打唔打針好?

我同男朋友係五月發生咗關係,我地都係第一次。可能係新手嘅原因,個套唔知係幾時甩咗,所以我食咗事後。我六月中準時黎M,個陣我去咗家計會度食事前,不過我食咗幾日,我個胃就好痛,晚晚會痛醒個種,醫生提議我打針,所以我就冇再食藥。停藥大概兩日,我黎咗第二次M,而胃痛都好返。完咗M之後,我同男朋友啪啪啪個陣又失手,今次個套穿咗,於是我即日走咗去食事後。過咗差唔多一個星期,去到七月,我有兩日下體流血,一時紅色一時粉紅色咁。因為唔可以再食事後,所以我而家中止咗同男朋友嘅性生活。其實我地都好想繼續,如果今個月黎M去打針會唔會太急?身體需唔需要啲時間復元?明明食事後比較傷,但係我去兩間診所食事後都冇事,所以診所啲藥係咪會比家計會好?我打針去診所打同去家計會打係咪有分別嘅?其實除咗打針,你會建議咩避孕嘅方法?thanks

Hello @cky :relaxed: 留意到你同男朋友用安全套嘅時候,都試過出現甩套,同埋安全套穿左嘅情況。一般出現甩套嘅原因,有機會係因為安全套嘅尺寸唔太適合。因為安全套嘅闊度一般都有分M size、L size、XL size等唔同尺寸,一般以mm為單位(例如52mm ± 2mm)。如果過往買安全套之前,都未試過度陰莖尺寸的話,都建議可以度度陰莖嘅圓周,睇下咩嘅尺寸會比較適合,咁就可以減低安全套甩出黎嘅機會 :relaxed:

量度嘅方法,就係當陰莖勃起嘅時候,可以用一個卷尺(或類似嘅物件,如繩),圍陰莖一圈,去得出陰莖嘅圓周。然後將圓周除2,就係安全套所指嘅闊度。因為安全套係有彈性,所以可以選擇比實際尺寸細少少嘅安全套款式,比較可以避免安全套滑落嘅情況~ :wink:

而安全套穿左方面,常見嘅破裂原因,包括(1)未有使用足夠嘅潤滑劑;(2)戴安全套嘅時候並無將儲精囊內嘅空氣擠出;(3)使用過期嘅安全套。如果之前都無特別留意到呢D細節的話,都可以嘗試一下如果配合潤滑劑使用,同埋戴安全套嘅時候記得擠番儲精囊出黎之後,情況會唔會又改善 :blush: 不過如果之前其實都有小心注意呢D位,但係安全套依然穿左的話,就唯有嘗試再配合其他避孕措施使用啦 :pleading_face: 始終有時意外嘅野,即使好努力咁去減低人為因素,依然都係有機會會發生 :disappointed_relieved:

而用藥方面,事前避孕藥同事後丸係兩種唔同性質嘅藥物,內含嘅荷爾蒙類型同埋劑量亦都好唔同。所以暫時只能夠知道你身體對於事後丸出現嘅副作用比較輕微,而對某種事前避孕藥嘅荷爾蒙劑量反應比較大,同診所/家計會嘅用藥物質量無關 :relaxed:

事前避孕藥方面,其實市面上唔同牌子/唔同款式嘅避孕藥內,所含嘅荷爾蒙類型/劑量都唔同。所以一開始試避孕藥嘅時候,有唔舒服嘅反應,係好常見嘅情況,無需太擔心 :relaxed: 唔少女性都需要轉用一兩次唔同牌子/款式嘅避孕藥,先搵到比較適合自己身體狀況嘅避孕藥。所以你都可以考慮轉用其他牌子/款式嘅事前避孕藥

或者之前醫生建議你打針嘅時候,有無講過係因為咩原因? :woman_health_worker:t2: :man_health_worker:t2:係因為身體本身就唔適合使用荷爾蒙類嘅避孕工具,還是因為其他嘅因素?因為都擔心如果本身身體唔適合荷爾蒙類避孕法/對呢個避孕方法會敏感的話,除左唔適宜服用事前避孕藥之外,都有機會避孕針都未必適合你嘅體質 :pleading_face:

一般注射避孕針,建議係月經週期頭7日(即係黎月經嘅時候)期間注射,注射之後就會有避孕功效。避孕針成分方面,去診所打同去家計會打分別不大,而收費上都可以預約打針嘅時候,詢問護士收費大概係幾多,可以比較一下 :relaxed: :wink: 注射之前嘅時候,都可以諮詢醫生身體比較適合打單一荷爾蒙避孕針(每3個月打一次),還是需要打混合荷爾蒙避孕針(每1個月打一次)。

雖然一般注射避孕針之後,係會即刻有避孕功效。不過我地安全起見,都會建議注射後頭7日,都額外配合番安全套進行性行為。因為身體一開始萬一唔適應藥效(例如嘔吐)嘅時候,呢個狀態下發生唔安全嘅性行為,其實都會有懷孕風險。所以配合安全套,就會可以避免到呢個情況帶黎嘅風險 :wink:

因為呢段時間都見你已經服用過兩次事後丸(高劑量荷爾蒙藥物),所以都建議諮詢一下醫生意見,係咪適合依家打避孕針 :relaxed: :heartpulse:

其實除左安全套、事前避孕藥、打避孕針之外,都有使用子宮環等方式去避孕。不過呢種方式都比較繁複,需要進行小型手術於體內放置子宮環。所以都建議諮詢醫生嘅意見,再考慮係咪有必要選擇安全套/避孕針以外嘅避孕措施 :blush: :woman_health_worker:t2: :man_health_worker:t2:

不過都想提醒番,除左使用安全套,其他以上所講嘅避孕措施(例如事前避孕藥、避孕針、子宮環),都係唔能夠防止到性病傳播,或者其他可以經由性接觸傳播嘅疾病(例如念珠菌、尿道炎)。如果你同男朋友都好清楚彼此嘅性方面嘅歷史,或者其他疾病嘅狀況,又或者雙方都有做過性病檢查的話,都可以繼續考慮使用呢類型嘅避孕措施嘅 :blush: 如果唔太清楚彼此嘅經歷/疾病,或者無做過性病檢查的話,就需要考慮埋性病/其他病毒嘅傳播風險啦。 不過都有見過提及到你同男朋友五月都係彼此第一次發生性行為,相對嘅感染風險都會比較細嘅。但係要記得當出現任何病徵嘅時候,都要停止發生性行為,同埋及早求醫啊~ :woman_health_worker:t2: :man_health_worker:t2:

你好,多謝你嘅回覆。你嘅回覆好詳細 比到我唔少方向。
關於用套方面,我起初都有留意到安全套尺寸嘅問題。但係我係市面上買都係得一個均碼,我係食事前藥睇家計會個陣 都有多口問下個度嘅醫生,對方同我講係得一個碼。所以如果安全套係有分碼嘅,咁我可以係邊度買到?我而家同男朋友試過幾次之後就發現某一個牌子嘅某個款比較啱身,所以我同佢就係打針之前都用呢個款咁。
另外我而家都有一個比較頭痛嘅情況——我遲遲都未黎M。我五月個陣食第一次事後,我係(10/6-14/6)準時黎M。而我個陣係黎M嘅第五日食事前,不過因為食完出現嚴重嘅胃痛,我食咗四日就冇再食,所以我係(20/6-23/6)黎第二次月經。但係,係25/6個陣我同男朋友避孕失敗,所以我地係即日就睇醫生再食事後(同第一次嘅事後係唔同藥款) 。去到(1/7-2/7)我下體有啲流血。我初頭以為黎M,因為好似,不過啲量好少同埋去到第二日啲血有啲似粉紅色。如果呢兩日唔係黎M,咁我應該係(16/7-19/7)黎M,不過我而家仲係一啲黎M嘅感覺都冇。我開始有啲擔心,我同男朋友最上一次啪啪啪係13/7,如果我而家驗孕會唔會太早?
去到最後,覆返你之前問我想打針嘅特別原因。其實係我去家計會個陣,個度嘅醫生係建議我打針多過食藥,因為佢話打針嘅副作用會比較小,不過我個陣怕每個月要返去打針麻煩就話係藥算啦。而我再睇多兩個診所醫生,佢地聽完我嘅情況都建議我打針,因為我淨係個胃唔舒服,打針啲藥唔經胃 我應該會好啲。
好多謝你睇哂咁大段野,期待你嘅回覆,感激不盡。

Hello @cky :relaxed: :two_hearts: 之前嘅回覆能夠幫到你,實在太好啦 :wink:

首先,其他碼數嘅安全套,香港一般喺性玩具/性用品商店先會比較容易搵到。詳情可以留意下唔同性用品店嘅網站,一般按入去「男用安全套」類別嘅時候,都會見到部分安全套有標明係「大碼」/「加大碼」,可以再按入去商品,睇睇實際果款安全套嘅尺碼 :blush: :wink: 因為有時即使標明係「大碼」,但係唔同牌子嘅「大碼」尺寸上,可能都會有少少差異,所以好建議要檢查一下實際尺寸係咪真係合適先好購買啊 :blush: :relaxed:

有部分性用品店,甚至會有「大碼安全套試用裝」,套裝內含有唔同牌子嘅大碼安全套(各1),咁就可以試完咁多款之後,再睇下咩牌子嘅大碼安全套比較適合自己 :wink: 無呢類試用套裝的話,都可以睇睇有無可以單個散買嘅安全套,咁就唔需要一次過買成盒,試完一個先再考慮~~ :nerd_face:如果怕買錯的話,都可以上去商店嘅門市,問問店員邊幾款安全套比較符合你地嘅需要,再考慮買邊一款。依家疫情怕出門口的話,都可以選擇網上訂購嘅方式訂合適嘅安全套,送到去屋企附近取貨點再取貨~ 以下係兩個個本地嘅情趣用品店連結,都可以參考一下 :relaxed: :blush: 或者Google一下本地其他嘅商家,都好容易搵到相關嘅資訊 :kissing_closed_eyes:

Sally’s Toy - 男用安全套:
https://www.sallystoy.com/hk/s/intimate-care/condoms/condoms-for-him

Les’Play HK - 安全套:

你同男朋友暫時都搵到某一個牌子嘅某個款係啱身,暫時用落都無咩出現問題的話,都可以繼續用呢一款安全套啊~ :blush: :+1:t2: 不過如果偶爾都會好似之前咁再出現安全套甩、穿嘅情況,都建議可以睇睇以下我地糖不甩出過有教正確戴安全套嘅IG Post,留意會唔會戴安全套嘅過程中,有D細節位未有留意到,可以再一步避免安全套甩/穿嘅情況發生 :blush:

糖不甩 - 《Stickypedia系列-安全性行為:第一寶》:

而月經方面,首先都想知道,你過往月經週期大概係幾多日?月經週期嘅日子算唔算穩定?

暫時睇你嘅情況,只係比你預期黎月經嘅日子遲左3日,唔算真係遲左好多,所以都可以放心先嘅 :smiling_face_with_three_hearts: 加上月經來遲都可以有好多原因,例如生活作息唔定時、飲食唔均衡、情緒有起伏、壓力過大、服用過藥物(特別係抗生素)等。特別係你6月尾嘅時候,有服用過事後丸。服用事後丸嘅副作用除左一般常見嘅頭痛、噁心、腹痛等症狀之外,部分女性亦都會出現下一次月經提早/延遲、下體出現不規則出血嘅情況(一般比月經血量少,血液顏色未必同月經一樣,最多可持續3-4日)。所以你1-2/7 下體流血嘅情況,都好大機會係服用事後丸所引起嘅,無需擔心 :relaxed: 可以過多幾日,再睇睇月經有無黎先 :kissing_closed_eyes: 不過如果隔太耐都未黎的話,都建議覆診嘅時候,同醫生反映你月經來遲嘅情況,睇下有無咩其他原因令到月經仲未黎~

驗孕方面,因為一般受精卵著床需要6-9日,所以性行為7日後(20/7,即係今日)驗孕,可以得到一個初步嘅驗孕結果。不過性行為11日後(24/7)驗孕,結果就會比較準確同埋可靠啦 :blush:

如果幾個醫生都覺得避孕針比較適合你嘅體質的話,都可以考慮一下係咪真係嘗試去打啊 :blush: 或者醫生有無講過你係需要打混合荷爾蒙避孕針 (每1個月打一次),還是都可以打單一荷爾蒙避孕針 (每3個月打一次)?後者的話,就無咁需要經常返去打針 :pleading_face: :pleading_face: 如果你依然係好抗拒打避孕針,覺得太麻煩的話,都可以暫時繼續使用安全套作唯一避孕措施嘅,不過前提就當然要搵到一個合適嘅安全套,可以令你地都比較安心,又安全咁發生性行為啦 :blush: