你好，我是一名女生，有關性愛的問題想請教。
對於性，我又愛又恨。
之前同男友拍拖有親密行為，陰蒂受到刺激，會有快感。
但因為太驚，所以從來無試過比男友進入。
而且，如果個姿勢係我係下面，都一定無快感。
如果我在上面的話，就會feel到幾秒快感，果種感覺一過，就即刻想停。
我問朋友的經驗，佢話自己都未試過放入去之後有感覺。
我決定買個性玩具試下探索下，
個玩具主要係刺激陰蒂，我唔敢買條狀，因為未克服到放d 0野入陰道。
之後都有一種快感，
但好快我覺得好想停落黎。
其實我唔係好知係個人問題? 定係位置問題？同埋有咩方法克服。
Hello 其實你遇到嘅情況係好常見架！因為女性陰蒂有嘅神經末梢其實比陰莖嘅龜頭更加多，變相更加容易感受到刺激，甚至達到快感或者性高潮。相反，其實陰道內實在有嘅神經末梢唔係太多，而且係集中係陰道比較前嘅位置，所以其實唔係每個女性都會透過抽插／刺激陰道入面而得到快感架。之前係芬蘭有進行過一個大型研究去分析女性高潮嘅原因同狀況，當中只有6%女性表示可以透過單獨刺激陰道而得到高潮，比較多女性都係透過刺激陰蒂（34%）或者陰蒂+陰道（54%）而感受到高潮。而且每個人身體嘅敏感點同一樣，喜歡嘅刺激方式亦唔一樣，甚至所謂「高潮」同「歡悅」嘅感受都好唔一樣，所以都唔需要太過依賴／擔心陰道嘅刺激。
至於刺激陰蒂嘅方法，現時都有好多唔同款式嘅性玩具係針對刺激陰蒂嘅，例如震動式或者吸啜式，都可以為使用者帶來唔同嘅感受。係用法方面其實亦無特定嘅，好似按照著自己嘅身體反應去調節。例如好似你所講，感到有快感之後好快就會想停落嚟，可以試下暫停一下再睇睇自己想唔想再重新刺激，而唔係強迫自己要長時間咁刺激到有「高潮」嘅感覺。而且所謂「高潮」嘅體驗每個人都可以唔一樣，最緊要係自己覺得舒服同享受。或者你所講嘅「覺得有快感嘅感覺」就已經係你嘅「高潮」體驗啦！另一方面，亦有機會係陰蒂未習慣被玩具嘅速度／質感去刺激，所以好快就已經出現「覺得夠」嘅感覺。可以試下係用玩具之前，先用手指按摩／撫摸一下陰蒂，等陰蒂習慣被刺激，先再用玩具去嘗試！最後你仲可以嘗試一下調節玩具刺激嘅位置，唔係所有人都喜歡直接刺激到陰蒂嘅位置，可以試下係陰蒂附近入手。特別係震動嘅玩具，有時一開始個刺激感會太強烈，身體未必一下子適應得到架。等身體接受到有啲距離嘅刺激後，再慢慢嘗試直接刺激陰蒂都ok呀！
至於你話同伴侶親密行為嘅時候發覺係上面先會容易啲感覺到有快感，其實都係一件好平常嘅事。每個體位都有佢嘅愛好者，雖然傳教士式好似係最常見嘅體位，但都唔代表係每個人都鍾意架。而且係上面嘅時候，你會有多啲控制權，會比較容易調節去一個你覺得舒適嘅位置去刺激，都有機會係因為咁樣而令你覺得更加舒服呀～無話邊一個體位係最理想嘅，因為每個人性器官嘅外貌同位置，甚至方向同角度都會有啲唔一樣，搵到合適自己同伴侶嘅就係最好架喇！
每個人嘅身體都唔同，對快感嘅體會唔同，需要達到快感嘅時間亦可以唔一樣，係好正常同平常嘅事，並唔係你身體有問題呀！