Halo
我上一次嚟m係7月18 量好少 頭一兩日就一日一塊m巾左右 之後就三到七日就每日都係一達左右。之後7月31又突然有d血 到今日都持續有小小血 
好驚身體有咩問題，唔知你地知唔知有咩原因會導致咁。
我再上一次6月20嚟m 血量都比正常多，想問會唔會上一次月經多，下一個月就會嚟翻多啲架？我一直經期成日都遲，或者流個幾星期啡先嚟到m，但未試過好似今次咁。
另外，我有一次同男友隔住褲磨擦，我有着打底褲但濕咗，佢有着底褲同面褲。雖然我都知機會好微，但都想順便問下精子會唔會因為我陰道分泌物而游入去造成懷孕？同會唔會係同今次身體狀況有關？如果兩者都冇濕掂到係咪都唔會有懷孕機率？
最後我有一個心理障礙，只要自己身體無意掂到佢嘅下體，去廁所嘅時候就會成日聯想到懷孕，其實我係咪諗大多？
（因為始終網上太多謠言，想知得仔細啲，所以問嘅問題有d愚昧，多謝你地咁有耐性）
(＞人＜;)
Hello @Kii 
因為留意到，今次嘅陰道不規則出血（31/7），距離上次嘅月經週期（18/7）係13日，約兩次月經中間嘅日子。所以今次嘅出血，有機會係因為排卵期出血（ovulation bleeding / spotting）引起。排卵期出血就係指一般月經週期比較穩定，而於兩次月經之間，出現經間期出血嘅情況。
部分女性於排卵期嘅時候，有機會出現排卵期出血嘅情況，一般血量較少，出血日子亦會比正常月經少（一般約2-3日），分泌物顏色呈咖啡色或帶少量血絲，有機會伴隨輕微嘅腹痛。出現排卵期出血嘅原因，有機會係因為雌激素於排卵期期間，突然出現波動，激素短期下降，令子宮內膜失去激素嘅支援下，令部分子宮內膜剝落而出血。
所以都想了解下以上所講嘅排卵期出血，分泌物顏色嘅情況，係咪都同你今次出血嘅分泌物狀況近似？ 
如果都係暗紅色／咖啡色／帶少量血絲嘅分泌物，並非鮮紅色分泌物的話，都無需太擔心。
要留意嘅係，如果出現頻繁性排卵期出血嘅情況，又或者出血量多，出血時間長（多於5日）的話，呢D情況就需要睇醫生啦。因為除左有機會係排卵期出血之外，其實都有機會係其他婦科疾病（例如子宮息肉、子宮頸疾病等）引起，需要儘快睇醫生做個詳細嘅檢查～ 
月經嘅情況，並唔會因為上次流嘅血量多，而影響到今次經血量變多／變少。月經嘅血量，一般係隨住該次週期期間，雌激素嘅水平而有所影響。特別係青春期嘅時候，雌激素容易出現變化，有機會令經血量突然變多，所以都無需太緊張。不過都建議定時紀錄自己嘅月經週期日子同埋經血量，萬一持續幾個月經血量都有明顯增多的話，都好似上文提及過，有機會係其他婦科疾病引起，需要及早求醫。
不過就住你18/7果次月經血量明顯變少嘅情況，都有機會係因為體重明顯變輕、最近食少左野等原因引起。最近生病服用過藥物，或者使用其他類型嘅月經用品（例如棉條、月經杯），都有機會令月經血量變少，或者出血日子變短。不過如果唔係以上原因引起，只要經血量唔係少到得番只有一兩滴血的話，都無需太擔心嘅。可以留意埋下一次月經嘅狀況，例如下次經血量係咪都係咁少，或者有無出現不規律嘅陰道出血情況，再睇睇有無需要求醫
始終今次係第一次出現類似嘅情況，都可以再諗諗有無咩特別嘅原因，有機會影響陰道出血嘅情況。好似你提及到你有擔心同男朋友嘅親密接觸有機會導致懷孕，其實呢類緊張／擔心嘅情緒，都會有機會影響體內嘅荷爾蒙情況，從而影響你嘅月經週期。特別都見你即使生活上去廁所嘅時候，都會同懷孕有所聯繫，有機會呢種緊張或者擔心嘅情緒持續出現的話，其實都會令到你食少左野／睡眠質素下降，令整體體內嘅荷爾蒙出現變化，以致出現排卵期出血，或者經血量變少嘅情況。
或者近期有無出現下腹疼痛、陰道痛楚嘅情況出現？
有呢類情況的話，就會比較有機會係由其他婦科疾病引起，建議儘快及早求醫。
暫時都建議可考慮用幫助紀錄月經週期嘅apps 
，咁就方便提醒自己每個月定時紀錄月經週期、出血量、出血日子等嘅資訊啦～
而有關你同男朋友嘅親密接觸，就你嘅情況，懷孕嘅機率係近乎零。因為一般尿道球腺液（陰莖性興奮時分泌嘅透明分泌物）／精液，接觸到空氣或者其他物質（例如內褲）嘅時候，於幾分鐘內就會乾透。分泌物內含嘅精子，亦會因為失去活動能力而死亡。所以精子係好難穿過幾層嘅布料，並游入你嘅陰道內導致你懷孕。加上，如果雙方嘅衣物表面都無濕到的話，相信精子能夠穿過衣物，導致懷孕嘅機會就更加微。所以呢次嘅親密接觸，相信同你今次身體嘅狀況並無關係，可以放心
正如上文提及到，當尿道球腺液／精液，接觸到空氣、其他物質（包括衣物、皮膚）等嘅時候，幾分鐘內就會乾透。所以除非你嘅下體同男朋友嘅分泌物有直接嘅接觸，否則會導致懷孕嘅機率都係近乎零，所以無需要太擔心～ 
不過最後都建議，如果未來唔想好似今次咁心掛掛，發生任何類型嘅親密接觸（不論有無發生插入式性行為都好），都建議整個過程都戴好安全套，咁就一方面可以避免懷孕風險，另一方面都可以減低性病傳播風險啦～
如果只係好似今次咁隔住衣物摩擦嘅情況，經我地解釋過懷孕風險後，你都覺得呢個情況令你覺得好擔心懷孕，亦唔想使用任何安全措施（例如安全套、避孕藥）的話，都可以考慮下次隔住多D衣物，或者使用口交膜，嘗試再進一步隔住身體上嘅接觸，睇睇會唔會令你可以安心D
首先唔該晒你先～
我嘅血一開始係比較淺嘅啡，之後有d比較深紅夾碎一啲深啡嘅分泌物。好似血咁又有，但我又冇特別留意係咪暗紅，因為好似平時月經咁，印象中有啲接絲嘅血，好似白帶咁。不過流量唔太多，一日1-2塊護墊。如果照咁嘅情況係咪有機會係排卵出血呀？
其實我都明白如果兩個人有着衣物而且係乾嘅，精子接觸到都好快死亡。但因為今次起磨擦過程中，我嘅打底褲外面都濕咗，我驚令到佢面褲濕埋，精子就因為我嘅陰道分泌物而有機會游動。如果咁樣，機會都係接近零嗎？
Thank!
睇你形容嘅分泌物情況，因為都見血量較少，或者只係帶少量血絲嘅分泌物，同排卵期出血情況都相似嘅，無需太擔心 。
而精子穿透衣物導致懷孕方面，其實就好似上文提及過，當尿道球腺液／精液接觸到空氣或者其他物質（例如皮膚、布料）嘅時候，精子好快就會失去活動能力。原因一方面係因為分泌物乾透之外，其實另一方面都因為一般體外環境，從溫度及濕度層面上，都唔係一個適合精子生存嘅環境。除非體外環境能夠好似實驗室咁，做到一個能夠提供養分，並同陰道環境（溫暖而潮濕）相近嘅空間，否則你所形容嘅狀況，都係好難導致你懷孕 。無發生插入式性行為，或者雙方下體或分泌物並無直接接觸的話，其實懷孕嘅風險都係極低嘅 。
想問出血量幾多先正常呀？
因為我呢兩日都係鮮血為主 大概一塊護墊 咁樣都同排卵期出血相近？
唔該哂你呀(╯3╰)而家放鬆咗啲
1個讚
排卵期出血，一般都係點滴型嘅出血（spotting），或者白帶中夾帶血絲，而出血量係護墊可以承載嘅到嘅。一般情況下係極少機會達到好似經血量咁 所以都同你嘅情況相近啊，無需太擔心 