怕自己有懷孕

早兩日同男朋友試一試
但我始終都驚就係男朋友淨插龜頭嗰陣拎返出嚟
我嗰陣無確定到男朋友有無射前液嗰啲出嚟
但都怕怕地會有咗
就想問一問咁樣會唔會懷孕
或者宜家有咩補救措施

Hello @Cantan :blush: 陰莖性興奮嘅時候,就如你所講,會分泌出透明嘅尿道球腺液,內含少量精子,係有機會導致懷孕。睇你嘅情況,因為性行為過程中,陰莖龜頭嘅部分係有進入陰道內,所以尿道球腺液係有機會過程中直接流入陰道內,係有導致懷孕嘅風險啊。 :pleading_face:

補救措施方面,因為你提及到性行為係兩日前發生,依家距離果次性行為係未夠120小時 。所以都建議你儘快去家計會,諮詢醫生意見,睇睇有無需要服用事後丸(最長服用時限為120小時):woman_health_worker:t2: :man_health_worker:t2:提醒番,喺香港事後丸係醫生處方藥物。除左家計會之外,都可以選擇去普通科門診/婦科診所/急症室睇醫生攞事後丸 :relaxed:

事後丸嘅詳情,都可以留意以下家計會嘅網站:

同時,都建議性行為11日後進行驗孕 ,到時結果會比較準確同埋可靠。因為受精卵一般著床需要6-9日,所以如果好擔心的話 :pleading_face:,性行為7日後驗孕,都可以有一個初步嘅結果啊。:relaxed:

最後,記得之後發生任何親密接觸/性行為(不論有無進行插入式性行為),都要記得整個過程帶番安全套,一方面避免懷孕嘅風險,另一方面都可以減低性病傳播嘅風險啊。

咁想請問一下
拎事後丸個流程會喺點
會唔會通知家長
係咪會即時食藥

以家計會嘅流程黎講,首先,需要透過打電話約見醫生 :phone:(可聯絡附近嘅家計會青少年保健中心-灣仔/旺角/葵芳),過程中護士已經會詢問你係幾時發生性行為,點解需要服用事後丸,同埋收集你嘅基本個人資訊以作登記。提醒番因為家計會嘅電話平日都比較難打得入,建議中心一開門嘅時候就打電話過去~ 同埋有定心理準備需要打幾次電話先通。雖然一般服務排期都幾full,但係護士都會嘗試因應你嘅緊急情況(事後丸最長服用時限為120小時),盡量比到一個快D嘅期你。不過因為可能因為個期係臨時加去日程度,所以都有機會去到家計會嘅時候需要等一段時間。

另外,因為依家疫情嘅緣故,我地都唔肯定機構有無暫時調整到保健中心嘅服務時間 :alarm_clock:,建議留意番官網嘅服務時間更新,同埋打電話預約嘅時候,同護士確認清楚。

預約好時間之後,就記得按時間準時到診。(必須係服用事後丸嘅本人親自到診,唔能夠其他人代攞事後丸)到左之後,就會登記你嘅身份證,同埋會有一份表格需要你去填寫 :memo:。表格內容都係填寫基本嘅個人資料,無需太擔心。伴侶都可以過程中陪診,不過入房嘅時候伴侶就唔可以一齊入去 :two_hearts:

填完表格之後,將會見左護士先。護士會詢問你性行為時嘅情況,評估下你係咪有需要服用事後丸 :speech_balloon:。另外,都會幫你度高磅重,了解你嘅體質同埋身體狀況。如果經過護士評估之後,都覺得係有需要服用事後丸的話,就會再帶你去睇醫生。

睇醫生嘅過程中,醫生將會再仔細詢問你身體嘅情況(例如過往病歷) :woman_health_worker:t2: :man_health_worker:t2:。如果評估過程都無咩問題,醫生就會叫番你出去。服藥嘅情況,係需要即時服藥 :pill:,有機會係(1)醫生評估後即時比埋事後丸你,於醫生面前服用;(2)醫生評估後,離開房間,再等護士叫你,喺護士面前服用事後丸。服用事後丸後,護士應該會叫你出去坐等10-20分鐘。如果無即時出現副作用的話,就可以離開。離開前,職員會再同你預約覆診日期同埋繳費 :spiral_calendar: :money_with_wings:。覆診日期一般都會約大概一個月後,上去驗孕確保無懷孕。如果你好擔心懷孕,等唔切一個月的話,都可以覆診前,自行驗孕左先。

驗孕時間,就如上文所講:

而通知家長方面,都留意番香港嘅合法性交年齡為16歲。不過,如果你細過16歲的話,其實都無需太擔心,家計會係唔會無經過你嘅同意下,就自行報警/通知你嘅家長,家計會本身亦唔會有你家長嘅聯絡資訊。而你未夠16歲的話,當你填完之前提及過嘅果份個人資料表格後,護士就可能同你面談嘅時候,會傾耐少少,問得詳細D。例如問你係同邊個人發生性行為,果個人係咪你本身認識嘅,你發生性行為過程中係咪清醒及自願,等等。你可以按番自己嘅情況回答,或者自行決定透露幾多嘅資訊比護士知道。只要唔係你自己想報警,家計會係唔會越過你,自行去報警或者通知你嘅家長:no_good_woman:t2: :no_good_man:t2:

家計會青少年保健中心聯絡電話
灣仔青少年保健中心:2575-4799
旺角青少年保健中心:2770-4994
葵芳青少年保健中心:2443-2773

詳細家計會服務地點資訊:

如果你係想睇私家診所,就無咩特別嘅流程。一般好似普通睇症咁樣,都係登記、預約、見醫生評估情況、攞藥。係咪需要即時服藥就視乎診所做法,有機會需要即時服藥,或者你攞藥後自行服用。不過你係細過16歲,又選擇睇私家診所的話,我地就無辦法保證你所睇嘅私家診所會唔會私下報警,因為原則上16歲以下發生性行為係犯法嘅:pensive: 所以如果你肯定自己係細過16歲的話,或者有其他特殊嘅情況(例如強姦等),呢類擔心診所會私下報警嘅情況,而又需要服用事後丸,睇家計會可能你就會比較安心。