尋日係嚟m最後一日，男朋友冇帶套咁插左一陣，冇內射。但係都係有啲怕途中有前列腺液流出，請問有冇需要食事後藥？thanks
Hello~ 首先想你知道月經期間都唔一定係所謂嘅安全期，因為經期本身係會受好多因素影響嘅，例如生活習慣改變、生病服食過藥物、心理壓力大等等，所以每個月排卵嘅時間有機會唔同，亦都有機會撞正月經期間排卵，而且精子可以喺體內存活2-3日，所以月經期間發生性行為都依然有懷孕嘅風險嘅。
另外，男性係受到性刺激嘅時候陰莖會自動分泌一啲透明同黏黏地嘅液體，叫做尿道球腺液 (前列腺液係乳白色嘅，係精液嘅一部份)，當中都含有少量精子，所以即使係體外射精都有機會懷孕。
照你所講嘅情況，的確係有懷孕嘅機會，而因為緊急避孕丸喺香港係必須經醫生處方嘅，所以建議盡快去睇醫生拎取避孕丸。緊急避孕丸分為單一荷爾蒙（黃體酮 ）同黃體激素受體劑兩種，單一荷爾蒙嘅服藥時限為性行為後嘅72小時內，越遲服藥，失敗率越高；而黃體激素受體劑服藥時限就係性行為後嘅120小時內，服用時間唔會影響效果。所以如果決定服用嘅話，可以到家計會、母嬰健康院、婦女健康中心、婦科診所或者私家診所向醫生拎取，有關緊急避孕丸嘅詳細資料可以參閱以下網址：https://www.famplan.org.hk/zh/health-info/contraceptive-methods/emergency-contraception
另外，如果現時未有計劃生育嘅話，建議每次性行為時都使用返避孕方法，而月經期間發生性行為時亦都建議使用返安全套，因為月經期間陰道較脆弱，以致性行為時較易感染細菌，而安全套係唯一可以防止細菌同性病感染嘅安全措施。你可以同伴侶傾下邊種避孕方法較適合你地，有關唔同避孕方法嘅資料可以參閱我地IG/Facebook/網站上【糖不甩x藥劑連線：女性健康專題 】 系列入面有關避孕方法嘅文章。提提你地性行為需要雙方有共識嘅情況下進行，所以避孕方法同樣都需要大家嘅共識而唔係單方面決定架 