Hello!
我食咗事前藥都有差唔多兩個月，仲有六粒就食完第二盒，一直準時加無漏食過。琴日同男朋友發生性行為，無套，但唔肯定有無內射。因我發現佢有小小射咗落張床到，佢聲稱係pre shoot。而我都有發現我下體有佢啲精液，但佢同我講係無內射。我估係佢射完小小落床到然後再插入嚟時留低咗啲精液。我想問咁樣會唔會有懷孕嘅風險？就當佢真係有內射，懷孕風險高定低？
雖然我都食咗就嚟兩個月，但唔知點解每次性行為時都仲係會擔心，但其實我一直都有準時同無漏食。身邊有朋友都有食事前藥而且內射都無事。其實會唔會一切都係我過度憂慮？
Hello~ 口服避孕藥透過人造荷爾蒙抑制卵巢排卵，令子宮內膜產生變化，使受精卵無法著床，同埋增加子宮頸分泌物嘅黏稠度，令精子難於穿過黏液，進入子宮腔內，所以喺持續同埋定時服用嘅情況下，成效係非常高嘅—typical use 一般使用嘅意外懷孕機會係9%；perfect use 正確完美咁使用嘅意外懷孕機會係0.3%。而照你所講嘅情況，你有持續定時咁服食避孕藥，所以懷孕嘅機會係好低嘅，唔洗太擔心 
希望了解左避孕藥嘅原理之後可以令你放心啲啦 
仲想問呢如果間中晚上有食鼻敏感藥，同事前藥服食時間相差兩個鐘或以上，會唔會對避孕功效有影響？
一般如果需要同時其他藥物，特別係服用抗痙劑、抗生素或鎮靜劑時，會建議服用先諮詢醫生意見 
，因為部分藥物係有機會會干擾口服避孕藥嘅藥效。
因為有關鼻敏感藥物嘅詳細成分我地都唔太清楚，未能夠肯定藥物成分會唔會對避孕功效有所影響。如果你嘅鼻敏感藥係醫生處方比你嘅藥物，建議先詢問醫生鼻敏感藥物內嘅藥物含量包括咩成分，睇睇會唔會有機會影響避孕藥功效。有機會影響的話，就需要考慮性行為時另加其他安全措施（例如安全套），避免避孕藥藥效失效。或者可以嘗試同開藥嘅醫生討論有無需要調整藥物。
或者你服用呢一款事前避孕藥之前，有無諮詢過家計會醫生／其他婦科醫生嘅意見？ 
因為一般家計會醫生建議你食呢款事前避孕藥之前，應該都有詢問過你過往嘅長期服藥嘅習慣（例如有服用開鼻敏感藥物）。如果之前係有分享過比醫生知道你有服用嘅邊一款鼻敏感藥的話，應該醫生建議你服用呢款避孕藥嘅時候，都已經有考慮到會唔會出現藥物交互作用嘅問題，咁就無需擔心會影響避孕功效嘅 。
如果藥物係平日坊間買嘅成藥，就建議向家計會預約，諮詢一下醫生嘅意見，確認一下你現時身體嘅狀況係咪適合服用避孕藥，或者依家服用嘅成藥會唔會影響避孕藥嘅功效。
或者你依家都好擔心會有影響的話，都可以嘗試打開避孕藥盒內嘅說明書。說明書內一般都會提醒該款避孕藥，係唔適合同含有邊啲成分嘅藥物共同服用。然後，就可以對照一下鼻敏感藥物成分入面，有無出現避孕藥說明書上有指出嘅藥物成分。如果表面上都無撞到唔適合嘅藥物成分，都無需太擔心嘅。安心起見，就睇醫生諮詢一下醫生嘅意見會比較好 
。
同埋，都想了解你鼻敏感嘅原因係咩？ 例如係咪本身／最近身體有出現特別嘅狀況，還是對某類致敏源影響？因為如果本身身體係有特別嘅狀況，都有機會影響避孕藥嘅情況啊。