咁樣會唔會懷孕

女朋友嘅經期好唔穩定,之前試過隔2個月先黎m,而佢最近個次係喺7月14號黎完。而我地喺7月18嘅時候我將我嘅陰莖磨擦左佢下面3到4下,但係嗰時我唔係好清楚我有冇啲前列腺液體岀黎,但係我好肯定我冇插入去,我都冇射精喺佢身體度,而女朋友係處,我想問咁樣會唔會令到佢懷孕

Hello @nike :blush: 陰莖性興奮嘅時候,已經會分泌出透明嘅尿道球腺液,內含少量精子,有機會導致懷孕。雖然你過程中,陰莖並無插入過陰道內,導致懷孕嘅機會係比較低,但係因為都有直接接觸過陰道口附近嘅位置摩擦,所以過程中,尿道球腺液都有機會流入陰道內,依然係有機會出現懷孕嘅風險。

同時,因為你女朋友嘅經期向來都唔太穩定,所以我地都唔能夠透過推測佢預計嘅排卵日係邊一日,去判斷懷孕嘅風險高唔高 :pensive: 而且安全期避孕法本身嘅避孕失敗率都比較高,即使選擇使用呢種避孕措施,亦只適合(/建議)月經週期正常、能夠正確推算安全期、無其他較適合避孕措施可供選擇嘅人先好選用,過程中亦需要額外持續每日量度基礎體溫,先能夠提高安全期避孕法嘅成功率。所以,都唔建議透過推測「排卵期/安全期」去發生唔安全嘅性行為:blush:

你文中有提及到女朋友係「處女」,但係都想提醒番,處女膜係一個結締組織,其實本身都有洞,可以讓月經流出黎。亦即係,任何分泌物都有機會可以透過洞流入去陰道內。所以不論處女膜有無穿到,其實尿道球腺液/精液,依然係有機會透過處女膜本身嘅洞口,流入陰道內導致懷孕。

因為以上嘅原因,加上距離18/7嘅性行為未夠120小時,依家都建議女朋友儘快去家計會,諮詢醫生意見,睇睇有無需要服用事後丸(最長服用時限為120小時):woman_health_worker:t2: :man_health_worker:t2:事後丸有分兩種,「單一荷爾蒙(黃體酮)」的話,最長服用時限為72小時內,呢款事後丸服用最遲,失敗率就會越高。而「黃體激素受體劑」,最長服用時限為120小時,呢款服用時間就唔會影響事後丸嘅失敗率。提醒番,喺香港事後丸係醫生處方藥物,暫時除左家計會之外,就只有於普通科門診/婦科診所/急症室睇過醫生,先會能夠攞到。

詳情可以睇睇家計會嘅網站:

同時建議性行為11日後(29/7)進行驗孕,到時結果會比較準確同埋可靠。因為受精卵一般著床需要6-9日,所以如果好擔心的話,性行為7日後(25/7)驗孕,都可以有一個初步嘅結果啊。:relaxed:

最後,之後發生任何親密接觸/性行為,都要記得整個過程帶番安全套,一方面避免懷孕嘅風險,另一方面都可以減低性病傳播嘅風險啊~ :wink: