本身同App predict我應該琴日黎M 平時都淨係會遲兩三日 到依家都無點谷M嘅感覺 淨係琴晚開始頭暈 會唔會有左？好驚 點樣先可以催經？
Hello @Kintexxx 
見你都有擔心懷孕嘅顧慮，想了解番最近有無發生性行為，令你覺得會有懷孕嘅風險？而且，都留意到你近期20/7嘅post有提及到發生左一次唔安全嘅性行為，並且有考慮係咪去家計會攞事後丸，都想了解一下最後有無服用到事後丸，同埋有無驗孕？ 
因為如果最近都無發生其他唔安全嘅性行為，而該次你亦有於120小時時限內，服用到事後丸的話，咁懷孕嘅風險都係好低，無需要太擔心嘅。
而有關月經來遲嘅原因，過往回覆你嘅post亦都有提及過 ，
加上服用左事後丸的話，亦會令你下一次嘅月經提前／延遲。所以暫時只係遲左2日黎，即使無黎月經嘅徵兆，都無需要太擔心，可以睇多幾日先 
。而且，即使你過往黎月經之前可能都會出現少少徵兆（例如流啡、胸部脹痛、腹痛等），不過其實呢D徵狀都未必每一次月經都會出現架，所以即使暫時未有感覺嘅時候，都無需太緊張 。頭暈雖然係懷孕初期嘅其中一個徵兆，但係其實身體亦都要好多其他情況有機會導致頭暈，例如壓力過大、睡眠不足等，所以都唔能夠單靠呢個徵兆，去肯定一定係由懷孕引起。
催經嘅意思，西醫角度方面，即係透過服用含有黃體酮嘅藥物，提高身體體內嘅黃體酮濃度。當藥物停止嘅時候，血液中黃體酮嘅濃度下降，就會令月經出現。而催經係需要透過打針／服藥去做嘅，一般需要你嘅月經已經延遲左3至4個月都未黎，並且排除懷孕嘅機會，醫生先會睇你嘅情況考慮有無需要催經。而中醫角度方面，催經可以透過服用中藥，或者針灸嘅方式，去改善身體氣血循環，令卵巢可以正常排卵，再令月經出現。不過，不論從中醫／西醫角度黎睇，都需要醫生了解你身體嘅情況，並診斷你嘅情況係有需要催經，先會再透過服藥，或者其他方式同你進行治療。 亦都唔建議自行服用某類食物／藥物催經，始終有機會反而影響個人體質，或者令身體情況更差～ 
只係黎遲左2日月經，相信都未有需要去考慮催經 ，一般醫生亦唔會喺呢個情況下開催經藥啊。
特別係如果你有服用到事後丸（高劑量荷爾蒙藥物），而催經藥都係荷爾蒙藥物，暫時只係黎遲月經2日的話，醫生都唔會開催經藥比你 
。服用完事後丸後，醫生一般都會約你大概一個月後覆診同埋驗孕。如果你果個時候月經依然都係未黎，即使驗孕後，結果顯示係無懷孕，醫生都唔會即時就開催經藥比你。一般醫生都會建議再觀察多一個月，月經都係未黎的話，先會再考慮有無需要。
所以如果依家依然都係好擔心有懷孕風險的話，都建議／提醒可以先考慮進行驗孕啊 因為一般受精卵著床需要6-9日，所以性行為11日後嘅驗孕結果，已經係可靠同埋準確嘅
我就係無食到事後丸 所以先擔心會唔會有左
我依家都唔知點算好 淨係想快啲嚟M
如果無服用到事後丸的話，都想問問之前有無驗孕？驗孕結果係點？
否則，好擔心的話，暫時都建議儘快去買驗孕棒驗孕先啊 如果最近發生嘅唔安全性行為，都只係20/7 post提及嘅果一次，依家驗孕嘅結果已經係可靠同埋準確架啦 
另外，正如之前提及過，情緒有起伏、壓力過大等因素，都有機會係月經來遲嘅原因。留意到你因為今次嘅情況，都好擔心同埋憂慮 ，所以月經遲左少少黎嘅原因，都有機會係因為情緒方面引起啊。如果驗孕結果係顯示無懷孕的話，都相信有助令你心情平復番D ，令月經快D出現。而如果顯示真係懷孕的話，都可以讓你同伴侶有更多嘅時間去考慮未來懷孕／終止懷孕嘅打算啊。
今朝黎左M啦 唔該曬你
1個讚