好驚令女友懷孕

琴日同女友第一次進行性行為(口交),途中大家沒有著衫。純粹大家幫大家含過,冇射精,更沒有進入個陰道,suppose 佢7月24日黎m(之前佢都試過遲7日內),大家睇到上網睇前列腺液有精子個問題,就大家都驚會唔會唔覺意High到落陰毛度,再去陰道呢,唔知,好亂,可唔可以解答下。

我都幾肯定我冇刻意同女友有任何磨擦,或者將下體放係佢陰部附近

有冇人可以答下我:sob::sob::sob::sob:

Hello @szeho1008 :blush: 因為見你提及嘅過程中,並無發生過直接嘅插入式性行為,同埋下體亦無摩擦女朋友嘅性器官部分,或者接觸陰部嘅附近,所以導致懷孕嘅機會係近乎零嘅。

無錯啊,的確陰莖性興奮嘅時候,係會分泌出透明嘅尿道球腺液,內含少量精子,係有機會導致懷孕嘅。不過睇到你嘅情況,即使過程中陰莖性興奮嘅時候,有分泌少量嘅尿道球腺液,可能當中唔覺意「high」到女方嘅陰毛或者皮膚,但係因為尿道球腺液暴露於空氣嘅過程中,其實幾分鐘內都已經會乾透,接觸皮膚嘅表面亦會加速分泌物乾透嘅速度,而尿道球腺液乾透嘅時候,內含嘅精子亦會同時失去活動能力,所以過程中能夠成功從陰毛/其他皮膚位置,再流到陰道口及陰道內嘅機會率係好微,可以放心~ :relaxed: :relaxed:

其實月經來遲可以有好多原因引起,一般較常見嘅因素,包括情緒有起伏、壓力過大、生活作息唔規律、飲食唔均衡、最近有生病並服用藥物(特別係抗生素)等,未必一定係懷孕所引致嘅。 :blush: 加上過往女朋友都試過遲7日內先黎月經,依家只係遲左3日,都可以耐心等多幾日先啊~

同埋提醒番,如果口交過程中,其中一方嘅口腔內有損傷,係有機會透過傷口接觸對方下體體液嘅過程中,傳染到性病病毒。所以建議口交嘅時候,可以考慮使用口交膜(Dental dam)/安全套作阻隔,減低性病傳播嘅風險 :blush: :relaxed: 同埋如果日後唔想好似今次咁擔心,下次依然發生任何親密接觸(即使無發生插入式性行為)嘅時候,都建議番整個過程都戴好安全套,咁就一方面可以減低導致懷孕嘅風險,另一方面可以避免性病傳播風險啦~

有關口交膜嘅資訊,都可以參考我地以下糖不甩嘅文章~

《Stickypedia系列-安全性行為:第三寶》-口交膜及指套

Thank you 你呀:sob:
聽完你咁講,我都安心啲嘅。
因為琴晚都因為呢個問題訓唔著,諗左好耐。
有諗過如果女朋友有左會點或應該要做咩
同埋,唔知點解琴晚係有啲愧疚,因為如果有左,就好似令佢冇左好多青春咁。今日都有同佢拎返出黎講嘅,大家都覺得應該做多啲安全措施。短時間內都唔會有性行為住。女朋友都話只進行低風險性行為(戴套口交)。都唔知呢次好事定壞事,都正正係咁,同伴侶有左更多嘅了解。BTW,我打緊呢段回覆個時,女友話比我聽佢啱啱黎左M,總算放下心頭大石。

我仲問題想問,如果男性幫女性口交,市面上有咩安全嘅物品,保障到男性呢?

1個讚

啱啱先睇到你個修改:rofl::rofl::rofl:

1個讚

好欣賞你今次過程中,會顧慮到女朋友嘅感受同埋未來,同埋願意同女朋友一齊討論未來點樣喺性行為過程中,減低懷孕同埋性病傳播嘅風險~ :star_struck: :relaxed: :+1:t2:

女朋友黎左月經,都真係可以放心曬啦 :smiling_face_with_three_hearts: :two_hearts:

暫時男性幫女性口交,能夠保障到男性嘅產品,主要都係以上所提及過嘅口交膜,同埋安全套(可以剪開變成口交膜),呢兩樣都係能夠避免直接接觸到對方嘅體液,去降低性病傳播嘅風險。使用口交膜嘅同時,都可以配合水性潤滑劑一齊使用。將潤滑劑塗喺被舔果一方嘅性器官,然後再放上口交膜,咁就有助口交膜黏住私處無咁容易移位,而且更加貼服~ 同時,如果覺得隔左層膜,少左「味道」的話,都可以視乎個人喜好,加番自己鍾意味道嘅可食用(Edible/ Kissable)水性潤滑劑去增強個效果啊 :speak_no_evil::relaxed: :two_hearts:

而女朋友幫你口交嘅時候,都可以考慮使用口交專用安全套。口交專用安全套嘅特別之處,就係在於呢款安全套本身係無添加潤滑劑(因為一般安全套潤滑劑未必適合食用)~ 當然有需要的話,都可以好似上文咁,視乎自己嘅興趣去添加可食用水性潤滑劑啦 :wink:

*記得因為油性潤滑劑會破壞乳膠安全套嘅物料,所以安全套係唔可以配合油性潤滑劑使用啊 :bangbang: