咁樣會唔會有bb?

今日同男朋友sex 佢帶套帶反咗之後調轉返
但佢話佢個陣龜頭好乾 未有前列前液
我應唔應該食事後丸?

同埋我宜家係排卵期 好擔心 :sob:

陰莖性興奮嘅時候,已經會分泌出透明嘅尿道球腺液(Pre-cum),內含少量精子,係有機會導致懷孕。分泌物有機會於你男朋友戴第一次嘅時候已經接觸到安全套,並於翻轉後直接接觸到你嘅陰道,導致有懷孕嘅風險。加上你提及到依家係處於排卵期,所以懷孕嘅風險都係存在嘅 :cry:

雖然你男朋友有提及過當時龜頭好乾,未有尿道球腺液嘅出現(前列腺液一般係伴隨精液射出,唔會於性興奮時單獨分泌出黎),但係始終好難單憑肉眼、觸覺,就能夠確保100%係無任何尿道球腺液分泌過出黎,所以我地都唔能夠單憑呢個情況,就話係無懷孕嘅風險 :pensive:

因為距離你嘅性行為係未夠120小時(服用緊急避孕藥嘅最長時限),所以都建議儘快睇醫生,諮詢醫生意見,睇睇有無需要服用緊急避孕丸(事後丸),或者你嘅體質係咪適合服用緊急避孕丸。因為緊急避孕丸喺香港係醫生處方藥物,所以暫時只能夠透過去家計會、母嬰健康院、婦女健康中心、婦科診所或者私家診所從醫生攞到。緊急避孕丸分為單一荷爾蒙(黃體酮 )同黃體激素受體劑兩種,單一荷爾蒙嘅服藥時限為性行為後嘅72小時內,越遲服藥,失敗率越高;而黃體激素受體劑服藥時限就係性行為後嘅120小時內,服用時間唔會影響效果。

有關緊急避孕丸嘅詳細資料,可以參閱以下家計會嘅網站 :blush:

當然最後如果你自己平衡過風險,覺得無必要去攞事後丸的話,都係可以嘅。 :blush: 但係都建議性行為11日後進行一次驗孕。一般受精卵著床需要6-9日,所以性行為7日後驗孕已經可以有初步結果。而性行為11日後驗孕,就會比較準確同埋可靠啦 :relaxed:

同埋日後發生性行為嘅時候,亦都要記得戴反左安全套,就要立即丟棄,唔好翻番轉黎繼續使用啊~ 有關分辨安全套正反,同埋其他正確戴安全套嘅步驟,都可以參與我地以下寫過嘅文章 :blush: :relaxed:

《Stickypedia系列-安全性行為:第一寶》安全套: