我男朋友好大食，差唔多每日一次，但我就不嬲好細食，細食到我想佢搞我。
我生完bb就開始性冷感，到依家年半，我都成日拒絕佢，有時候一個月先一次。
上個星期，佢問我：如果佢出去搵sp，我介唔介意。
我答：唔介意，因為我根本滿足唔到佢。
我嘅諗法係：男人想做愛係件好正常嘅，只要唔好整到sp懷孕就OK。
不過講就講唔介意，但點會真係唔介意⋯
琴日佢突然之間話：佢唔會出去搵sp，我好開心。佢仲拿拿聲叫我入紙結婚。
但今日比我見到佢Twitter搵其他女人文字性愛，個感覺怪怪地。
男人想屌其他女人係咪正常？佢有時候返工會睇av/入廁所打飛機⋯
不論性別，人有性慾都係一件平常嘅事。不過就好似食慾咁，每個人嘅需求都唔一樣，但唔一樣並唔代表有問題。
生完小朋友之後，因為懷孕過程體內荷爾蒙有過好多變化，對性嘅慾望有改變係好正常嘅。小朋友出生之後頭幾年都好需要照護，家長會將生活重心、時間、精力都集中係小朋友身上，呢啲都係好平常嘅情況嚟，無需要為此而覺得內疚或者自責。不過即使無生小朋友呢一件事發生過，係關係入面兩個人對性嘅期望同需求有分歧都係好常見嘅事，亦可以透過好多辦法去解決。例如以非插入式性行為代替，可以由你為伴侶口交／打飛機、可以係陪伴對方係AV自慰、係有共識之下亦可以考慮開放式關係／尋找性伴侶等等。無論係選擇咩方案，首要條件都係雙方要坦誠地為呢件事溝通，講清楚自己而家對性嘅需求，對伴侶嘅期望，再一齊去磨合。其實伴侶都嘗試過好直接地就尋找SP問過你意見，而當時你係回應佢話你唔介意。係呢個狀態下，伴侶會認為你係同意呢件事，亦唔會有唔開心嘅諗法。其實如果你係介意，應該直接同伴侶分享你嘅諗法同擔憂，而唔係扮唔介意，因為咁樣做會令伴侶有錯覺，亦唔會知道你心入面係唔喜歡呢件事嘅。對方係Twitter上尋找性伴侶sexting（文字性愛）嘅動機都係為咗解決性慾，而佢亦覺得呢個行為係你所同意嘅。
你亦要諗下自己覺得介意嘅原因係因為 1）完全接受唔到伴侶搵其他SP 2）因為唔了解SP嘅身份 定係有其他原因。例如係因為（2）嘅原因，係咪伴侶交代清楚對方嘅資料你就會覺得安心啲，甚至係被你觀察佢同SP交流嘅過程，會唔會令你覺得可以接受。
不如搵個嘅機會同伴侶再就呢件事傾一次，坦白去講你嘅感受，俾佢知道你理解佢嘅需要但你呢一刻接受唔到佢透過其他人去解決性慾。試下講清楚自己嘅界線，有咩係接受到，有咩係接受唔到，再搵一個你哋兩個都覺得合適嘅方法去解決呢個問題。例如如果伴侶覺得文字上嘅刺激都係足夠嘅，可以試下您地一齊搵啲網上色情小說去睇，等你都有參與到呢件事。亦都可以考慮同伴侶一齊選購適合佢使用嘅性玩具，等佢自己都可以滿足到性需要。
另一方面，雖然身手媽媽有好多事情要兼顧，好容易會忽略咗自身嘅需要，不論係精神上、身體上、又或者性上面。係照護小朋友嘅同時都要好好照顧自己，試下搵一日請屋企人幫手照顧BB，俾機會自己休息放鬆一下，同伴侶單獨相處一下。叉足電先至可以長期作戰，繼續照顧小朋友架～
其實都有D矛盾，我滿足唔到佢，所以覺得佢搵SP冇嘢；但係我又唔想佢去搵，我覺得好似被帶綠帽咁。
我同佢傾過，佢話想去搵SP；我都有問過佢，如果你去搵，我都會去搵。佢反應都大。
始終我覺得，雖然男方為我付出好多，但無可能得我自己一個人乖乖留係屋企；點解你可以，但我就唔得。
最緊要係：我唔覺得佢會自律，真係搵一個就停，佢有講過後悔識我之前無真係出去玩過⋯
有一就有二，有二就有三⋯
搞到依家心理壓力好大，成日好似就癲咁。
Hello @bella522 
正如 @Kitty_StickyRiceLove 上文提及過，可以首先嘗試一下同伴侶講清楚自己嘅界線，有咩係接受到，有咩係接受唔到。有時透過向對方講述同埋反映自己嘅感受，你會能夠慢慢慢慢知道自己矛盾情緒嘅來源到底係黎自D咩野，再從彼此交流嘅過程中，了解雙方內心嘅需要。
例如可以分享自己其實理解佢想搵SP嘅需要，明白每個人嘅性需要唔同，自己未能滿足佢嘅時候，都尊重對方有權利尋找滿足自己性慾嘅方式。只不過，你亦都覺得一段關係之中，「專一」係一樣好重要嘅元素。倘若你伴侶真係去搵SP，你內心會有被背叛嘅感覺，亦都唔能夠放心對方搵完一次SP之後，未來唔會再搵其他SP解決性需要，希望對方能夠理解。就好似你之前都有同伴侶討論過去搵SP嘅時候，發現對方反應都大。可以嘗試下次氣氛合適嘅時候，問佢反應大嘅原因，點解會介意你都去搵SP，到底有咩感覺。
同埋，亦可以嘗試互相釐清你地對關係上嘅期望。 從文字中，都見到你都睇重一段關係中嘅「公平性」，假若對方能夠去做某一件事，你都覺得對方應該要容許自己去做番一樣嘅事情。可向伴侶表達你呢一個期望，並希望對方嘗試代入自己嘅角色，令對方理解一段關係中，並非只有佢有權利去限制自己嘅社交關係，而係互相都應該有一個彼此認同嘅社交關係空間，你希望擁有交友自由的同時，亦需給予對方相應的交友自由。
其他嘅可行性方法，建議可以同伴侶反映，性冷感係一般新手媽媽都會經歷嘅事情，而且係一個過渡性嘅情況，希望能夠同佢適時咁調整現時對性行為嘅期望（例如會唔會願意現時性行為時比較重質不重量，花多D時間互相交流或者前戲嘅時間增加、日常可以暫時以其他增加親密感嘅行為取代，如擁抱、互相撫摸、拍拖活動）。因為 @Kitty_StickyRiceLove 都有提及過，懷孕過程中荷爾蒙係由好多嘅變化。懷孕後，亦因為身體唔會即刻出現番月經，無排卵及荷爾蒙驅使之下，性慾亦都會降低。而生育後頭兩年，亦都因為需要滿足BB嘅需要（例如餵奶、給予BB安全感），令自己真係無多餘嘅時間同意欲去發生性行為。過程中，假如伴侶願意體諒，並且適時分擔照顧BB嘅生活大小事，其實都係幫緊你去減輕日常生活負擔及壓力，加快之後搵番性慾嘅過程。
而個人方面，都可以嘗試每日搵少少嘅時間，去休息一下，並照顧自己嘅需要。有空間嘅時候，都可以多D撫摸自己嘅身體，慢慢去感受番性方面嘅快感、愉悅嘅感覺，希望能夠幫助你之後建立番發生性行為嘅興趣及慾望。
或者可以睇睇以下嘅YouTube影片，係講產後慢慢尋找番性慾嘅經歷 
希望你可以搵到共鳴，或者當中搵到合適你同伴侶之間嘅解決方法～
《產後沒有性生活？如何解決性冷感！｜Sally’s Toy》：
暫時見到其實男朋友都重視你嘅想法，並且係鍾意你嘅，所以願意提出同你入紙結婚，同埋肯同你分享自己內心嘅慾望及想法（考慮過出去搵SP）。希望透過多D坦誠嘅溝通，可以幫助你地去搵出一個雙方都覺得舒服嘅方法啦