唔洗俾太大壓力自己 你可以繼續嘗試每晚都攬住攬枕訓，然後記錄低每晚嘅情況，每個星期檢視返自己嘅進度，咁樣可以方便你評估依個方法適唔適合你，亦都可以幫助你檢視自己嘅進步，令你更加有動力堅持落去 
至於訓覺時候嘅身體慾望有機會係出自我地嘅潛意識同埋身體嘅反射動作，就好似如果我地訓覺嘅時候俾蚊咬覺得好痕嘅話，我地都可能會不自覺地𢯎痕嘅位置。你提到喺你拍拖之前無依個情況，的確有機會係因為你拍拖嘅時候試過愛撫嘅感覺，發現自己好享受依個感覺而令宜家身體有想被撫摸嘅慾望。就好似Sze咁講，喜歡同渴望愛撫係好正常嘅事，就正如有性慾係好正常嘅事，而如果我地長期逃避身體依啲慾望有機會令我地嘅身體過份壓抑，因而導致身體自動地喺其他方面宣洩依啲慾望。例如如果我地長時間控制住自己嘅食慾，有機會令我地喺某一日不能自控地食左好多我地之前好想食但禁食嘅野。當然過份沉溺於滿足某種慾望以致影響日常生活亦唔係健康嘅狀態，所以我地要學習以合適嘅途徑滿足我地嘅慾望，喺滿足慾望同日常生活之間取得平衡。
以你嘅情況為例，如果平日獨處嘅時候想摸自己，可以盡量俾自己摸到覺得滿足為止， 而唔係阻止自己繼續摸。明白要做到依點對你黎講係好困難，因為每當你撫摸自己嘅時候都會諗起同前度嘅不快回憶 但係都鼓勵你嘗試將思緒同感覺集中喺當下，如果真係覺得好辛苦嘅話，可以先停落黎，深呼吸，直到你平靜返落黎再繼續。
你可以先嘗試以上嘅方法，過程中順利與否都唔緊要，唔需要強迫自己喺短時間內做到，記住有我地陪住你，任何嘅感受都可以同我地分享
嗨，我最近獨處時終於嘗試摸自己、自慰，當好興奮個時原來我唔會諗起ex，滿足完自己個刻都舒服，然後發覺我唔一定要靠人地我先可以滿足身體上嘅需要。
但係當靜落黎，隔左段時間，甚至之後個幾日諗起EX嘅頻率比以前更多，好多係以前同佢有性關係嘅回憶（有好同唔好），我發現自己其實唔係只需要身體上想有愛撫高潮個等等，而係需要情慾情感嘅流動……個人好空虛，原來我以前同EX開心嘅性回憶有部份係因為我真係好鍾意佢，所以好容易就好興奮，而家仲未搵到令自己身心都滿足嘅方法，好難過……
夜晚訓教都有不自覺就摸自己嘅情況，日頭諗返起EX個陣有比以前更難受嘅感覺，好似反彈咁，我可以再點樣幫自己啊 
Hello @patpat 好開心聽到你分享最近嘗試摸自己、自慰嘅經驗，並且完左之後都有舒服、滿足到自己嘅感覺，係好好嘅嘗試啊
有時分左手之後，再接觸番自己嘅身體時，記起過往同前度發生過嘅往事，甚至係性經驗，都係好正常嘅情況 。亦正正就係因為你同伴侶性回憶嘅部分，果刻真係開心過、滿足過，所以會回想起呢個情況令自己有性興奮真係好平常嘅事 。其實不論生理、心理、生活上，其實好多時都需要一段時間令自己再次習慣番一個人時嘅生活模式，同埋心理狀況。特別係鍾意得越深嘅時候，往往可能需要淡忘，或者習慣番一個人嘅時間都會越長 
。（當然每個人所需要嘅時間亦唔係一樣。）
自慰同有伴侶時嘅性行為不一樣之處，往往就係因為當中包含左人與人之間嘅情感交流，所以更容易令人難以忘懷。所以都要有心理準備，可能搵到下一個信任嘅對象之前，呢種感覺都會持續呢段時間。當然呢種會回想過去嘅習慣並非一件壞事，但係都可以嘗試內心上調節一下自己，當享受肉體快感嘅時候，都唔好令自己太沈醉於太多情感回憶入面 
。
其他具體嘅方法，如果想情慾情感上都滿足到的話，都可以嘗試一下會唔會睇AV、睇情慾小說，有角色代入時會比較幫助到自己有情感上嘅滿足 。又或者覺得自己身心準備好嘅時候，都可以嘗試認識新嘅交往對象、搵性伴侶，或者透過網上交友，透過同其他人sextext，從而搵到性方面興奮嘅感覺 。
晚上訓覺會不自覺咁摸自己方面，之前所提及到嘅替代性方式（例如攬住攬枕訓覺），你覺得對你黎講有無幫助（例如減低不自覺摸自己嘅行為，或者令自己都滿足到自己性方面嘅欲望）？如果過往都有幫助的話，都不妨可以再嘗試呢個方法。如果唔太適用的話，都可以好似 @Ana_StickyRiceLove 提及過咁，可以嘗試再搵其他嘅方法，宣洩性方面嘅欲望。例如可以嘗試沖涼自己一個人嘅時候撫摸自己多D。
最後，日頭諗番前度時，可能都可以嘗試話比自己知「想起前度，並非一件錯嘅事情」。有時我地會不自覺咁，當自己想起唔愉快嘅往事／前度，就會內心責罵自己「點解好諗唔諗，自己又諗起呢個人／呢件事 
」當自己越抗拒記起嘅時候，其實呢個回憶就會更加容易浮現於腦海當中。想起嘅時候，可能心理上話比自己聽「記起呢個人係好平常嘅事，畢竟呢個人確實存在過於自己生命歷程當中」，願意接受呢個「會偶爾想起對方」嘅自己的話，反而會漸漸能夠放下。每個人都係生命裏嘅過客，而有D人可能亦會留下更深或者唔太好嘅回憶。過去嘅事情我地無辦法可以改變到，只能夠透過嘗試將呢一段嘅經歷，轉化成其他嘅意義，讓佢以一個更好／令自己舒服嘅方式，存在於我地回憶之中。加上，有時正正就係自己遇過呢一個人／經歷過呢件事，先會發現其實自己係鍾意D咩同埋唔鍾意D咩，先會更加清楚未來要去尋找點樣嘅關係，或者對唔同事嘅價值觀／期望 
。希望呢個「慢慢接受，慢慢放下」嘅方式，都係一個你覺得可以嘗試嘅方向啦
Thank you
都想問下當高潮之後，陰道口陰唇好似仲有啲好有頻頻嘅震動係咪都正常架，好難形容個種郁動，但靜落黎會feel到下面好似個心臟咁識得呯呯跳
真係會有好多情感回憶、同ex嘅性幻想浮現，睇AV小說都好，都會好自然地諗返ex，唔知點先可以代入到情景…唔想搵SP sex text 分手都好耐了，真係好漫長
日頭摸多左自己，訓覺攬cushion訓訓下cushion移位，都唔太work，醒個陣發現自己已經摸緊身體，日頭即使自慰過，諗住都好滿足啦，結果都係壞習慣出現，好煩躁
諗起ex的確係好唔舒服，亦會有啲掛住佢，好矛盾，好努力去接受緊
呢個情況其實都係正常嘅，因為無論男性同女性高潮之後，其實性器官都會有抽蓄嘅反應，呢個係身體為咗令性器官慢慢冷靜落嚟而導致嘅，所以都唔洗緊張嘅。
好開心見到你有進步，係獨處嘅時候自慰唔會再諗起ex。知道你都會覺得訓覺嘅時候摸自己都覺得好煩擾，但係要俾啲時間自己，可能要呢個習慣真係需要啲時間先可以改變。
回憶係一樣好奇怪嘅，總會係你唔覺意嘅時候突然出現，其實係一件好平常嘅事，畢竟果一啲都曾經係你最深刻嘅回憶，而果一個人都曾經係你最重要，最愛嘅人。
當自己孤單，唔知點算，又或者需要支持嘅時候，難免都會都會諗起以往失去咗嘅人，諗起果時有佢陪伴，指導同埋支持嘅時光，但係「那動人時光，不用常回看，能提取溫暖以後渡嚴寒，就關起那間房」。 
以前嘅戀愛的確真係會令你覺得好懷念，覺得好美好，但係永遠留係回憶裡面嘅人事物都係最美好嘅，因為我地係戀愛裡面期望嘅，係一個美好嘅結局，既然現實做唔到，只可以係回憶裡面建構。 
「最動人時光，未必地老天荒，難忘的因你太念念才難忘，容易抱住誰十年，最難是放」
因此回憶會令你一直卡住，無辦法前進。的確，結束一段戀愛嘅過程中，最難嘅，唔係講講果刻，而係當事過境遷，但係自己依然無辦法抽身。 
「放手後，愛依然在，雪融了，就應該花開。」
一段關係嘅結束，唔代表一定要完全切斷曬所有連結，我地可以將呢一份回憶好好咁樣放係自己嘅回憶盒裡面，然後合埋佢，放係心裡面嘅一個角落，時不時得閒先拎返嚟回憶。
你可以試下做一個告別儀式，將以前嘅事寫低，無論係一張紙或者一本簿，寫好之後就將佢收係櫃裡面，如果你唔想用寫呢個方法，可用錄音錄片嘅方式，都係一樣用手指儲存低，收好，等呢本簿/呢張紙/呢個手指，代替你去承載呢一份回憶。 
至於摸自己嘅情況，如果真係好煩擾你嘅話，可以試下戴手膜或者手套訓覺，咁樣訓覺要摸自己嘅時候就無咁容易，呢個方法當然會令你訓覺嘅時候比較辛苦，但係都可以試下有無改善架。