下面硬係有啲空氣咁
郁到某啲特定位就會發出一啲放屁嘅聲音
我上網查過有可能係性行為導致
但係我從來冇發生過任何性行為
會唔會係鬆弛或者有咩病
好擔心
已經維持左好幾日
舉高個pat pat嘅時候會見到下面有個窿放大放細
放返晒嘅時候就會發出放屁嘅聲音
我想問吓如果真係鬆弛嘅話點樣解決
我得十幾歲咋
唔想咁快鬆弛
首先，其實整個陰道都係肌肉，係可以自主控制收縮同放鬆嘅，當然每個人嘅程度都唔一樣啦。你聽到個啲聲音其實係因為陰道內有空氣。
呢個窿其實就係你嘅陰道口，係連結住陰道嘅。除咗性行為，日常有好多動作都可以令陰道口擴張，令空氣進入，當你轉換動作或者收緊返陰道口嘅時候，就會將內裡嘅空氣排出，形成好似放屁嘅聲音，係一件好自然嘅事，唔需要太擔心。
而有關鬆弛嘅問題，其實正正因為陰道係肌肉組織，會變鬆弛同性行為係無直接關係嘅。就好似身體其他肌肉咁，日常有冇鍛煉都會改變肌肉嘅狀態，荷爾蒙嘅分泌亦有機會改變陰部嘅外觀同肌肉，而隨著年齡增長亦有機會變得鬆弛，呢啲都係好正常。一般女性陰道係生育後先會有比較明顯嘅鬆弛，始終嬰兒經由陰道分娩，對陰道肌肉嚟講係一次好大嘅擴張。其他情況例如性行為或者日常生活都係唔會靚肌肉變得十分鬆弛嘅。即使真係鬆弛，亦唔代表啲咩，其實都唔需要咁擔心呀。而改善方法，你可以試下做凱格爾運動。呢一組運動係透過反覆收縮同放鬆盆骨底肌肉，去強化膀胱肌肉、陰道肌肉同肛門肌肉嘅韌性。做法係嘗試收緊下腹部嘅肌肉，感覺會有啲似忍小便／大便，你會感覺到陰道口同肛門肌肉都緊緊咁受緊住，hold住30秒再放鬆，然後重覆。初期練習嘅時候可以按著自己嘅身體狀態去調節hold住嘅時間，例如由5秒開始慢慢適應再加強，每日練習嘅次數都要循序漸進，唔好強迫自己一下子就做好多下，有機會會出現反效果嘅。
見到你都成日會發問一啲同性器官有關嘅問題，感覺你都好想認識多啲基本嘅資訊，了解多啲自己身體嘅資訊。我哋下星期二會有一個網上工作坊正正就係關於性器官嘅，到時我哋會詳細講解性器官嘅構造、常見迷思同埋正確嘅清潔方式。如果你都有興趣，不妨考慮下報名參加，暫時仲有少量名額嘅。
詳情及報名：https://forms.gle/gj6e1TS665u9hbbC8
內容簡介：
糖不甩 Sticky Rice Love on Instagram: "《糖不甩 網上工作坊 2020》【7月份】小測驗！🍡💻🤓 宣傳咗大概一個星期，都陸陸續續收到各方朋友反映，覺得【7月份】入門級嘅網上工作坊主題好似「太簡單」，小學中學上堂都好似學過下差不多嘅知識（例如性器官結構、多元性向／別），應該無咩需要再學多次，打算之後中級／高階嘅工作坊先再考慮參加。🤔 不過，根據我地過往嘅工作經驗，有時越認為理所當然會知道嘅知識，反而未必每一個人都好清楚知道🤓哈哈，有見及此，我地小編們就打算出個小測試，整合過往工作中遇見過嘅問題，睇下你地識唔識答啦！😈😈 如果你內心對以下題目嘅答案都係有啲疑惑，咁就歡迎你地報名參加我地今次嘅工作坊～ 🥰 不過如果對答案都充滿信心的話，都好期待之後更深入主題嘅工作坊會見到你地！！🥳👏🏻👏🏻 1. 【性器官及清潔🚿】（21/7） － 清洗陰莖係咪簡單沖一沖水就乾淨？ － 「處女膜」係咩黎？係咪一定第一次性交會「穿」？ － 下體痕癢 / 分泌物有異味，係咪一定感染咗念珠菌？ 2. 【多元性向／別🌈】（28/7） － 「性傾向」係咪就係指我鍾意咩類型嘅人？ － 男性鍾意睇GV，係咪代表佢就係同性戀？ － 有無機會我情感上係被一個性別吸引，但係生理上係被另一個性別嘅人吸引？ 報名及詳情：https://forms.gle/gj6e1TS665u9hbbC8 【Bio有link去我哋網站，一入去就會見到報名連結】 #如果你都好奇以上嘅答案 #咁就記得報名參加我地嘅網上工作坊啦😍 TEXT + GRAPHIC: SZE ——————————————— 糖不甩｜性教育｜網上性健康平台💛 對性/性別/關係...有疑問？想搵人傾下？ 糖不甩討論區隨時ready答你問題！識揀，一定揀糖不甩！ Discuss.stickyricelove.com #stickyricelove #糖不甩 #stickypediasextoys #sexeducationhk #性 #性教育 #gender #relationships #sex #sexpleasure #性歡愉 #hksex #hklove #hkboys #hkgirl"
https://www.instagram.com/p/CCdSeN4jATJ/?igshid=e31u1frnaayf
唔該曬你