急!求解答!

想問如果半個龜頭插入陰道 會唔會有機會懷孕?洗唔洗去食事後丸?

有無人可以答下我:sob:我真係好驚好擔心

Hello @Kintexxx :blush: 陰莖性興奮嘅時候,已經會分泌出透明嘅尿道球腺液 ,內含少量精子,係有機會導致懷孕。因為你提及到性行為嘅過程中,陰莖龜頭嘅部分係有進入陰道內,所以尿道球腺液係有機會過程中直接流入陰道內,係有導致懷孕嘅風險啊。

想了解番,你所指嘅性行為,係幾時發生嘅? :grinning:

因為如果依家距離果次性行為係未夠120小時,都 建議儘快去家計會,諮詢醫生意見,睇睇有無需要服用事後丸(最長服用時限為120小時):woman_health_worker:t2: :man_health_worker:t2:事後丸有分兩種,「單一荷爾蒙(黃體酮)」的話,最長服用時限為72小時內,呢款事後丸服用最遲,失敗率就會越高。而「黃體激素受體劑」,最長服用時限為120小時,呢款服用時間就唔會影響事後丸嘅失敗率。提醒番,喺香港事後丸係醫生處方藥物。除左家計會之外,都可以選擇去普通科門診/婦科診所/急症室睇醫生攞事後丸 :relaxed:

事後丸嘅詳情,可以睇睇以下家計會嘅網站:

不論依家距離該次性行為夠唔夠120小時都好,都建議性行為11日後進行驗孕 ,到時結果會比較準確同埋可靠。因為受精卵一般著床需要6-9日,所以如果好擔心的話,性行為7日後驗孕,都可以有一個初步嘅結果啊。:relaxed:

最後提醒番,之後發生任何親密接觸/性行為(不論有無進性插入式性行為),都要記得整個過程帶番安全套,一方面避免懷孕嘅風險,另一方面都可以減低性病傳播嘅風險啊~ :wink:

因為琴日係第一次:see_no_evil:所以插入左少少就已經好痛所以無再入 一路都係陰道口徘徊
想問咁樣做懷孕機會大唔大?如果唔食事後丸會唔會好大機會懷孕:sob:

睇你嘅情況,陰道口徘徊嘅過程間,其實尿道球腺液都有機會流到入陰道內,所以都係整個過程其實都係有導致懷孕嘅風險。當然相比精液,尿道球腺液內含嘅精子係少好多。但係因為要導致懷孕,一條精子就已經可以,所以我地都無辦法確實話俾你知懷孕嘅機會大唔大,只能從機率話你知會比精液直接射入陰道低。 :pleading_face:

當然服唔服用事後丸,係你個人嘅選擇。 :blush: 有部分人會覺得尿道球腺液導致懷孕嘅機會咁低,好似無咩必要一定要服用事後丸,所以選擇唔食,驗孕之後萬一有左再計劃。不過要顧慮嘅就係,萬一真係懷孕,自己係咪有能力負擔,還是會選擇終止懷孕(需要兩位醫生同意,而終止懷孕手術亦有一定程度風險及副作用)。但係亦會有一部分人覺得自己連少少會導致懷孕嘅風險/可能性都唔希望有,所以覺得機會再細都會選擇食左事後丸先,等自己放下心頭大石。

同埋即使係第一次發生性行為,只要有直接接觸到性器官都有機會導致懷孕啊~ 因為陰道冠(處女膜)並唔係一個完全封閉嘅組織,所以不論陰道冠有無「穿」,尿道球腺液/精液都能夠透過陰道冠嘅洞口,流入陰道內。基於呢個情況,無論係第幾次發生性行為,只要無做好安全措施,都係有機會導致懷孕,或者有感染性病嘅風險。 :blush:

距離服用事後丸嘅最長時限(120小時),都依然有少少考慮嘅空間,你都可以平衡一下個人嘅能力同埋懷孕風險,再決定下一步想點行啊。 :relaxed:

同埋想問下 如果係佢想插入之前已經射過一次精 係前列腺液入面嘅精子數量會唔會有唔同?同埋精子嘅活動力會唔會相對無咁勁?

同埋琴日係受孕期第一日 咁樣會唔會增加左懷孕機會?

尿道球腺液之所以含有精子係因為尿道入面可能殘存左前一次射精時遺留嘅精子,所以當尿道球腺液經過尿道排出再進入陰道嘅時候,就有機會將精子帶入陰道。所以如果性行為之前射過精嘅話係有機會增加尿道球腺液內精子嘅含量嘅,而精子喺有精液保護下,同埋未接觸空氣之前原有嘅活動力係唔會受到影響嘅。

另外,排卵期嘅時候進行性行為的確有機會增加懷孕嘅可能性,不過因為經期本身係會受好多唔同因素影響,例如生活習慣改變、心理壓力大、生病服食過藥物等等,所以除非每日用排卵測試棒check住,如果唔係好多時都要等到月經黎嘅時候先可以推算返排卵期嘅確實日子。

如果係插入之前抹過一次D液體走 咁會唔會減低左懷孕機會?因為插入左之後只係維持左2-3分鐘就無再接觸到:sob:

因為男性受到性刺激嘅時候會自動分泌尿道球腺液,所以即使插入前抹走左啲液體,性行為期間都有機會自動分泌而男方係未必感覺到嘅。好似 @Sze_StickyRiceLove 咁講,因為一條精子就已經可以懷孕,所以即使插入嘅時間唔長,我地都無辦法確實話俾你知懷孕嘅機會大唔大,只能夠從機率話你知會比精液直接射入陰道低。如果真係好擔心懷孕嘅話,你地可以考慮下需唔需要去睇醫生拎取緊急避孕藥 :blush:

好呀 唔該曬你 我想問如果去家計會拎避孕藥 係咪直接行入去就拎得:thinking:同埋佢會問D咩
仲有想問食事後丸會唔會傷身:see_no_evil:

去家計會拎緊急避孕藥嘅話係必須先經電話預約嘅,如果你係二十六歲以下嘅未婚人士嘅話,可以去家計會嘅青少年保健中心 (聯絡資料可參閱: https://www.famplan.org.hk/zh/our-services/clinic-services/youth-health-care/location);如果係26歲以下嘅已婚女性嘅話,就可以去家計會嘅節育指導診所 (聯絡資料可參閱 https://www.famplan.org.hk/zh/our-services/clinic-services/birth-control/location)。

至於緊急避孕藥嘅副作用主要有頭痛、噁心、頭暈、疲倦、經痛、腹痛、背痛、乳房脹痛等等,依啲情況出現與否係因應唔同人嘅體質而異嘅,而且一般情況下,依啲副作用係唔會持續超過廿四小時嘅 :blush: 另外,服食緊急避孕藥之後有機會令下一次月經比預期提早/延遲幾日黎,或者血量會有所轉變,所以如果服藥後發現依個情況都唔需要太擔心 :relaxed: 不過如果月經比預期遲左超過兩個週期黎嘅話,就建議睇醫生了解係返身體狀況 :man_health_worker:t2: :woman_health_worker:t2: 而家計會本身應該都會約你一個月後返去覆診同驗孕,以確保緊急避孕藥嘅藥效有正常發揮 :blush:

因為緊急避孕藥含有高劑量嘅荷爾蒙,副作用較大,亦唔係每個人嘅體質都適合服食,所以建議同伴侶商量下之後會採用邊種事前避孕方法,咁性行為嘅時候就可以安心啲啦 :smiling_face_with_three_hearts: