擔心ing⋯

28號同男朋友扑左,有帶套但係佢冇抽出嚟射。嗰日係我嚟完m嘅第四日,之後嗰日好多分泌物。想知咁樣會唔會有事:sleepy:

Hello @Arrrr :blush: 如果性行為整個過程中有正確戴好安全套,而性行為後抽出嘅時候,亦都肯定安全套係無穿到的話,你嘅情況相信懷孕風險都係好微,可以放心啊 :relaxed:

有依足正確步驟戴安全套的話,其實無需射精之前抽出嘅。 :grinning: 一般安全套嘅設計係有儲精囊,所以係有顧慮到使用者射精之後先抽出。當然你都可以選擇戴安全套嘅時候,射精前都就已經抽出,咁就可以避免到安全套因為射精時衝力太大而破裂嘅風險(如果戴套前手指有按實儲精位置先開始戴套的話,呢個機會率本身都好微嘅)。不過要留意嘅係,對於部分男性黎講,每次射精前都要算好時間抽出先射精,有時都會有一種無形嘅壓力或者焦慮感,有機會影響日後嘅性表現或者射精情況。另外,有戴套嘅情況下突然抽出,其實都會有機會反而比單單使用安全套射精後抽出嘅風險大。因為好多人會於呢個突然抽出嘅過程中,無按住安全套開口位置就抽出,導致安全套意外甩左/殘留於陰道內,令安全套裡面嘅分泌物流出 :disappointed_relieved:

所以都建議同男朋友討論一下未來係咪都希望有戴安全套嘅情況下,都係抽出先射精,還是選擇於體內射精後先抽出 :wink: 因為本身有正確使用安全套的話,其實會導致懷孕嘅風險已經係好低- 男用安全套避孕成功率分別為 98%(perfect use,完全正確使用) ,及 82%(typical use,一般使用)。真係擔心安全套懷孕風險都係唔夠低的話,都可以考慮配合荷爾蒙避孕法(例如服用口服避孕藥/打避孕針)使用,咁就可以進一步減低懷孕嘅風險~ 口服避孕藥嘅避孕成功率可達99%(perfect use,完全正確使用),及91%(typical use,一般使用) :blush:

而你所指嘅分泌物大概係咩顏色/質感? :blush: 如果係透明/純白色的話,就有機會係巴氏腺液 -性興奮嘅時候,女性巴氏腺(Bartholin‘s Gland)會分泌出液體,作潤滑作用,係透明或者純白色。可能係性行為後,陰道依然殘留左巴氏腺液,所以之後果日流出。另外,因為你有提及到係黎完月經後第四日發生性行為,所以都有機會之後一日出現嘅分泌物係排卵期出現嘅白帶 -排卵期嘅時候,白帶會增多,亦可能會同平日嘅白帶有D唔同,會比較有彈性,甚至出現「白帶拉絲」嘅情況,類似果凍/蛋清狀嘅分泌物。你嘅分泌物如果同以上其中一種分泌物相似的話,都無需太擔心啊 :two_hearts: :two_hearts: 同埋,即使係懷孕,亦唔會咁快性行為後第二日就出現同懷孕相關嘅症狀 :see_no_evil:

如果你都係好擔心有機會導致懷孕的話,可以選擇性行為11日後驗孕。一般受精卵著床需要6-9日,所以性行為7日後驗孕已經可以有初步結果。而性行為11日後驗孕,就會比較準確同埋可靠啦 :relaxed:

分泌物係白色嘅 不過有彈性嘅
另外呢,因為我同男朋友都係第一次。過程中有用手check過個套,不過之後冇掂過我嘅私處。咁樣嘅話 我估懷孕嘅機會應該唔大(?

雖然男性喺性興奮嘅時候會自動分泌一啲透明而黏黏地嘅液體,叫做尿道球腺液,當中都含有少量精子嘅,但係因為精子接觸到空氣之後通常幾分鐘內就會死亡, 所以即使你男朋友隻手當時有尿道球腺液而接觸到個安全套,之後使用嘅時候將精子帶入陰道嘅機會係好微嘅,唔洗太擔心 :blush: 如果想了解多啲安全套嘅正確使用方法可以參閱返我地ig/facebook《Stickypedia系列—安全性行為:第一寶嘅》嘅文章同影片 :relaxed:

唔該哂你呀。每次問問題都咁詳細解答。放心左好多:sob: