係唔係我lum多左 個人太敏感

男朋友大過我9 年 一齊左九個月 因為我係外國讀書所以大部分時間long d (就算係 都有日日傾電話 可以唔講野做自己野)
3月開始我就翻左香港online lesson 就見多左男朋友 差唔多真系日日見 佢平時返工放工夜晚都會打比我skype 我 就算冇嘢傾都會開cam 自己做自己野 真系差唔多24/7 特別係佢依家冇得開工因為肺炎 而偏偏我就覺得 應該話我怕佢係怕我唔開心所以逼自己做 怕我無意間比左好多壓力佢 而佢都唔講 好怕我地24/7 傾電話佢想要私人空間比唔到佢 佢又唔講
有時又覺得其實佢咁大個人 2x歲 都比我成熟 應該比我識得點處理感情
一齊依段時間 都冇咩鬧交 我唔開心佢都會知 會同我傾 tum我開心
究竟係咪我太敏感 lum 得太多 要放鬆啲 定係我真系要同佢傾下:(

Hello @wwwwwwww :blush: 見到你都好著緊男朋友嘅感受,同埋都唔知男朋友呢段時間24/7嘅陪伴,係咪因為擔心你嘅感受所以先會咁做 :pleading_face: :two_hearts: 有意識到呢個可能性,都代表左你都好重視呢一段關係,希望雙方都能夠舒服咁做自己同埋維持呢段關係。從我嘅角度睇,如果你之前都無特別反映過呢個情況的話,其實呢個諗法都唔算係過分敏感,或者係咪諗得太多啊~ :relaxed: :relaxed:

既然你有呢個顧慮同埋擔憂,都建議你可以同男朋友表達啊~ 亦都話唔定,其實男朋友都睇得出你有D野擔心緊,但係未有坦誠咁分享比佢知,所以溝通都係一個好嘅方法。因為每一個人於關係當中,需要嘅陪伴同埋親密度都唔同,有時唔透過直接嘅溝通,其實都好難確認係咪男朋友都好享受/鍾意呢一種親密嘅陪伴,還是男朋友以為你係想要呢種程度嘅陪伴,所以先咁緊密去陪伴你。

可以嘗試搵一個雙方都平靜嘅時間,問問男朋友嘅想法,例如問「你會唔會覺得最近我地見得好密?你理想中我地見嘅頻密度係幾多啊?」 :grinning: 當然問之前,都建議你都可以思考一下,自己會唔會都覺得現時嘅見面頻密度係咪太多,還是你都覺得ok。同埋都可以諗下,萬一男朋友理想嘅見面頻密度同你期望嘅係有差異,你會唔會願意選擇磨合,或者可以有咩其他嘅處理方法。因為討論嘅過程中,我估你男朋友都會希望知道你嘅諗法 :blush:

相信惟有透過彼此分享自己嘅想法及感受,你地先能夠再進一步討論,未來想選擇一個點樣維繫嘅方式,而你地雙方都會覺得舒服~ 當然討論嘅過程中,你亦都能夠同男朋友反映,佢同埋你係咪都想要番一個私人空間,等自己都有一個人靜落黎嘅時間,去建立一下興趣/陪伴自己嘅家人朋友/充實自己/好好休息等 :heart:

最後,個人嘅年齡,或者過往戀愛嘅經驗,都未必同處理感情嘅能力係有直接嘅關係。始終每一個人都係獨特嘅,每一段關係亦都係獨一無二嘅,即使過往有再多嘅戀愛經驗,話未必能夠一一應用於所有關係上 :blush:。惟有雙方都珍惜呢段關係,願意真誠表達自己嘅想法同感受,並且嘗試理解伴侶嘅想法、感受,從而磨合,咁先有助雙方繼續維持呢段關係啊 :smiling_face_with_three_hearts: :two_hearts: :two_hearts: