我係睇左醫生建議先食避孕藥
食左兩個月yaz，兩次都係白色藥丸最後一粒來m，經期變得準時28日，期間都無突別吾舒服問題
依家係我食藥第三個月，我每日都有準時食無漏食，m期去到第五日完，但之後每日都有少少啡嘅情況，day7好少少以為完全乾淨，去到day8有發生性行為無套無內射，但個晚又發現底底有啡情況
去到day10我擔心上個月尼假m所以有驗孕但係無懷孕嘅，咁day9同10啡嘅情況又改善左係無啡了，我就今日day11無用墊，點知去廁所又發現底底有啡好崩潰
上兩個月都無呢個問題，加上我緊張之後又覺得肚痛胸痛，由食藥第一日到今日我都無漏食準時食 請問我今個月say8個次性行為會吾會懷孕呢
其實我雖然已食藥踏入第三個月，但每次行埋之後都仲係好擔心無m到同有bb點先可以放鬆d
同埋我食藥頭兩個月都係4日完m完全乾淨
但今個月先尼到day11仲有d啡 大概係底褲一兩滴到 全日
Hello~ 喺初服食避孕藥嘅頭3個月，因為身體需要時間適應所以係有機會出現不規則陰道出血(點滴出血或短暫出血)嘅情況嘅，依個情況並唔會影響藥效或者對身體產生負面影響，而一般喺服食避孕藥3個月後不規則陰道出血就會因為身體適應左藥效而停止，所以你依個情況係正常嘅，唔需要太擔心 
如果下個月依然有不規則陰道出血嘅情況，或者出血量增加嘅話就建議去睇醫生了解返身體狀況同埋係唔係適合服用依隻避孕藥(https://www.yaz-hk.com/cn/faq.php)。
至於懷孕機會方面，其實只要無漏服(不包括白色藥丸)、服藥期間無嘔吐同嚴重腹瀉、無因為生病服用過其他藥物等等有機會影響藥效嘅情況嘅話，懷孕嘅機會都係相當低嘅 
如果想確實知道有無懷孕嘅話，可以喺性行為嘅11日後進行驗孕，如果結果係呈陰性嘅話咁就應該係無懷孕啦
明白不規則陰道出血嘅情況會令你好擔心身體同埋懷孕嘅風險 
不過都希望你明白服藥頭3個月都係身體嘅適應期，所以有依啲情況係好正常嘅 而如果真係好擔心懷孕嘅話，可以食避孕藥嘅同時都使用安全套，咁就可以有效提升避孕嘅成效啦 
姐係 我懷孕嘅機會係好低？ 係咪係安全期？外射加避孕藥我係安全嘅？
因為頭兩個月都無呢個情況，反而係食到第三個月先咁。
我真係好擔心食藥都有bb
同埋就算有都吾係咁快有徵狀？
心急人上
係阿，見你都提到有每日準時食藥，所以懷孕嘅機會好低 至於係唔係安全期方面，因為避孕藥有阻止精子同卵子結合嘅作用，所以基本上喺持續服食避孕藥嘅情況下，每日都係安全期，唔需要刻意計算。不過因為男性受性剌激嘅時候會自動分泌透明而黏黏地嘅液體，叫做尿道球腺液，當中都含有少量精子嘅，所以如果性行為時無用安全套，即使唔係體內射精都有機會懷孕嘅。所以避孕藥配合安全套係比單食避孕藥更有效嘅避孕方法，但都希望你明白無一種避孕方法嘅成效係100%，所以即使高成效嘅避孕方法都唔能夠100%確保唔會懷孕。你可以衡量下現階段嘅狀況自己可唔可以接受有機會懷孕嘅風險，亦都可以同伴侶傾下你對懷孕嘅擔憂，了解下伴侶對於你嘅憂慮有咩睇法
至於流啡令你擔心嘅懷孕徵狀相信係「著床性出血」，亦即你提到嘅「假m」。先解釋返其實著床性出血係講緊受精卵著床喺子宮壁嘅時候有機會造成出血，多數發生喺性行為嘅9-11日後，但依個本身並唔係一個好常見嘅情況，而且出血時唔會好似一般月經咁持續出血，通常只會喺一日內一瞬間流完。所以睇返你嘅情況，流啡持續左一段時間，而且day8發生完性行為嗰晚就開始流啡，所以可以排除係著床性出血嘅情況 如果真係好擔心流啡嘅情況，建議去配開避孕藥嗰間診所睇醫生了解返身體狀況 
我可吾可以介定懷孕機會近乎零？
因為我由性行為完開始有腹痛胸痛等症徵兆
再加上突如其來嘅間歇流啡 真係令我好擔心
明白懷孕徵兆應該無可能咁快有？！
而出血應該吾關懷孕事？
要相信自己真係好難啊就算食左藥，我都仲有好多顧慮，甚至諗仲需吾需要食事後藥，每次都諗係咪要驗孕，令到精神長期緊張，點樣先可以放鬆d？
現階段我係咪只能夠做到繼續乖乖準時食藥，等多8日驗孕，然後就可以完全放低？
想補充再問 我嘅流啡會吾會係經期一完就接住排卵而出現？所以day8又流啡 day9,day10又無 ，其實諗返起除day1-4血量較多，day5到8都係點狀出血同流啡
我見你地都有覆過人如果食左藥，連m前、m後內射都無問題。咁其實我係咪吾需要太擔心？
我見住你地都有話食左避孕丸就ok。咁其實我係咪連驗孕都無必要？
今日再睇返前日嘅驗孕結果，距離我上次性行分別係過左21,18同2日，加上我有尼m。咁係咪已經好準確，點解我成日望望下覺得有淺挖嘅咁等21,18個次，係咪真正代表無懷孕？
係你嘅文字裡面，我睇到你留意到自己身體出現咗一啲同之前唔一樣嘅情況，呢啲情況啱啱好就係喺你食緊避孕藥期間，同時你又有性行為，所以你會好擔心，想要一個答案。
首先，如果你長期同埋穩定咁服用事前避孕藥嘅話，係可以令體內維持一定嘅「雌激素 (estrogen)」同埋「黃體素 (progestin)」濃度嘅，而高濃度雌激素主要嘅作用是抑制卵巢排卵，黃體素就會令子宮頸黏液增加，令精子難以前進同卵子結合，降低受孕嘅機會。
就好似上面 @Ana_StickyRiceLove 講， 係你有長期食事前避孕藥嘅情況底下，懷孕嘅風險係非常低嘅。其實事前避孕藥失效嘅原因好多時都係因為漏咗食藥而導致嘅，所以如果你準時食藥而且無漏藥嘅話，其實懷孕嘅風險真係好低架。
同埋係食避孕藥頭三個月身體都係適應期裡面，都有機會係M期以外都有機會有少少出血，同埋都有機會係殘留係身體裡面嘅M血嘅。 
如果你有長期食事前避孕藥嘅話，無論你M前性行為，M後性行為，M中性行為（要注意清潔），懷孕嘅風險都非常之低。
其實你唔係唔相信自己，你係唔相信隻藥咋，如果真係好擔心嘅話，你可以拎埋隻藥（連埋個盒）去搵醫生幫手檢查下，睇下自己身體會唔會出現咗咩問題，又或者你可以去返開藥俾你嘅醫生度問返呢個情況嘅。
建議你下次可以去家計會買事前避孕藥，係買嘅時候會有醫生同你檢查下，睇下你適合食邊一隻避孕藥，之後醫生都會再同你約個時間返去覆診，睇下你食藥嘅時候會唔會有咩情況出現，如果係食藥過程當中有咩事都可以約返醫生檢查，而且家計會嘅事前避孕藥又比市面上嘅平，所以都建議你可以去約家計會呀。
至於驗孕棒果度，如果你係有跟說明書上面嘅指示去取樣本，同埋係說明書指定嘅時間內去睇個結果嘅話：
咁你見到細窗口有線的話係代表佢已經正常運作當中，而你見到打橫一條線，其實就代表你係無懷孕，所以唔係擔心嘅。而呢個結果係講緊你21同18日前嘅性行為嘅，而2日前嘅性行為，你等到8月12號再驗一次就比較準確架啦。
要記住，跟返說明書上面嘅指示去拎樣本，同埋係指定嘅時間內去睇結果，因為你用錯嘅方法去拎樣本會檢測唔到嘅，而你遲咗或者早咗睇結果都會唔準嘅，早咗個結果未出，遲咗可能會因為有其他化學反應而導致顯示嘅結果唔準確。
其實你可以去買一啲電子驗孕棒，上面會直接顯示你有或者無懷孕同埋懷孕嘅週數嘅，所以即使你前兩次嘅性行為導致你懷孕，你都可以驗到嘅，咁就會清楚同埋安心啲啦。但係都係要記住：跟返說明書嘅指示去拎樣本，係說明書指定嘅時間內睇結果。 
你可能都會好擔心，咁不如同伴侶傾下會唔會換過一種嘅避孕方式會令你安心啲，或者安全套+事前避孕藥咁樣用？
同伴侶溝通係一件好重要嘅事，特別係用咩安全措施呢一方面，其實你都有話事權，你都可以同伴侶去傾下用咩安全措施雙方無論係心理同埋生理上都係舒服嘅。不妨同你嘅伴侶傾下你嘅擔心，同佢一齊去經歷呢件事，比起你自己一個承擔，會踏實得多。
或者你仲有咩憂慮嘅，其實都可以係呢度同我地再傾下架，糖不甩嘅大家都好願意陪著你架。
同埋最後最後一樣嘢，雖然事前避孕藥同安全套都可以避孕，但係只有安全套係唯一一個可以防止感染性病嘅安全措施呀，要記住啦。 
今曰係8月14號
今早用萬寧牌驗過都係得一條線 咁我係咪已經可以完全肯定無懷孕？
距離我最後一次性行為(8月2)已經係過左12日
我每日都有繼續準時食藥，下星期日正常要m到，仲係好緊張啊
食緊藥會吾會影響驗孕結果？
如果你有跟返說明書上面嘅指示去做，同埋根據返說明書上面指定嘅時間去睇，其實個驗孕結果已經可信架啦。
你可以繼續留意下月經嘅情況呀，如果真係發現有異常，就要儘快去開事前避孕藥俾你嘅醫生度檢查下啦。如果你係買成藥嘅，都可以帶埋啲藥去搵普通診所醫生睇下。
食緊事前避孕藥，係唔會影響你驗孕嘅情況嘅，驗孕棒係透過檢測尿液中嘅人绒毛膜促性腺激素(hCG)水平去驗測有無懷孕，hCG係會喺卵子著床之後開始分泌嘅，而你食緊事前避孕藥好似之前咁講：
可以 令體內維持一定嘅「雌激素 (estrogen)」同埋「黃體素 (progestin)」濃度嘅 ，而 高濃度雌激素主要嘅作用是抑制卵巢排卵，黃體素就會令子宮頸黏液增加，令精子難以前進同卵子結合，降低受孕嘅機會 。
事前避孕藥所含係一啲人造嘅雌激素同黃體素，所以佢地唔係hCG嚟嘅，所以佢地唔會影響驗孕棒嘅結果。除非你另外有食一啲含有hCG嘅藥物，不過通常含有hCG嘅藥物都一定需要醫生處方，如果你無特別睇醫生或者醫生無特別同你講嘅話，基本上食事前避孕藥係唔會影響驗孕棒嘅結果嘅。
同埋你要留意返下次月經會唔會再有流啡嘅情況，如果再有嘅話，就真係要去睇醫生啦，因為持續嘅流啡有機會反映身體裡面出現咗一啲情況，而呢啲情況需要醫生先可以幫你檢查同診斷到架。
流啡情況已經無了 大概係day13停左 我係day12已經即刻去左睇醫生同照聲波，一切正常啊
係一直都解決吾到懷疑有孕呢個問題，其實另一半好專重我，寧願無關係都吾想我個個月癲左咁，但同時我亦都吾想令佢失望，點知呢個月一做完自己又跌返落去多疑圈套，令到自己情緒吾好仲要麻煩到身邊嘅人，雖然我仍然好擔心驗孕結果驚吾準，又好擔心今個月尼m吾準時，但我都好希望今次之後好好整整吓自己情緒，比d信心自己、對方同身邊嘅人。
無可能食藥，但每個月都仲要驚，又要驗，驗完又吾信，又怕m吾準時，最大問題其實係我自己度
其實有好多人同你一樣，不嘅每個人嘅程度都會唔一樣，有啲人係未嚟M之前係好擔心架，但係月經嚟咗之後就放心啦；有啲人即使月經嚟咗，佢地一樣都會擔心，焦慮嘅情況無減少到；亦有啲人見到驗孕結果就會安心，但係亦都有啲人見到驗孕結果依然會覺得好焦慮同擔心。每個人焦慮或者擔心嘅原因都好唔同，有可能唔係淨係得一個原因。
糖不甩嘅大家都好開心見到你係事件發生後都好冷靜咁樣睇下自己嘅情況，整理自己嘅思緒。係呢個post裡面嘅對話都見到你不斷係度進步緊，慢慢俾多啲信任。
下一步，可以試下瞭解自己有咩原因會咁害怕，係單純咁好驚懷孕呢件事？定係驚懷孕之後屋企人嘅反應？驚懷孕之後唔識點樣做？驚懷孕之後伴侶就會拋棄自己？驚懷孕之後要自己面對？ 
一直以來社會嘅性教育都係偏向「恐嚇」式性教育，例如不斷放大意外懷孕嘅負面後果，不斷灌輸意外懷孕後要墮胎，而墮胎係一件幾恐怖嘅事，所以令到好多人會好驚意外懷孕呢件事。當佢地開始有性行為之後，就會不斷回想呢啲教育嘅內容，因此而產生好多焦慮、擔心、害怕等等嘅情緒，即使自己懷孕嘅風險好低都好，都會好驚意外懷孕，呢個恐懼嘅情緒有時甚至會超越事實嘅根據。
糖不甩嘅大家都希望係呢個好短暫嘅交流裡面，令你認識更多關於性嘅知識，認識多咗，擔心嘅情緒未必會減退，但係至少你會知道實質上係咪真係有咁嘅情況。
見到你伴侶都好關心你，建議你可以趁住呢個機會同伴侶商量下如果真係意外懷孕嘅話，可以點樣做，究竟係生出嚟，定係做緊急避孕措施？生出嚟之後人生嘅方向會有咩變化？做緊急避孕措施之後又會點樣處理？可以坐地傾下，傾得詳細啲，相信你對將來都有少少把握，知道真係意外懷孕嘅話，都有啲準備，唔會咁慌張，有曬程序可以去follow。當然傾嘅時候最好搵個大家都舒服，情緒都比較平靜嘅時候去傾，如果帶住嬲怒、怪責嘅情緒，最終唔單止咩都傾唔到，反而會演變成嘈交，咁就唔好啦。
放心，糖不甩嘅大家都會一直係呢度陪住你，支持你，有咩事都可以再搵我地架。
今日14日後 再驗左次clearblue都係一條橫線，我係咪可以完全放心啦？
因為我準時食藥，據上兩個月食藥經驗，會係最後一粒白色藥尼m，今個月預計下星期日m到
剩低呢一個星期係咪可以完全放心啦？真係好緊張，好擔心啊
係呀～有準時食事前避孕藥，本身避孕率都非常高。加上你係性行為後驗孕嘅結果亦係無懷孕，係可以排除懷孕嘅可能性。如果依然擔心嘅話可以考慮係食藥嘅同時使用埋安全套，除咗可以提高避孕效率，亦可以減低性病同其他疾病嘅傳播。趁呢段時間了解下自己內心嘅諗法同埋調節自己擔憂嘅情緒啦，你已經盡咗自己最大嘅努力去做足安全措施，已經好叻㗎啦 
真係好多謝你地，雖我呢個星期應該會繼續焦慮，直到尼m之時，甚至過兩日可能又會走去驗孕，真係好想快d呢個月會完
加上抹片報告仲等待緊，都好擔心結果，上網睇左好多資訊，又加重左不安感
尼緊尼兩件事完左之後，希望自己可以好好調整情緒，多謝你地一直嘅陪伴
我地都好開心你願意同我地分享你嘅擔憂、顧慮，讓我地能夠陪伴你去面對今次嘅經歷。
如果內心焦慮嘅感覺，今個星期都繼續出現的話，都可以好似 @Kitty_StickyRiceLove 所講，嘗試調節自己擔憂嘅情緒。例如可以試下聽音樂、做運動、睇睇可以令自己開心嘅劇集、食個甜品，或者其他過往能夠幫助你放鬆心情嘅活動啊～
無論抹片檢查結果係點都好，都有我地糖不甩喺度支持你。如果等待黎月經及抹片報告結果嘅過程中，覺得好煎熬／不安，想搵人傾訴嘅嘅時候，都好歡迎你繼續搵我地啊 
完來報告已經出左，一切正常
但我仲係好擔心有bb，每日打開眼就會好想去驗，又會擔心有意外，連發夢都係呢件事，吾知點樣先夠信驗孕結果
好開心知道你嘅抹片檢查報告一切正常阿 咁即係唔洗擔心之前流啡嘅情況係因為子宮出左問題啦 而你亦喺性行為嘅11日後驗過孕，結果都係呈陰性，所以就代表無懷孕嘅風險架啦 如果依然好擔心懷孕嘅話，可以為自己訂立一個期限，例如再驗孕多兩次，如果兩次嘅結果都係陰性嘅話，就要相信自己的確無懷孕嘅風險 
另外，你亦都可以充實多啲自己嘅生活，明白宜家因為疫情嘅關係好多活動都受到限制或者要暫停，但都鼓勵你喺唔影響自身健康嘅前提下發掘多啲興趣，同埋多啲同朋友傾計，令生活更加充實，咁就可以減少空閒同獨處嘅時候浮現擔憂嘅情緒啦
