過唔到俾人嚼完鬆

最近同男朋友分咗手 勁快被分手 每次同佢見面做嘅事就只得性 當咁樣分手之後 我覺得自己好污糟 好似做咗人哋發洩性欲嘅一樣野 最重要一樣野 俾佢搞完之後 我下體好似有d問題出現 分泌物出現異常 陰道口有痕癢 而家個心好過唔到呢個關口 而家變得好憎佢 我唔知道應該點做好…

你好呀 @Feelingbad :wave:t2:

其實除咗性病之外,其實陰道炎、尿道炎等等都有機會令你分泌物有異常同埋有痕癢嘅,但呢啲都唔係性病嚟。 :blush:

不過如果你同佢性行為無戴安全套,同時陰道有痕癢同埋陰道分泌物有異常嘅話,你有覺得唔安心,擔心感染咗性病,你第一件事要做嘅,就係去做性病檢查,你可以去家計會或者社會衛生科預約檢查。 :pleading_face:

絕大部分嘅性病其實都有得醫而且大部分都可以醫到斷尾,所以你可以去檢查咗先,俾醫生去判斷你嘅情況。另外,如果你係性行為嘅時候並無使用其他避孕措施,建議你可以同時驗埋有無懷孕。因為無使用任何避孕措施嘅性行為懷孕風險係好高嘅,你可以買驗孕棒嚟試下驗,最早可以喺性行為嘅7日後驗出初步結果,而喺性行為嘅11日後驗出嘅結果就係非常準確嘅,所以你可以按照你對上一次無採用避孕方法嘅性行為嘅日子去計算返驗孕有效嘅日子。

就咁睇你文字所講,似乎都感覺的你嘅失望、心碎、被遺棄、失落…正如你所講:「我覺得自己好污糟 好似做咗人哋發洩性欲嘅一樣野」你討厭自己嘅身體,覺得好唔應該,亦都怪責自己。 :pleading_face:

但係,你無錯架,你用心去愛一個人呢件事本身無錯,而當你陷入愛情嘅時候,的確會忽略咗其他嘅因素,你嘅眼中只有佢,為咗佢,你可以付出好多嘢。 :pleading_face:

只係呢次你遇到嘅呢個人同你嘅諗法並唔一樣,同你一齊只係為咗性,更加因為佢而身體出現咗問題,你「而家變得好憎佢」我都非常理解。如果你覺得實在無辦法原諒佢,咁就依照你嘅心而行啦。我地係人生之中會遇到好多人,並唔需要關注全部嘅人,你可以選擇唔鍾意一啲人,其實都無錯架,如果係呢一刻你覺得唔能夠原諒,你有權利可以唔原諒佢,唔係所有人都值得你去原諒嘅。 :wink: