好想問其實懷孕係唔係真係咁易。每次同女朋友做愛果時都好小心，例如由頭到尾到戴套、戴之前會洗手先或確保我無接觸過自己下面、戴果時都只會掂住個套拉落去、用手幫佢之前會諗清楚有無摸到自己等等。
但係每次事後我都會好不安，好驚好驚唔知咩程序大意左，例如用左套都驚前列腺液會由個套倒流，導致佢坐係我上面果時佢下面會接觸到倒流嘅前列腺液。
我明白只要有性行為就一定有風險，但我想知其實係唔係真係咁易會懷孕，因為網上面個個都話：戴左都有左bb，又話：避孕套得九十幾percent 安全，其實冇用。定係只係我心理問題？
Hello @fuckmylife 
好欣賞你每次同女朋友發生性行為嘅時候，整個過程都會好小心，避免懷孕嘅風險～ 只要整個性行為過程中係有正確戴好安全套，性器官亦無直接接觸過對方嘅體液，其實懷孕嘅風險真係好低。
男用安全套方面，避孕成功率分別為98%（perfect use，完全正確使用），及82%（typical use，一般使用）。換言之，只要正確依足指示戴安全套，用後安全套亦無破裂，其實懷孕嘅機率真係好微啊。如果就戴套方面嘅步驟有疑慮，都可以睇我地以下嘅文章，內容有詳盡咁講述正確戴安全套嘅方式，同埋注意事項。 
《Stickypedia系列－安全性行為：第一寶》－安全套
就體液（例如精液、尿道球腺液 Pre-cum）倒流方面，如果安全套嘅尺寸係合適，就好少會出現倒流嘅呢個機會。除非你射精後，並無即時抽出，咁就有機會持續抽插嘅過程中，精液倒流出黎。安全套尺寸合適嘅時候，亦唔會出現安全套因太鬆，而出現甩套（安全套殘留於女方陰道內）嘅情況，令精液於過程中漏出。
如果想搵自己合適嘅安全套尺寸，其實都好簡單。 
安全套嘅闊度一般都有分M size、L size、XL size等唔同尺寸，一般以mm為單位（例如52mm ± 2mm）。如果過往買安全套之前，都未試過度陰莖尺寸的話，建議可以先度度陰莖嘅圓周 
量度嘅方法，就係當陰莖勃起嘅時候，可以用一個卷尺（或類似嘅物件，如繩），圍陰莖一圈，去得出陰莖嘅圓周。然後將 圓周除2，就係安全套所指嘅闊度 。因為安全套係有彈性，所以就可以選擇比實際尺寸細少少嘅安全套款式，比較可以避免安全套滑落嘅情況～
最後，如果以上有關男用安全套嘅資訊，都未能消除你對懷孕嘅不安感，其實都可以同女朋友討論，會唔會佢都想考慮服用口服避孕藥，去進一步提高避孕成功率。因為本身避孕藥嘅避孕成功率可達99%（perfect use，完全正確使用），及91%（typical use，一般使用）。即係如果安全套配合避孕藥一齊使用，雙重保護，咁避孕嘅成功率就會比起99%（perfect use）更加高 
如果你就安全措施方面，仲有其他嘅疑慮，都好歡迎你繼續詢問我地啊
但係98%呢個數係點樣計出黎架，係唔係單次98% 如果係嘅話姐係其實戴安全套都唔係太安全
之前睇話避孕藥係好處多，但我女朋友都會有個感覺係我要令佢食藥咁，所以即使知避孕藥係對身體好，我亦然唔想逼佢。另外我想問如果撇除人為疏忽(例如正反面錯左都照用同一個等等)，點解就算戴岩安全套成功率都只有98% 而唔係更高
應該咁樣講，現時除咗唔發生性行為或者永久結紮等等嘅方式，無任何一種安全措施係可以做到100%完全安全。就好似安全套咁，98%呢個數字係指係正確使用之下，安全套基本可以做到嘅功效。但即使係完全正確地使用（跟足步驟、揀啱呎吋等去減低人為嘅意外），依然唔能夠完全排除出現其他意外嘅機會，例如係過程中意外破裂、原廠製造完已經意外有小破口係安全套上面、或者存放方式導致安全套係使用前已經出現破損等等。安全套一旦唔能夠完全隔絕性器官之間嘅接觸，就會令分泌物有機會直接接觸到陰道，有機會造成懷孕（或者接觸到其他身體部份，導致性病嘅傳播）。
避孕藥嘅避孕功效會更加高，唔會有「意外破裂」等等嘅原因而導致失效，一般會令避孕藥失效嘅原因都係因為漏食藥或者本身身體唔適合呢一款藥物（主要係人為因素），相對上會比安全套較少出現意外，所以避孕功效亦會比較高。
不過上面所講一啲安全套非人為導致嘅意外其實都唔係咁常見，一般只要減低人為錯誤出現嘅機率，已經會有好足夠嘅安全性。如果你哋覺得安全套都未必夠，考慮埋同時服食避孕藥都係一個可行嘅選擇。至於你話伴侶會覺得「係你令到佢要食藥」，其實都可以同佢溝通一下佢心目中對於做安全措施嘅睇法。我哋覺得無論係咩狀態下（例如係性伴侶、情侶或者夫婦都好），做安全措施或者選擇邊一款安全措施都唔應該只係單方面嘅責任。應該係所有人係溝通後，達成共識而做嘅決定。考慮食藥，都唔係你「要求」或「強迫」伴侶去做，食藥亦唔代表之後就唔用安全套。可以嘗試同對方分享下你自己對於現時所用嘅安全措施成效，或者擔心可能會懷孕嘅憂慮，再睇下伴侶對你啲事情嘅睇法。如果伴侶覺得現時用安全套就已經好足夠，好安心，咁的確係唔可以強迫對方服用藥物。呢個時候就可以睇下從其他方式去減低人為意外，去提升安全套嘅安全性啦～
多謝你咁詳細咁講解，但係如果做完愛之後我用水同吹氣檢查安全套，冇穿嘅話其實係唔係就代表100%安全？因為冇精子穿過到安全套。
因為每個人嘅性行為方式、步驟、所用嘅工具、情況等等都會唔一樣，因此好難同你安全套無穿無爛，依足步驟就一定係100%安全，好似 @Kitty_StickyRiceLove 咁講：
即使你有用水同吹氣檢查安全套確認安全套係無破裂，亦都好似你咁講安全套內嘅精子無穿過咗安全套而接觸到陰道，都有機會因為其他步驟上面出現意外而導致懷孕嘅，例如係戴安全套嘅時候唔覺意將尿道球腺液沾係手上再用同一隻手去戴安全套，然後係好短時間內就馬上有插入式性行為；又或者安全套太大，精液係旁邊漏出而且掂到唔小心入到陰道內；射精後無拔出陰莖，待疲軟後先拔出，安全套內嘅精液有機會進入陰道等等好多嘅原因，如果能夠避免曬所有嘅原因嘅話，其實成功避孕嘅情況都好大嘅。 
但係都想同你講返，有時「意外」就係意料之外，係你無留意到嘅小步驟出現咗差池，而安全套呢種物理上嘅避孕方法就真係會有出現呢啲人為意外嘅風險，可能真係你之前都做得好好，但係就係最後嘅一步唔小心無留意唔知道嘅情況下，精液進入到陰道裡面，出現意外懷孕嘅情況。
你可以選擇一啲荷爾蒙嘅避孕方法，例如事前避孕藥或者避孕針等等，其實避孕嘅成效都會相對上高啲，因為可能出現嘅人為意外會比較少，除咗你漏咗食藥或者打針之外，當身體適應咗藥效之後就唔會出現呢啲人為嘅意外架啦。
如果你想再提高避孕嘅成效嘅話，其實都可以使用兩種或以上嘅避孕措施，例如荷爾蒙避孕+安全套嘅組合，其實都好多人會咁做去提高避孕嘅成效。
都好想知道係咪發生過咩事令你好堅持要搵到一個100%嘅避孕方法？如果你唔介意都可以係度分享俾我地聽架，糖不甩嘅大家都好願意同你一齊分擔架。
我咁驚係因為我地又未去到談婚論嫁嘅年齡，但係愛情之間其實好多時都會有性。我地唔係果啲對性好隨便嘅人，其實應該要喺有能力承擔懷孕嘅時候先好做呢啲野，但係如果要我地冇性又真係冇咩可能。所以我成日都好矛盾，每次做完都會驚。我都明白果句「驚你有做」嘅說話，但其實真係有咩辦法可以安心咁過性生活，又或者點樣可以令自己冇性，好難。我地已經盡量避免可能一個月先有一至兩次。
都好明白你對意外懷孕嘅擔心。
其實喺冇使用避孕措施發生性行為後都未必會懷孕，只係風險會比較高。因為懷孕需要同時滿足三個條件：1、有健康嘅精子和卵子；2、精子卵子成功相遇並受精；3、受精卵成功在子宮著床。而即使受精卵著床，都唔代表可以有胚胎發展。懷孕看似好容易發生，但其實有好繁複嘅過程，受住好多唔同因素影響。而正因如此，每年都會有伴侶要經過幾次嘗試，甚至尋求專業輔助先可以成功懷孕生育。 
但使用安全措施可以大大減低意外懷孕風險。你話自己未準備好面對生育，所以都好欣賞你會堅持使用安全套，減低意外懷孕風險嘅同時，都會大大減低性病及其他感染風險。對自己同伴侶都有份保護。
你都可以考慮@Kaleo_StickyRiceLove 所介紹嘅荷爾蒙避孕法，配合埋安全套一齊使用加大避孕成功率。
你可以選擇一啲荷爾蒙嘅避孕方法，例如事前避孕藥或者避孕針等等，其實避孕嘅成效都會相對上高啲，因為可能出現嘅人為意外會比較少，除咗你漏咗食藥或者打針之外，當身體適應咗藥效之後就唔會出現呢啲人為嘅意外架啦。 如果你想再提高避孕嘅成效嘅話，其實都可以使用兩種或以上嘅避孕措施，例如 荷爾蒙避孕+安全套嘅組合 ，其實都好多人會咁做去提高避孕嘅成效。
雖然現時除咗禁慾之外，所有避孕措施都唔係100%嘅成功率，但是正確使用嘅情況下都可以大大減低意外風險。可以唔需要太過擔心。
正如你所講，你同伴侶之間都好難唔發生性行為。性其實係生活中嘅一部份，人有性需求亦係好正常嘅事，所以你都唔需要咁擔心，亦唔需要過份壓抑自己嘅性慾。如果而家心理都係未準備好發生插入式嘅性行為，可能你都可以同伴侶溝通，做低懷孕風險嘅性行為，例如口交和手交。又或者你可以同伴侶溝通下你嘅擔憂，並且設想下如果真係發生咗意外懷孕你哋會想點樣面對（除咗生育之外，現時香港有提供終止懷孕手術、領養和寄養服務），達成共識之後可能都幫助到你舒緩緊張焦慮嘅情緒。
希望你喺了解完之後可以放鬆到心情，同埋可以同伴侶溝通下選擇返合適嘅避孕方法，堅持每次發生性行為時候都正確使用，咁就可以安全咁享受性歡愉。 