覺得自己都好小氣

同男朋友一齊左幾個月
之前佢一路都有keep 住同ex既對話
最初我係想睇下佢有冇同朋友講我地去開房/爆房 所以我就係佢wts 對話度搵
結果見到有個女仔同佢講過,一睇我就知道係佢ex。
之後我就開始呷醋。但我又覺得自己好小氣因為其實都差唔多兩三年前既事;而且我同我男朋友一齊既時間又長啲。而我男朋友係岩岩一開始時都有同我講過架。
之後有時睇到啲時鐘酒店既post 就會幾嬲幾燥。覺得好唔開心。覺得佢第一次對象唔係我,可能會覺得ex好難忘,好鐘意佢。
好想同男朋友講,但又覺得自己好無理取鬧。
又唔知點同朋友講:confused::confused:
覺得呢個平台大家都好有愛又可以用一個感覺科學啲既說法去回應我:stuck_out_tongue_winking_eye:

你好呀 @M123456 :wave:t2: :wave:t2: :wave:t2:

我諗「佢一路都有keep 住同ex既對話」呢件事你都會好介意,再加上呢件事係喺你意料之外發現嘅事,除咗有啲不安,安全感突然之間無曬,仲有就係果種被人蒙在鼓裡嘅感覺。 :pleading_face:

雖然你可能口就話唔介意唔介意,想營造出「我係一個大方嘅女友」嘅感覺,但係好矛盾地,你又會好介意男朋友同佢ex嘅過去。 :nerd_face:

如果不斷係男朋友面前假裝唔介意,然後每次翻到屋企都係度自己炆自己嬲,最後個結果就係你永遠都放唔低呢件事,而係某日你地嘈交嘅時候,你或者有機會有可能會衝口而出講出呢件你介意咗好耐嘅事,最後呢件事會點樣影響到你地嘅關係,真係好難講架。 :pleading_face:

呢個時候你講出呢件事,連你自己都會感覺到自己係度無理取鬧緊,因為可能呢件事根本就同你地一開始嘈緊果件事無關。 :persevere:

你可以講出你介意呢件事,並唔係無理取鬧架,但係要表達得清楚同埋儘量唔好帶住嬲怒、妒忌等等嘅情緒去講,係講嘅時候都要避免用諷刺、試探嘅方式,直接了當咁講「我介意你同ex仲有聯絡」,又或者,你可以試下用「非暴力溝通」嘅方式講出你嘅感受。有四個步驟:

  1. 講出你觀察到嘅事件
  2. 表達感受
  3. 講出需要
  4. 請求

係講出自己觀察嘅時候,其實都要好小心,你要講嘅,係事實。例如「我見到你同ex有WhatsApp傾計」,而唔係「你同ex傾WhatsApp嘅時候用嘅emoji比起同我傾嘅時候多」。雖然兩個都係觀察嚟,但係好明顯後面果句就多咗啦,多咗比較,多咗形容,亦都多咗評論同指責。你係要講出個「行為」本身,而所講嘅果個行為係要無任何自己嘅判斷同埋任何正面或者負面嘅意思嘅。例如你可以講「我見到你____________ 」嚟表達你自己觀察到嘅嘢。

然後就係表達自己嘅感受,例如「我好介意,因為我覺得______ 」

講出自己嘅需要,「我係一個需要_________嘅人」

最後係請求,「你可唔可以______ 」

用咁樣嘅方法去表達,相信會令你同你男朋友嘅溝通會順暢啲。 :relaxed:

我睇到你打咗「覺得佢第一次對象唔係我,可能會覺得ex好難忘,好鐘意佢」,「覺得」、「可能會」呢啲字眼,睇落都係你自己係腦海裡面嘅舞台劇演出無數次嘅劇本嚟,或者你可以試下講俾佢知,問下佢,如果覺得好尷尬,其實可以寫低係一張紙上面問佢,好似中學傳紙仔嘅遊戲咁樣,俾啲時間佢,等佢都可以好好諗下先答你。有時候,慢慢考慮先答嘅答案,可能更加真誠同可信,並唔係快問快答先至係心果句架。 :face_with_monocle:

佢過去經歷嘅一部分或者你依然都會好介意,但係諗深一層,你可以做嘅,只係透過佢口中瞭解佢嘅過去,俾個機會你自己同埋佢,去一齊經歷佢以前無你係身邊嘅時光,睇下佢以前鍾意食啲乜,細個嘅時候鍾意玩啲乜,有過咩興趣,你地有無共同嘅地方。而其他嘢,就只係佢以前已經翻咗頁嘅故事。 :smiling_face_with_three_hearts:

@Kaleo_StickyRiceLove 多謝你既回覆
其實佢只係保留個對話,唔係keep 住同佢對話:crazy_face: 文字上表達出錯了! 所以溝通不停咁exchange information 好重要。如果唔係就有誤會,自己係咁諗。
我諗我更加深左我同佢ex既比較一嚟我真係都仲介意佢一啲既過去,二嚟當時佢分手時好唔開心,又一路保留啲相同對話。令我覺得佢好難忘呢段情。
但其實我都唔係好清楚自己需要啲咩! 呢件事又唔係目前發生,又過左一段時間。
都唔知點表達自己好。
其實我都有就呢件事同佢講過唔開心,但我每次都係用wts去表達去講,當面既時候我講唔出口。佢都好緊張即刻打左比我架。
佢有同我講 佢好在意我,佢話同我一齊之後冇再睇,佢即刻刪晒。
一直我都用好沉默咁聽佢講,回應既時候我都有話 我明白之間分手時會好掛住,想睇返既心情,我都有。:cry::cry::cry::cry:
佢就都好appreciate 我但係我其實冇表達到自己內心聲音…

我見到你覺得好介意,好多時候都係將你自己同男朋友嘅ex比較,係你心裡面有個秤,覺得男朋友嘅ex好過自己。咁你可以諗吓,如果呢場比試,你贏咗,或者輸咗,結果會係點?輸咗俾你男朋友個ex,佢係咪就會搵返佢ex啦?贏咗係咪你同男朋友就一生一世永不分離白頭到老啦?如果輸咗贏咗都唔重要,咁呢把秤嘅作用係為咗咩? :thinking:

其實好可能你係呢段愛情裡面,都係處於好自卑嘅狀況,好驚對方會離開,好驚自己唔夠好,好驚失去呢段關係。好好奇係咩原因令你自卑?係以前嘅經歷?定係好多時都無乜自信?定係其他原因? :face_with_monocle:

如果係前者,你可以選擇同你男朋友分享呢段經歷,同佢表達你嘅不安同埋擔心,再講出你嘅需要同請求。如果係後者,可以去探索自己,認識下自己,究竟你係一個咩人,或者會無意中搵到一個連你自己都唔知嘅優勢呢。 :wink:

同埋要學習接受自己嘅不完美,因為無一個人係完美嘅,而每個人都係獨特嘅,唔需要同人地比較架。 :blush:

你話「但其實我都唔係好清楚自己需要啲咩!」,咁你就要努力啲去搵下自己需要啲咩啦,因為如果你唔知自己需要啲咩,對方無論做乜都好,你都唔會覺得滿足,咁樣嘅話,對方會覺得好攰架,因為做咩都唔啱你心意。或者可以問自己呢個問題:「你覺得男朋友嘅ex對於你嚟講係乜嘢嚟?又或者你所認識嘅佢(男朋友個ex)係點樣架?係咪完全認識呢個人?」 :cowboy_hat_face:

搵到自己嘅需要係你嘅任務嚟架,因為呢個得你先知道架咋,對方唔會估到架,知道嗎? :pleading_face:

每個人係失戀之後都會唔開心,呢件係平常不過嘅事嚟。係呢個時候亦都會回想以前開心嘅時光。好似你唔見咗手機都會覺得唔開心,都會諗起手機裡面有好多好重要嘅嘢,同埋手機裡面果啲相。

更何況你男朋友係失去咗一段關係。

或者想像你自己變成你男朋友:你以前有一段關係,已經過咗去啦,你都諗住move on 啦,重新開始咗一段關係。對方話唔鍾意你留住ex嘅對話,即使你好想Keep,畢竟呢啲都係你生命故事裡面嘅一部分,但為咗呢個伴侶,為咗呢段關係,你比較過之後,選擇將呢啲承載住你自己故事嘅WhatsApp對話delete,你覺得無所謂,因為眼前嘅呢個佢更加重要,你更加顧及呢個人嘅感受。你一再保證對ex已經無感情,唔會再聯絡。亦都做咗好多嘢,俾好多安全感對方。但係對方好似一直都好在意,成日都會好唔開心,咁呢個時候,你會選擇點樣做? :thinking:

似乎乜都做唔到,因為呢一段過去你無辦法抹得走,已經成為咗過去,除非你可以坐時光機穿越返以前抹掉呢份記憶,或者用科技將呢份記憶永久刪除。 :laughing:

有時試下當自己係對方,都係一個幾好嘅方法去瞭解對方嘅情況,同埋考慮自己嘅需要。

我覺得《Frozen》唱得幾好:

Let it go, Let it go

Can’t hold it back anymore.

Let it go, Let it go

Turn away and slam the door!

兩個人嘅關係就好似手中嘅流沙咁,你越捉得緊,佢就流得越快,反而你放開拳頭,用手輕輕咁兜住佢,你就能夠留住啲沙。 :beach_umbrella:

你有過去,佢都有過去。當時嘅佢的確係好愛佢嘅ex,但係依家嘅佢已經唔再重視個ex啦。佢依家重視嘅人係你,有時有啲過去,就Let it go 啦,因為真係 Can’t hold it back anymore架。你男朋友都可以Turn away,咁你又可唔可以slam the door,向住你地所嚮往嘅將來前進呢? :couple:

@Kaleo_StickyRiceLove
我係度諗…我好需要男朋友既愛同肯定。係我哋既對話當中,我了解到佢ex比左好深刻既回憶,無論係性或是相處之道。
需要日常中,佢都有時常話有過之前既反效果,佢知道佢需要既伴侶係好似我咁。
但唔知點解對我好似沒有太大既說服力… 我諗我都需要信任我既男朋友。
我諗係我心目中,佢既ex同我有啲好大既出入。佢比我既感覺係一個好有自信,好有信心既人。
我相信以前既經歷都會令我係關係上減少自信,由細到大係屋企都成日比人鬧,同拍拖都成日比人鬧,話我除咗佢冇人中意,都係因為覺得我可憐先中意我,先同我一齊生活。
但我反思返,我係我男朋友從來都冇過呢種角度去睇我。
我會學習一下放低…雖然我都覺得好無奈,自己有種控制唔到,有時有莫名火,有時又有啲妒忌…

每個人嘅成長過程都會直接影響到對於親密關係嘅睇法架,好似你所講屋企人對你嘅態度,甚至以往其他拍拖時經歷過嘅事,除咗會影響你對自己價值嘅睇法,亦會直接影響你對「最完美嘅愛情」嘅睇法。以前發生過嘅事並唔係可以一時三刻就放下,亦無可能可以好似粉筆字咁抹咗去,雖然唔係開心愉快嘅經歷,但睇得出而架嘅你都會反思到其實自己並唔係咁「無價值」或者「不值得被愛」,而依家男朋友亦都好努力嘗試令你感受到感情關係嘅信任。

好多時我哋一發現自己有情緒都會好自然想掩飾,或者覺得表達情緒就等於發脾氣或者傷害段關係,但其實有情緒並唔係一件壞事,亦係好重要嘅事。因為情緒直接反映到自己有啲需要無被滿足到,亦係可以了解自己心底諗法嘅好機會。當然有情緒唔代表要即刻毫無保留,毫無修飾地發洩出嚟,能夠用一個合適嘅方法表達自己嘅情緒,都係成熟同埋尊重伴侶嘅表現嚟。好似上面 Kaleo 所講嘅非暴力溝通方式,都係一個有助你明確向伴侶分享自己諗法同需求嘅做法。

一段健康嘅關係應該雙方地位都係平等,大家都有同等嘅權力去表達自己所想,同埋講出自己嘅諗法。雖然以往嘅關中你可能好少有機會可以講出自己嘅感受同需要,甚至係一個比較卑微,淨係聽從對方指示嘅角色。但而家呢段關係同以前嘅唔一樣,男朋友願意同你開放溝通,願意聆聽你嘅需要。佢都會希望你慢慢成為對自己有自信,能夠勇敢講出自己需要嘅人。無論係妒忌定係嬲,呢啲都係你真實有嘅感受,都係值得被重視嘅。你可以一方面慢慢令自己重拾自信,同時間亦比多啲空間自己表達自己嘅情緒,用一個非暴力、唔係為咗情緒勒贖對方嘅方式向伴侶分享你嘅感受,令大家都越來越了解雙方嘅需要,再去磨合。

要記住,而家嘅你唔再係好似以前咁係壓逼性嘅關係入面,你嘅存在並唔係因為其他人而有價值,你本身就係值得被愛嘅個體!