事前避孕藥 副作用

交代一下背景
我已經食咗yaz兩個月,依家踏入第三個月
每日準時食藥,試過遲食,但都係遲半小時內
而我前兩次經期都準時喺白色藥期間內嚟

我今個月已經食到第三包第4粒,喺食到第3粒嘅時候,男朋友無套內射咗,當晚開始,我小腹就有種谷m嘅痛;第二日嘅時候,胸部出現刺痛

我想請問:
1)胸部刺痛算唔算係避孕藥嘅副作用?因為我上個月都試過,不過只係痛咗幾下
2)聽講精液會導致子宮收縮,係咪真?所以先會小腹痛?
3)我準時食藥,經後7日後內射會唔會懷孕?
4)下體濕濕嘅感覺係咪只係避孕藥嘅藥效?
5)食避孕藥嘅時候,體溫比未食之前高係咪正常?

謝謝:pray:t2:

Hello @5DN1L,都記得你之前有問過同避孕藥相關嘅問題啊 :relaxed: 今次都等我一一回覆你嘅問題先~

  1. 女性服用口服避孕藥嘅初期,出現乳房漲痛嘅情況,係常見嘅副作用之一。其他常見副作用就包括噁心、輕微陰道出血、體重增加、頭暈、情緒低落等。之後服用得耐D,身體適應左藥效,情況就會有好轉,無需太擔心 :blush:

  2. 曾經有學術研究指出,其他動物(母狗)身上發現,精液中嘅「前列腺液」,係有機會導致子宮收縮。亦有婦產科嘅新聞表示臨近分娩嘅時候,精液中嘅「前列腺素」係有機會刺激到子宮收縮。不過暫時醫學嘅學術界,就未有研究,能夠好確實咁指出無論任何情況(接近分娩/一般性行為)中,前列腺液/前列腺素係會直接影響到子宮收縮嘅情況。

因為有唔少人即使無經歷過內射,都有出現到性行為後感到腹痛嘅情況。所以我地較偏向解釋子宮收縮/腹痛嘅原因,係因為性行為過程中,陰道整體嘅肌肉都會收縮,子宮亦有機會會收縮。而內射嘅時候,子宮會感受到明顯嘅收縮,係因為有外來物(精液)突然進入,就會刺激到子宮部分肌肉,令到你感受到子宮收縮/出現輕微腹痛嘅情況。又或者性行為期間抽插嘅動作,亦有機會刺激到膀胱嘅肌肉。因為膀胱嘅肌肉同子宮嘅肌肉組織都接近,有機會令子宮出現收縮嘅感覺。 :grinning: 有時有用安全套進行性行為嘅時候,都可以留意一下陰道、子宮部分肌肉嘅收縮情況啊~

不過如果每一次性行為之後都會出現腹痛嘅情況,都可以試下下一次性行為換其他嘅體位。因為有時有機會係因為某D體位(例如傳教士式),會較容易刺激或者撞擊到子宮頸/膀胱附近嘅肌肉,令到你收縮感比較強。

  1. 如果過往係有持續正確服用避孕藥,即使經期期間係無服藥(21粒款避孕藥)/服用含非活性成分嘅藥丸(28粒款避孕藥),只要之後有依時開始服用新一排嘅避孕藥並有正確服用,咁就無需擔心經後7日後內射會唔會導致懷孕 :blush: 因為藥效已經喺身體內建立左。

  2. 女性長期服用避孕藥之後,陰道嘅分泌物係有機會增多。只要分泌物無異樣/異味,或者出現下體痕癢情況,都無需擔心。一般停藥後,分泌物嘅量就會相應變番正常。

  3. 因為避孕藥屬於荷爾蒙類藥物,所以係有機會造成體溫稍微升高嘅情況。不過如果體溫升得太多/太高,令你出現發燒/身體明顯乏力/其他不適嘅徵狀,都建議同醫生反映睇睇有無需要轉食其他牌子嘅避孕藥啦 :blush:

總括黎講,因為事前避孕藥都係屬於荷爾蒙藥物,即使依家藥物一般都係較新嘅一代,劑量亦都係好少,但係始終都係屬於外來嘅人造荷爾蒙,都有機會令你身體出現變化(例如分泌物量增多、體溫稍微升高),但原則上身體狀況變動嘅幅度唔應該太大。如果身體有出現明顯變化/感到不適,都建議儘快同醫生講你嘅情況,睇下會唔會有需要換其他牌子嘅避孕藥,或者會唔會本身身體唔太適合服用避孕藥。 :woman_health_worker:t2: :man_health_worker:t2:

好,唔該:smiling_face_with_three_hearts::smiling_face_with_three_hearts:

另外想再問一下,其實我幾年內都無懷孕嘅打算,但事前避孕藥始終係外來嘅荷爾蒙藥,見有部分人會食夠半年至一年先停藥,幾個月後再食返,咁其實有冇話食夠幾耐要停一停,等身體休息下再食?定真係可以一直食足幾年?

當你持續服用左一款避孕藥之後,無出現持續性/嚴重嘅副作用,醫生亦認為避孕藥係適合你嘅體質,咁就無需要停藥。即係,當該款避孕藥係適合你嘅時候,係無須停藥來讓身體休息。持續服用避孕藥幾年係無問題嘅 :relaxed:

同埋基本上避孕藥係當你隨時停藥,就會回復番受孕嘅可能性,所以只要如果你身上無出現咩副作用的話,都無需要特別停藥 :blush:

不過,都建議要定時睇醫生接受健康檢查,了解個人健康狀況之餘,都可以讓醫生評估你到時候隨住年齡、身體狀況、個人習慣、人生規劃嘅轉變,會唔會需要選擇其他嘅避孕措施。又或者隨住科技上嘅進步,未來有機會令你之後有更多避孕措施嘅選擇 :relaxed: 所以定期嘅檢查同諮詢醫生意見係好重要架 :wink:

好,唔該:smiling_face_with_three_hearts::smiling_face_with_three_hearts:

咁如果我平時有準時食藥,但間中撞正唔方便食藥,結果遲少於1小時食,又會唔會降低藥效?

服藥時間對藥效嘅影響係因應唔同嘅牌子而異嘅,不過如果只係遲左1個鐘服食嘅話,一般係唔會影響藥效嘅,所以唔洗太擔心 :blush: 或者都可以講埋如果漏服Yaz避孕藥嘅話,喺點樣嘅情況下會/唔會影響藥效,等你如果遇有依個情況可以唔洗咁慌張阿 :relaxed:

如果喺原定服藥時間嘅24小時內記起未服藥嘅話,應該喺記起之後準快補食返,並且按照正常時間服食下次嘅藥,喺依個情況下藥效係無被影響嘅 :blush: 而如果超過24小時仍未服藥嘅話,咁藥效就有可能已經降低,依個情況就建議性行為嘅時候使用外加嘅避孕措施,例如安全套。
參考資料: Yaz官方網站 https://www.yaz-hk.com/cn/faq.php

:slight_smile:

但我最近3日腸胃炎,前2日係食咩都肚瀉,但無嘔,而且2日距離食完藥有至少12小時先肚瀉,到今日我終於無再肚瀉,睇埋醫生食埋藥

仲想請問:
1)我習慣零晨食避孕藥,而下晝開始食止瀉藥,會唔會影響當日避孕藥嘅功效?
2)如果係當日下晝唔好彩又瀉,零晨食嘅避孕藥嘅功效會唔會無咗?
3)當日男朋友無套內射,我睇紀錄經期嘅app話我4日後排卵,我知食咗避孕藥就唔會排卵,但我食感冒藥之類(無抗生素),會唔會降低避孕效果而令我懷孕?

等我逐一答返你嘅問題先 :blush:

(1) 照你所講嘅情況藥效係會正常發揮嘅,因為藥物通常喺服用後嘅2-3小時內身體已經完全吸收,所以唔需要太擔心 :relaxed: 不過如果服用嘅藥物係抗生素類嘅話,就有機會影響藥效。如果唔肯定醫生處方嘅藥物會唔會影響避孕藥嘅藥效嘅話可以事先同醫生講有食緊避孕藥 :blush:

(2) 同上一個情況一樣,因為藥物通常喺服用後嘅2-3小時內身體已經完全吸收,所以藥效係會正常發揮嘅,而且身體不適期間都建議多休息,盡量避免或減少性行為嘅次數 :relaxed:

(3) 一般非抗生素類嘅感冒藥係唔會影響避孕藥嘅藥效嘅,加上你有持續服用避孕藥,所以藥效係會持續嘅。不過都希望你明白無一種避孕措施係可以100%防止受孕嘅,所以即使喺避孕藥藥效正常發揮嘅情況下發生性行為,都依然有機會懷孕嘅。

好,唔該:smiling_face_with_three_hearts::smiling_face_with_three_hearts:

唔好意思,我又有問題,想再了解多啲:pray:t2::pray:t2:

我啱啱開始食避孕藥嘅時候,有輕微反胃嘅症狀,但去到第二盒中段,已經無反胃感覺(亦無任何出血、頭暈、頭痛、食慾增加、嘔吐嘔心,目前有嘅只有偶然胸部刺痛同體溫偶然升高),但我成日胃痛,我食藥嘅時候經常係配小食/飲品,而我本身係比較容易腸胃不適

想問:
1)我經常需要食藥(例如皮膚敏感藥/收鼻水藥/消炎藥)但我唔會因此出現胃痛,所以想知避孕藥會唔會導致胃痛?
2)我經常食無定時,有時一日只食一餐,胃痛成因會唔會因為本身飲食習慣,多過受避孕藥影響?
3)我有時性行為後會出現腹脹腹痛,幾日就無事,我知有機會係太激烈/子宮收縮,咁其實避孕藥會唔會導致腹脹或腹痛?

唔緊要架 如果妳有問題就問啦,我地都會盡力答你架:nerd_face:

你係食事前避孕藥有無徵詢過醫生嘅意見架?事前避孕藥並唔係全部人都食得嘅,因為唔同人嘅身體情況都有唔同,如果你之前有陰道炎、高血壓等等都唔適合食架。如果你無嘅話,其實建議你帶埋依家食緊嘅事前避孕藥去家計會或者私人醫生度檢查下。同埋如果你經常性要食藥嘅話,真係要去見下醫生,因為藥物之間唔同嘅成分組合都會有唔同,最好都係問過醫生先呀。事前避孕藥都有好多種,好多時未必你依家食緊嘅都啱你,特別你出現過咁多狀況,可以去睇下醫生,佢會幫你睇下你身體狀況比較適合食邊隻藥,有好多人都未必第一次就食啱藥,可能試幾隻先試到啱自己嘅藥架。:pleading_face:

逐個逐個問題嚟:

1)事前避孕藥其中一個副作用係胃痛,亦都有其他個副作用例如頭暈、頭痛、嘔吐、乳房腫脹等等,不過通常呢啲副作用都會係你身體習慣咗事前避孕藥之後,大概幾個月嘅時間就會消失。同埋建議你都係飲液體嚟送藥啦,最好係溫水呀。:slight_smile:

2)好似頭先事前避孕藥嘅其中一個副作用係胃痛,如果你之前嘅飲食習慣同依家都係一樣嘅話,而食咗事前避孕藥之後你先開始胃痛,咁大多數嘅原因都係因為避孕藥嘅副作用啦。都建議你食嘢食得盡量規律啲,因為其實事前避孕藥都需要你定時定候去食架,例如你今日10am食咗,第二日最好都係差唔多10am食,咁樣藥效可以延續落去。萬一真係唔記得咗食藥,係記起嘅時候就要即刻補返一粒,然後係第二日食開藥嘅時候再食一粒。如果你唔小心漏咗兩日無食到,就需要搵返醫生,睇下佢可以點樣幫你調整咁嘅情況。:blush:

3)的確,事前避孕藥其中一個副作用都係腹脹腹痛,但係佢係會持續咁樣痛,並唔會話次次都咁啱係你做完愛之後先出現,如果做完愛之後先出現,就真係好似你咁講,性行為太激烈,同埋性行為後子宮收縮引起架啦。亦都有機會係體位嘅問題,例如傳教士姿勢會容易啲壓到膀胱同下腹,可以用其他姿勢去代替,咁就比較容易避免性行為後疼痛嘅情況。另外,都可以係性行為期間用多啲潤滑劑,咁樣可以減少雙方係性行為過程中受到嘅摩擦,咁就無咁易受傷啦。都想知道你地平時性行為嘅時候會唔會都會有痛嘅情況?如果有嘅話,都可以嘗試轉換下角度,例如用枕頭墊高屁股再插入,嘗試下唔同嘅角度,搵到你地兩個都鍾意嘅姿勢。:wink: