有小小疑惑

你好呀 我有小小疑惑
我15/7同男朋友進行咗次安全性行為 有帶套內射
但佢射完後無即時出嚟 而喺入面留咗陣
我17/7有m come 想問會唔會有機會懷孕?
補充一點係我喺心到行為前係feel到自己即將會嚟m (感覺到胸漲痛同小小腹痛)所以其實性行為嗰日係咪算係安全期?
仲想問假設今日有進行安全性行為 而聽日就m come 係咪代表無懷孕?

仲有一樣就係 我開始咗食事前丸 都食咗有十日 但個胸keep住有漲痛 同埋都生咗幾粒暗瘡 好似m come前嘅症狀咁 想問係咪正常?

麻煩了 問咗好多問題 感謝 :slight_smile:

想補充一下 佢射完後留喺入面時有抽插 抽插咗幾下先出嚟 而我當時摸咗幾下妹妹係乾的 應該無溢出?

一般建議番射精後,需要趁陰莖仍然勃起嘅時候抽出。因為無及時抽出的話,一方面有機會繼續抽插嘅過程中,精液會溢出黎,另一方面亦有機會因為陰莖射精後慢慢變軟變細,安全套有機會於之後抽出嘅過程中鬆脫,令精液有機會於陰道內漏出,導致懷孕。即使性行為後摸自己嘅陰部係乾透,但始終有機會抽插過程中,精液就已經於陰道內溢出,所以唔能夠單靠呢點,就確認係咪無懷孕嘅風險~

不過,因為你性行為係15/7發生,而17/7月經已經黎左,咁無需要擔心無懷孕嘅風險。性行為後,如果有黎月經,代表左月經前嘅性行為沒有令受精卵著床。因為受精卵著床的話,子宮內膜係會持續增厚,去令受精卵有一個良好嘅成長環境,就唔會出現子宮剝落,形成月經。因此,只要出現月經(子宮內膜剝落),就代表並無懷孕。

不過,如果你依然都係擔心有懷孕風險的話,因為一般受精卵著床需要6-9日,所以都可以選擇性行為11日後,去進行一次驗孕,到時嘅結果已經係準確同埋可靠嘅 :blush: :relaxed:

但係要提醒嘅係,因為我地係好難透過過往嘅月經週期,或者身體出現嘅狀況,去準確推斷下次黎月經嘅日子。首先,月經週期有好多原因導致出現變化,例如最近呢個月有生病服過藥、飲食唔均衡、生活唔定時、情緒有起伏、壓力過大等原因,都會令黎月經週期變長/變短。我地亦唔能夠透過「黎月經嘅徵兆」(例如流啡、腹痛、胸脹痛)等原因,去推測自己係咪好快就會黎月經,因為呢類「徵兆」亦有機會係因為身體其他情況而引起,例如食錯野導致肚痛、其他婦科疾病等導致陰道不規則出血等情況,唔能夠準確得知係咪由月經引起。

不論任何時候,都唔建議因為身體出現類似「黎月經徵兆」嘅情況,又或者透過推測「排卵期/安全期」,而發生唔安全嘅性行為。 因為本身安全期避孕法嘅避孕失敗率都係好高。即使選擇使用呢種避孕措施,亦只適合(/建議)月經週期正常、能夠正確推算安全期、無其他較適合避孕措施可供選擇嘅人先好選用,過程中亦需要額外持續每日量度基礎體溫,先能夠提高安全期避孕法嘅成功率。

所以無論任何情況,每次發生性行為時,都建議整個過程戴好安全套,一方面避免懷孕風險,另一方面亦能降低性病傳播嘅風險。射精後,亦都要陰莖亦要記得及時抽出,避免之後精液有機會於抽插/抽出時候接觸到女方嘅下體導致懷孕啊~ :bangbang: :two_hearts:

有關服用事前避孕藥方面,想了解番你服用呢款避孕藥之前,有無到家計會/婦科診所諮詢醫生嘅建議? :woman_health_worker:t2: :man_health_worker:t2: 因為每個牌子/款式嘅避孕藥內含有嘅荷爾蒙類型同埋劑量都會有唔同 ,有機會某部分避孕藥唔適合你嘅體質,係有機會引致嚴重嘅副作用。 避孕藥亦並非每個人都適合服用 ,一般常見唔適合食藥嘅情況,例如有心血管疾病、不規律陰道出血、體重過高等。所以一般都會建議服用避孕藥之前,必須諮詢醫生嘅意見,等醫生評估你嘅體質/生活習慣,係咪適合服用避孕藥,或者適合服用邊一個牌子/款式嘅避孕藥。

出現乳房脹痛係正常嘅初期副作用,一般幾個星期內就會消失。暗瘡方面,雖然並唔常見,但係有時部分避孕藥係有機會影響體內嘅雄激素,導致暗瘡出現。當然,暗瘡出現嘅原因,除左因為服用避孕藥引起之外,最近有服用其他藥物、有壓力、飲食習慣有改變、月經週期期間荷爾蒙轉變等因素,都有機會引起。不過如果乳房脹痛、暗瘡情況持續,或者令你感到困擾、不適的話,都建議儘快聯絡番你睇嘅醫生,或者向家計會/其他婦科醫生求醫,睇睇係咪依家服用嘅避孕藥係咪唔適合你嘅體質,有需要選擇其他牌子/款式嘅避孕藥啦 :woman_health_worker:t2: :man_health_worker:t2: :blush:

感謝你嘅回覆呀!

想再問多小小嘅係,因為我17號m come,咁計返的話15號嗰日應係算係安全期?我知用安全期嚟計的確唔太準而我平時都唔會用安全期嚟計。但想知喺所謂的安全期內進行性行為,懷孕風險是否會較低?

我喺食藥前有去家計會問過醫生意見呀!我諗應該係身體未適應所以身體有呢啲現象發生~

Thank you!!

安全期的話,如果一向約28日黎一次月經的話,咁排卵日就一般係下次月經黎之前嘅14(=28/2)日,而危險期就係排卵日嘅前五日至後四日 。(不過要留意番就算係用28日嘅週期去計算,都未必係倒數第14日排卵,呢個只係一個科學上計算嘅數字~!)假設你係7月17日黎月經,下一次月經就會大約係14/8。咁排卵日就會係31/7,而危險期就係26/7-4/8。安全期就會大約係17/7-25/7及5-13/8。( :star2:如果過往月經週期並非28日,而係其他日數的話,就需要再自行計算一下啦)所以你都可以透過呢個方式,去推斷你上次月經週期嘅安全期係幾時。除非你嘅過往經期都係好唔穩定或者好短,否則15/7都相信係處於安全期之內嘅 :relaxed:。加上你17/7都已經黎左月經,所以係無懷孕嘅風險啊。

不過要提醒番,只要出現左月經,月經之後發生嘅性行為,就唔能夠確保安全期內發生嘅性行為係咪無懷孕風險,因為身體已經有機會排卵啊 :confounded:

所謂安全期內發生性行為嘅懷孕風險會比較低嘅原因,係因為避開左受孕嘅日子。不過重申,因為每個女性每個月嘅週期數字都可以有變化,所以都唔能夠準確知道排卵日係幾時,同埋幾時係安全期啊~ 亦好似上文提及到,即使使用安全期計算法,

事前避孕藥方面,如果之後身體不適嘅問題持續,就記得聯絡番家計會嘅醫生啦 :smiling_face_with_three_hearts: :woman_health_worker:t2: :man_health_worker:t2: