事後丸有無用??

Sex嘅時候發現安全套穿咗
但嗰陣係做到一半仲未射
雖然安全套有殺精劑 但我都仲好驚
所以3個鐘內去家計會食咗新一代避孕藥
呢排都好大壓力好驚有咗
我想知咁樣懷孕機率大唔大:frowning:

係指定時間內(性行為後72/120小時)經過醫生檢查再處方事後丸嘅話,可以達到緊急避孕嘅機會率都好高,所以暫時都唔需要太擔心會意外懷孕。家計會果邊應該有同你預約一個月後上去驗孕確保無懷孕,但其實最快係性行為後7日已經可以驗孕,會得到一個初步嘅結果。而係11日後驗嘅話,結果會更加準確。如果擔心藥效嘅話,可以係適當時候買驗孕棒測試一下啊~ 不過醫生檢查過你既情況,認為適合用事後丸緊急避孕先會開藥俾你嘅,所以都唔使擔心!

而且其實你呢個決定都係正確架,因為即使未射精,其實陰莖係性興奮嘅時候已經會分泌出透明嘅尿道球腺液,當中都有機會含有精子,所以如果安全套係過程中破裂,呢啲分泌物一樣有機會接觸到陰道,亦代表有懷孕嘅風險。而且亦唔係每款安全套都會含有殺精劑,即使有份量亦唔會係好多,所以發現安全套破裂去進行緊急避孕係比較穩陣嘅做法! :muscle:t2: :muscle:t2:

服用事後丸之後有機會出現唔同嘅副作用,例如作嘔、頭暈、陰道出血等等,亦有機會影響你下一次經期嘅日子同經血嘅狀態,呢啲都係正常嘅,亦同係咪懷孕無關係。所以即使出現呢啲症狀都唔需要太擔心呀,一般係24-48小時之內就會消失架啦!

補充多少少:事後丸後透過高劑量荷爾蒙去1)抑制排卵 2)增加子宮頸黏液,減低精子通過嘅可能性 3)令子宮內壁增厚,令受精卵難以著床,所以能夠做到緊急避孕嘅功效。見到你話最近壓力都好大,其實本身壓力同緊張嘅情緒都會令月經受影響,可能會改變經期嘅日子,再加上而家服食咗事後丸,可以有心理準備嚟緊下一次月經可能會比你預期嘅日子有不同,同懷孕無直接嘅關係,希望可以令你安心啲先。不過單憑身體症狀都係唔可以判斷到一個人係咪懷孕或者就快嚟月經,想安心啲嘅話過多一排用驗孕棒驗下就清楚晒啦!

另外,事後丸係防止唔到性病/其他疾病經過性行為傳播嘅,安全套破裂嘅情況下雙方嘅分泌物都有機會接觸到,有需要嘅話空窗期後都可以進行性病測試呀 :relaxed:

唔該晒!:heartpulse::heartpulse::heartpulse: