你好呀
我食咗一個月的事前丸，係食21粒停7日嗰種。我由11/8開始停藥一星期，13/8就嚟m。第一日好少m，14/8就有返正常量的m。我喺琴晚即18/8 開始食第二盒藥，琴日應該係嚟m第六日，尚有小量血。然後喺食完大概3個鐘後發生無套性行為，但外射。想問這樣會有懷孕的風險嗎？
感謝
Hello~ 初次服食事前避孕藥除左首7日性行為嘅時候需要外加避孕方法(e.g.避孕套)之外，之後嘅日子只要定時服藥藥效都係會正常發揮，懷孕嘅機會都係唔大嘅(根據研究資料，女性第一年服食事前避孕藥後的嘅意外懷孕機會為 0.3－9%)，因為避孕藥所含嘅人造荷爾蒙可以抑制卵巢排卵、令子宮內膜產生變化，使受精卵無法著床，同埋增加子宮頸分泌物嘅黏稠度，令精子難於穿過黏液，進入子宮腔內。即使喺停藥期間，藥效依然會持續，所以你嘅情況懷孕嘅機會係好低嘅 
不過因為月經期間陰道嘅抵抗力較弱，喺依段時間發生性行為比較容易感染細菌以致陰道炎，所以都建議使用返安全套，另外，因為避孕藥並無防止感染性病嘅功能，所以使用安全套可以提升性行為時保障 
參考資料: https://www.famplan.org.hk/zh/health-info/contraceptive-methods/oral-pills
明白，所以我而家嘅狀況係唔需要擔心？
另外仲想問一問suppose停藥期間呢7日係會m come，咁其實係咪經期期間內進行性行為不論第一日定第五/六日，都係無懷孕風險？而停藥期間藥效都會持續？
感謝你嘅詳細答覆
係阿你嘅情況懷孕嘅機會好低，唔洗太擔心阿 
因為喺有持續同定時服藥嘅情況下，即使喺停藥期間藥效依然會持續，所以並無所謂嘅安全期(整個經期都係安全期)，只係月經期間發生性行為嘅話陰道較易感染細菌，所以建議使用安全套保持衛生
仲有個問題，唔好意思好似好多問題咁。
因為講到我開咗第二盒藥嚟食，而我呢個月轉咗第二個牌子（美意避）但同一生廠商只係劑量較低。我想問會唔會對避孕嘅功效有所影響？
本身我上個月（即第一次食）喺家計會攞藥攞咗安意避，但呢個月唔得閒攞，加埋食安意避好似令我情緒有啲波動，所以自己去藥房買咗第二個牌子，但因為我上網睇呢兩款牌子幾乎一樣，只係美意避係ultra low。
睇返你嘅情況，如果食藥令你嘅情緒有啲波動嘅話，其實有機會係因為個劑量對你嚟講太大，你已經換咗嘅話，可以照食一個月先，但係最好換藥嘅頭7日都另外使用多一個安全措施，因為身體要適應新嘅藥物，避孕嘅效果係初期可能比較唔穩定。但係7日之後都唔洗咁擔心，避孕功效都一樣嘅，因為即使係ultra low都好，其實份量都係足夠嘅。
建議你食完呢盒藥之前約返家計會，你之前已經約過一次嘅話，其實都可以再打返電話去約醫生同埋買藥嘅。上去同返醫生講你嘅情況同埋換咗隻藥，最後帶埋新藥嘅包裝盒上去俾醫生睇下。避孕藥嘅劑量要食幾多，都係建議你去返醫生度睇下隻要啱唔啱你食，因為每個人嘅身體狀況都係唔同嘅，所以究竟要食幾多都係建議你去睇下醫生同醫生傾返。 
當見完醫生同埋醫生都覺得無咩大問題嘅話，都可以係家計會買返同一隻藥嘅，比起出面會平啲嘅。同埋第一次家計會通常都俾你買3個月嘅藥試下，睇下會唔會有咩特別嘅情況，如果都OK嘅話，之後就會俾你買半年甚至一年嘅份量架啦。 
18/8有性行為當日係我開第二盒新牌子嗰盒藥食，見
到你話初期避孕嘅效果可能唔穩定，咁嗰次性行為會唔會有風險？定其實上盒藥嘅藥效會持續，所以唔需要擔心？
初期避孕效果會可能會唔穩定一般係指初次食藥（即係第一個月）嘅時候，所以一般都會建議即使係月經期望就開始食藥，頭7日依然要額外使用安全套去提高避孕功效。但你已經係食到第二盒藥，如果上個月都有keep住準時食藥、無試過漏食藥、亦無出現嚴重副作用嘅話，避孕功效已經存在於體內，所以唔需要擔心呀 只要記住每日都係相同嘅時間食藥，無論月經完咗未只要已經完成一包藥都接住開始食第二包，基本上都係可以維持到避孕功效架。頭3－6個月一般都係適應期，月經未必每一次都會喺停藥期間出現或者完結，但只要持續地服用藥物，身體都會慢慢適應，達致將月經變得規律化～