好擔心hsv II傳染俾男朋友

一直都安份守己,就算以前同男朋友做都有採取安全措施,但直至有一任有一次冇戴套,後來知道原來佢同好多個女仔有個親密關係,一直都好擔心所以keep住驗,亦唔夠膽同其他人拍拖。空窗期已經過咗好耐,就當擔心就嚟完嗰陣,但係就發覺自己有hsv II,但呢一年我從來都冇同人有任何性行為,淨係有一次因為唔舒服去咗公廁,可能唔乾淨嘅關係我病咗兩個禮拜,知道咗真係好崩潰。後來睇婦科,醫生話除咗復發嗰陣之外,生活上其他嘢都冇特別需要留意。直至識咗呢個男朋友,我一直都唔敢同佢講,但最近真係忍唔住同咗佢講,我哋大家都好崩潰,我哋仲未有性行為,但係就好擔心緊口水會唔會傳染?我好想要情緒支援。

Hello @Hang :relaxed: 首先,都想了解一下,你當時驗到HSV-2,係同前度男朋友發生最後一次性行為之後,隔左幾耐進行嘅檢驗?同埋係邊度進行測試嘅?例如係自己屋企使用self test kit測試,還是去機構/衛生署社會衛生科/其他化驗所進行測試?

因為HSV-2嘅性病檢測係有分兩種測試IgG測試同埋IgM測試

一般都會幫你先做IgG測試,去睇你有無感染HSV-2病毒。呢個測試一般最少需要4-6星期空窗期,先能夠進行檢測。如果於空窗期內進行測試,係有機會出現false-negative嘅結果。呢個測試,最長可能需要4個月,先會有足夠嘅病毒量去出現準確嘅測試結果。當時如果過早進行測試的話,可能會因此未有出現感染HSV-2嘅結果。亦能夠解釋到點解之後再測試,先會發現感染左HSV-2。

IgM測試方面,一般如果IgG係positive,而IgG強度係高於正常值4倍,都會建議你做呢個測試,目標係睇病毒係咪近期感染嘅。於感染病毒7-10日後,就能夠測試到自己有無感染HSV病毒。但因為IgM抗體會於感染病毒兩星期後,數量開始下降,所以太遲檢測的話,就唔會從IgM測試中得知自己有無HSV病毒。不過,如果你只係做IgM測試,就會有機會面對到IgM測試嘅限制,就係有機會出現false-positive結果,因為佢無法分辨你係感染HSV-1還是HSV-2病毒,有機會你感染嘅係HSV-1(口唇皰疹)。同時如果你當時身體係有感染其他病毒,例如EBV、VZV、CMV,都有機會令你出現false-postive嘅結果。

所以綜合以上嘅情況,假如你係(1)同前度男朋友距離最後一次性行為之後,相隔4-6星期後,進行過IgG測試,而結果當時係negative:證明HSV-2病毒並非從前度男朋友身上感染,過往亦無感染過HSV-2病毒;(2)呢一年期間並無發生過任何性行為:證明呢段時間並無感染HSV-2嘅可能性;(3)驗出HSV-2病毒時嘅測試,有機會係IgM測試,或者係屋企自己驗的話:有機會測試過程中出錯/係感染HSV-1病毒,咁都好建議你再去社會衛生科/其他化驗所再次測試一次,再進行一次詳細嘅IgG測試一方面睇睇確認係咪真係有感染HSV-2病毒,另一方面都能夠撇除感染HSV-1病毒嘅可能性:relaxed:

不過,如果你係喺可靠嘅機構進行過IgG測試,亦真係證明你感染到HSV-2病毒的話,都無需太擔心嘅。正如醫生所講,生活上並唔會有特別需要留意嘅地方。因為HSV-2係能夠透過服用抗病毒藥物,或者透過搽局部抗病毒藥膏,去控制症狀。正如上文提及過,HSV-2病毒,一般只能夠透過親密/性接觸,所以只要同男朋友發生性行為過程中有戴好安全套,就無需擔心會令佢感染到HSV-2病毒。當然日常嘅親吻,或接觸到對方口水嘅情況,都唔會有傳染HSV-2病毒嘅風險啦,可以放心啊 :relaxed: :two_hearts: