我今年18歲，有時會有性行爲。但係我係果D好驚有左既人，雖然大部分時間都有做足安全措施，但都成日膽戰心驚。於是我上網揾下關於係香港提供既避孕方法。避孕藥因爲生活忙碌而一定無可能按時食，避孕針又好多嚴重副作用。於是我決定用iud （子宮環）。但我見好似家計會有，但話要26嵗以上先可以買。大佬，姐係話我要等多8年？！請問大家有無其他地方可以得到iud？想知道詳情！thanks
Hello @AB123 
其實避孕針同避孕藥有機會出現嘅副作用（例如體重增加、頭痛及頭暈、乳房漲痛）都係相近，唔會有嚴重嘅副作用／對你身體構成好大嘅印象，而副作用一般都會短時間內就消失。見你提及到避孕針又好多嚴重副作用，都想了解番你係參考過邊一個網站睇到／邊度聽到呢個資訊？ 
的確有時生活忙碌，唔記得服用避孕藥的話，其實都有機會唔記得打避孕針（因為每1個月／每3個月就需要打一針，視乎避孕針類型）。所以，子宮環都係一種適合你現時生活情況嘅避孕措施啊 
不過要留意嘅係，比起服用避孕藥、注射避孕針，其實子宮環相對上對於身體嘅限制亦都會多好多。因為子宮環係要放入子宮腔入面，所以如果身體係有生殖器官異形、患盤腔炎、經血量多、會有嚴重經痛、不正常嘅陰道出血等情況的話，就唔適宜使用呢個避孕工具 
而配戴子宮環嘅過程，亦屬於醫療程序嘅一種，所以係需要諮詢過醫生意見，同埋醫生進行過相關嘅體格檢查，確認你嘅身體係適合配戴子宮環，先可以進行嘅。
對於家計會需要26歲以上先可以配戴子宮環嘅要求，我地暫時於家計會網站就無見到相關嘅資訊 不過根據我地嘅經驗，26歲以下嘅女性，如果身體情況許可，而且覺得子宮環係合適的話，都係可以成功配戴嘅。不過就住你嘅情況，都建議直接打電話去家計會確認一下會比較好同埋清楚 
一般對於未生育過嘅女性，家計會都會建議再三考慮係咪有配戴子宮環嘅必要性，或者有無其他避孕工具會比較適合你嘅情況。但係如果你依然係好堅持想配戴子宮環的話，相信係有可以同醫生討論嘅空間
詳情都可以睇睇家計會嘅網站：
其實配戴子宮環都會有機會出現併發症，例如：子宮環移位、脫落、破損或斷裂；部分或完全子宮及/或子宮頸穿破；盤腔感染等。戴環後20日內，亦相較其他無戴環嘅女性，有更高機會患盤腔炎。而副作用方面，頭幾次黎月經嘅時候，經血量比過往多，經痛亦比過往嘅經痛強烈。或者戴環後幾日，都有機會出現腹痙攣性疼痛或背痛。所以都好建議可以諮詢醫生睇法之後，再考慮自己嘅情況係咪適合使用子宮環呢個避孕工具啊
除左家計會之外，衛生署嘅母嬰健康院、婦女健康中心，或者其他婦科診所都有提供配戴子宮環嘅服務。不過婦科診所方面，可能就需要一間一間咁去打電話，了解該間診所有無提供配戴子宮環嘅服務 有關衛生署嘅服務，可以參考以下網站：
《家庭健康服務－ 提供婦女健康服務的健康院/中心》
https://www.fhs.gov.hk/tc_chi/centre_det/cent_pwhs/cent_pwhs.html