關於性交恐懼

你好,我跟女朋友都相處一套長時間,但也一直未有性行為,主要因為看到網上很多人都討論戴套都穿問題,令到我地既性生活好困苦。

我都有在網上睇過好多正確戴套方法,亦有諗買d 便利店賣既安全套加寫明類似雙保險保護性高既功能應該好安全,因未有經驗,只求安全體驗,不求薄既刺激過程。

但我又會諗好多野導致唔敢開始,
1。我可能事前會確保雙方手洗/抹乾淨,先戴套,但如果戴套後發現慢慢軟,用手掂住套刺激返,會唔會變相抹走晒d潤滑液?

2。戴套前禁實頂端排走空氣,如果禁極都未排得晒,大力禁會唔會影響左安全套功能?

3。如果成個過程都好小心跟返教學正確使用安全套,係唔係需要在計算下的安全期進行性行為先加倍安全?

最後想問進行前/後有冇咩需要留意?

Thx回覆:pray:

Hello @Dick2004 :relaxed: 睇番數據,第一年使用安全套呢種避孕方法後, 意外懷孕機會為2%(perfect use,完全正確使用),同埋18%(typical use,一般使用)。 所以只要有正確戴好安全套,同埋透過使用潤滑劑減低安全套因摩擦而破損嘅機會,其實安全套嘅失敗率係好低嘅,無需太擔心 :two_hearts:

  1. 性行為前清潔好雙手,保持個人清潔係好好嘅第一步! :grinning: :+1:t2: 如果擔心安全套上嘅潤滑劑會於性行為過程中抹走曬,其實可以考慮另外買其他嘅潤滑劑使用(例如KY/其他牌子嘅潤滑劑)。好多時其實性行為時間長/伴侶下體分泌物有時比較少嘅時候,都可能有需要另外買潤滑劑使用。使用潤滑劑一方面可以減低性行為時因摩擦而造成嘅疼痛感/不適,另一方面都可以減低安全套破裂嘅機會~ 不過要留意番油性潤滑劑係會破壞乳膠安全套嘅物料,所以油性潤滑劑係唔能夠配合安全套使用啊!買水性/矽性/水矽混合嘅潤滑劑就無問題啦 :relaxed:

  2. 其實好多時安全套頂端已經會設有儲精囊,儲精囊只需要用手指頭輕輕壓住,就已經可以排到曬頂端嘅空氣,然後再將安全套套到陰莖底端,就無問題架啦 :relaxed:。所以無需太擔心會排唔曬安全套頂端嘅空氣~

  3. 係啊,其實如果整個過程有依足正確步驟使用安全套,意外懷孕嘅風險已經係好低,無需太擔心。因為月經週期有好多原因可以導致出現變化 ,例如最近呢個月有生病服過藥、飲食唔均衡、生活唔定時、情緒有起伏、壓力過大等原因,都會令黎月經週期變長/變短。所以我地亦唔建議透過安全期計算法,推測「排卵期/安全期」,去發生唔安全嘅性行為啊~ 當然喺使用安全套發生性行為嘅情況下,配合埋安全期去減低懷孕嘅風險,都係可以嘗試嘅。但係其實都要提醒番呢個推斷出黎嘅「安全期」未必準確,只係能夠令你安心少少。

進行前,最主要都係要記得挑選好合適自己陰莖尺寸嘅安全套。進行後,亦都要記得射精後就抽出陰莖,並與女朋友身體保持一段距離先好除安全套,避免除嘅過程中精液會意外漏出,漏到女朋友嘅身體/性器官上。部分人亦會選擇性行為後將安全套裝水,測試一下安全套有無穿。 :blush:

其他詳細嘅戴安全套步驟/注意事項,都可以留意我地之前嘅文章,文章裏面亦有戴安全套嘅示範片段 :grinning:

《Stickypedia系列-安全性行為:第一寶》安全套

如果對安全套/其他安全措施有任何疑問,都好歡迎繼續同我地分享啊 :relaxed: 希望可以幫助到你減低對安全措施嘅疑慮,放心發生安全嘅性行為啦 :blush: :two_hearts:

thx詳細解答,我會睇清楚ig使用方法再試試,thx

另有少量問題, 亦想查詢

1)有關 潤滑劑,想問一下,如果我驚買唔岩,或者好少會用既時侯,本身佢既潤滑功能應該夠嗎?
乳膠安全套 / PU物料,是否買乳膠安全套較好,潤滑夠充足?因為我都只會買D標榜雙保險/加厚果類安全套確保安全

2)我見大部份安全套都係約 52mm左右, 應該點樣量度先知 52mm是否足夠??

3)清潔方面,如果另一半覺得廁所有點遠,成日行來行去覺得麻煩冇晒mood既話,就咁係床到用
酒精濕紙巾+乾紙巾抹乾淨先再準備是否都達至安全效果?
如果濕紙巾抹乾淨,唔記得搵乾紙巾印返乾再立即觸摸戴套,酒精會否影響潤滑度?

唔好意思,比較多關心的問題,再次多謝糖不甩人員解答

Hello 都好開心見到你想知多啲關於安全套嘅嘢,證明你都好想對自己同伴侶有份保障,好好呀!:two_hearts:

  1. 大部分安全套本身都會附有少量嘅矽性潤滑劑,但其實份量並唔足夠整個性行為過程使用嘅。所以我地會建議每次發生性行為(特別係插入式)嘅時候都用返潤滑劑,減少安全套因潤滑劑不足而破裂嘅風險。因為女性分泌物受好多內在外在因素影響,未必次次性行為都會有足夠嘅分泌物潤滑(亦同愛唔愛伴侶無關係!)。:blush:如果擔心性行為頻率較低,開咗用唔晒會過保質期,令潤滑劑失效,可以試下去成人用品店選購,除咗有多啲選擇,好多時亦會有細枝裝提供:wink:
    想知多啲有關潤滑劑資訊(例如分類、使用方法)都可以參考下我地以往嘅Instagram post阿。:nerd_face:
    https://www.instagram.com/p/B5cf5Z9FCaS/?igshid=1t2q7lw8s255f
    https://www.instagram.com/p/B9GoJ5JFefM/?igshid=1m75swcgg78kl

材質方面,市面上大部分安全套都係乳膠製成,乳膠物料嘅好處係彈性高、耐磨擦同韌性好,不過最薄只可以做到0.03mm。而PU/PI物料則可以再薄啲,市面上0.02或者0.01mm嘅安全套都係由PU/PI物料造成嘅。對於乳膠敏感嘅人嚟講,PU/PI都會係一個替代選擇。但PU比起乳膠彈性無咁高,係喺潤滑不足嘅情況下就會相對容易因摩擦而破裂。不過都唔使太擔心,喺一般正常使用同有足夠潤滑嘅情況下,PU安全套破損嘅機會都唔高嘅!:wink:

其實只要喺整個性行為過程都正確使用安全套,風險都好低,厚度並唔係最可以確保到安全嘅因素:wink:但如果雙保險/加厚嘅安全套會令你感覺安心啲,都可以係你嘅選擇呀~

  1. 至於安全套嘅尺寸,一般會有兩個量度單位,分別係寬度同埋直徑
  • 寬度/闊度 (Nominal Width) 【歐美/香港常用】
    係指安全套擠扁時橫向嘅長度,數值上是 圓周 (Circumference) 的一半。可以透過量度陰莖充血時根部嘅圓周,將數字除二就會得出寬度/闊度嘅數字。

  • 直徑 (Diameter) 【日本牌子常用】
    係指安全套放平時時圓形嘅直徑,算術上 直徑 x 3.14 = 圓周 。可以透過量度陰莖充血時根部嘅圓周,再除以3.14,就會得出直徑嘅數字。

唔同牌子嘅安全套都會有生產唔同尺寸嘅安全套,購買嘅時候要睇清楚盒上面寫嘅數字係幾多,睇下符唔符合自己性器官嘅尺寸。前面亦提及過PU物料會比較貼身,所以係購買PU造嘅安全套時可以選擇比平日乳膠安全套細啲嘅尺寸,減低意外脫落嘅機會。除咗物料,唔同款式設計都會影響實際用感。而且唔同牌子嘅52mm係帶上去嘅感覺都有機會唔一樣,所以係試新款式嘅時候可以買細size(3片裝)試下先,真係合適先再買大盒嘅份量去使用啊~

  1. 清潔方面,如果手接觸到尿道球腺分泌物後,有抹乾淨手先使用安全套,係唔會影響安全套嘅效用嘅。雖然唔可以直接去洗手,但其實精子喺空氣中嘅存活能力好低,接觸都其他物質(例如紙巾或酒精)都好快會死亡,所以單憑酒精濕紙巾同乾紙巾清潔1都已經好足夠。由於酒精好易揮發,所以唔會影響安全套功效嘅:slight_smile:
    不過要記得避免用酒精濕紙巾接觸性器官,以免柔嫩嘅肌膚受到刺激,亦都避免酒精破壞女性陰部弱酸性嘅pH環境。同時建議喺發生性行為後去一去小便,減低尿道感染嘅風險。:slight_smile:

thank you 回覆,

請問男用有水果味的安全套,可以當口交+性行為使用嗎?

想問正確使用安全套,有98%安全,果2%係咩原因?

事前如何檢查安全套有沒有破裂?擔心有一小個洞看不到照戴,
還是未使用前頂部儲精位有空氣漲起來就等於品質正常??

thank you :slight_smile:

雖然啲安全套係水果味嘅,但係都未必可以口交用嘅,反而如果你唔介意膠味嘅話,普通安全套都可以用嚟口交嘅,可以加啲口交專用嘅潤滑劑去減低果種膠味。 :wink:

如果水果味道嘅安全套嘅話,通常上面會無乜潤滑劑,所以要用係插入式性行為嘅時候記住加少少潤滑劑落去。 :face_with_hand_over_mouth:

但係記住,千祈唔好用完呢個安全套口交,然後就用同一個安全套做插入式性行為,因為係口交嘅過程中,安全套有被牙齒刮破嘅風險,因此口交完之後就要換安全套啦。 :bangbang:

果2%係講緊係有正確使用嘅情況下,依然有機會出現失效嘅機率。可能係因為原本出廠之前已經有小孔,亦有機會係過程中有小破損而無發現到。 :x:

你可以係打開包裝之前將安全套擠向一邊,睇下包裝會唔會有漏氣嘅情況嘅,如果有發現漏氣,無論個漏氣嘅位置係邊度都唔應該繼續使用呢個安全套啦。 :wink:

其實想檢查到有無穿到好多時都要使用後先可以檢查到嘅,而且就算事前檢查咗之後都唔代表係過程中唔會因為意外而有破損,所以好多人都會係事後倒水入安全套裡面去檢查有無破損嘅。 :grin:

安全套未使用之前應該係捲好係鋁製嘅包裝裡面,撕開咗之後應該唔會有空氣嘅。同埋記住戴落陰莖嘅時候,要將安全套上面儲精位置裡面嘅空氣擠出,如果無擠出嘅話,有機會係射精嘅時候儲精嘅位置唔夠導致破裂架。 :relaxed:

多謝reply

試過買安全套,跟足您地ig教的安全套戴上使用方法,有些問題不明白,

其中一步是 (安全套上面儲精位置裡面嘅空氣擠出)
1)跟足step 輕力按實左,我按了3-5秒後再戴上,點解戴上後會有返個泡泡漲返起 係頂端到?
係味代表未完全排出空氣?
咁遇到此情況,係咪唔好性交,除左佢再按實再戴過?定要換過新的安全套再試?

2 )安全套如果口交冇穿的話,此品質 係味代表性交都唔會穿?<-如果溫柔的情況下進行
(不會口交性交用同一安全套)

3 ) 如果安全套冇指引話需要額外使用潤滑濟,其實係味有足夠潤滑作用做基本用途?
eg: 雙保險天然橡膠安全套

謝謝回覆

(1) 將儲精囊嘅空氣擠出前,要先將安全套套喺龜頭嘅位置,再一邊按住儲精囊嘅位置,一邊將安全套套至陰莖根部,咁就可以令安全套緊貼陰莖 :blush: 如果戴上後發現儲精囊嘅空氣未完成擠出嘅話,建議換過一個新嘅安全套再重新戴上,因為如果將安全套除出黎再戴過嘅話,有機會安全套已經接觸到陰莖上嘅分泌物,而再次戴上嘅時候可能會將分泌物戴進陰道,另外亦有機會令安全套鬆脫,減低避孕嘅成效。

(2) 因為口交同性行為時嘅磨擦程度同潤滑度需求都唔同,所以並唔能夠以此作標準,不過其實安全套喺出售之前係會經過唔同嘅品質測試嘅,例如係氣壓同注水測試,所以大部分嘅安全套都唔會喺性行為期間無故破損嘅,唔需要太擔心 :blush: 如果想測試安全套喺性行為後有無破損嘅話,可以注水入安全套內,如果無滲漏水就代表無破損啦 :relaxed:

(3) 需唔需要額外使用潤滑劑其實係視乎性行為時嘅情況同安全套種類而定嘅,例如如果該次性行為嘅時間比較長,安全套上嘅潤滑劑就可能會揮發得較多,因而需要添加潤滑劑。另外,一般PU物料嘅安全套(即係超薄類型嘅安全套)都會比較少潤滑劑,所以使用時就可能需要額外添加潤滑劑。當然亦都要視乎你同伴侶嘅感覺,如果你地都覺得性行為時嘅磨擦太過強烈嘅話,都可以額外添加潤滑劑。

1個讚

謝謝reply

1)請問正常套上去的話,是否不會看到儲精囊漲起,而是偏了貼在龜頭上?
2)謝謝,因為以為有水果味的就以為是口交用,不可性交用,原來可以2用。謝謝知識
3)想問如果我買的不是超薄,(只求安全,非薄到0.03那種)的安全套,一般都不需要加潤滑劑嗎?因為主要我跟伴侶也不是經常用,所以能建議些不需潤滑劑的普通安全套嗎? 希望可以想簡單點,只買安全套就可。
4) 想問安全期危險期是否不可作準?假如全程希用套且沒穿,即使處於危險期也不需擔心嗎?

又麻煩到你地解答,唔好意思, 感謝。

好欣賞你咁有求知慾,知道多咗相關知識希望可以令你喺使用安全措施嘅時候更有信心,亦可以探索到合適自己和伴侶嘅方法同產品! :heart:

1)如果正確使用安全套並且擠出空氣之後就應該唔會見到有漲起,唔會有明顯凸起。但儲精囊並唔會完全貼合著龜頭位置,而係會係前端,射精嘅時候先有空間存儲精液。

如果戴嘅過程中發現仲有空氣,可以調整下安全套,將空氣擠出。如果你戴完之後發現有漲起,證明儲精囊入面仲有空氣,都要用手指將空氣擠出。(如果你依然覺得有疑問都可以再同我哋講,我哋可以遲啲拍片擺fb/ig,等大家都可以了解多啲 :grimacing:

為咗避免插入式性行為時摩擦而導致安全套破損,記得插入前要確保儲精囊內冇空氣啦! :nerd_face:

2)記得口交時用過嘅安全套要換個新嘅先進行插入式性行為,以免口交時有機會造成嘅安全套破損影響避孕成效。而且都要注意,有啲口交專用嘅安全套並無潤滑劑同儲精囊,如果發現係咁,就記得唔好用嚟進行插入式性行為啦。

不過口交專用嘅安全套現時香港並唔常見,你可以選用普通安全套配合可食用嘅潤滑劑,或者使用口交膜。 :wink:

3)其實會建議每次使用安全套都配合潤滑劑使用。即使安全套上有潤滑劑,但係過程之中都會乾。喺潤滑不足嘅情況下,安全套有機會因為摩擦破損,伴侶亦可能感到痛或者唔舒服。所以都會建議購買非油性嘅潤滑劑(水性、矽性或者水矽混合)配合安全套使用。因為油性潤滑劑會令乳膠質地嘅安全套破損,亦有機會破壞陰道同肛門嘅酸鹼平衡,所以唔建議使用。(關於潤滑劑嘅更多資訊,都可以參考返糖不甩嘅fb/ig page)

其實而家有啲潤滑劑有細容量嘅選擇,亦都有啲牌子出咗有獨立包裝嘅潤滑劑,每包大概有一次性行為會用到嘅份量,方便攜帶同儲存。你可以去成人用品商店或者網店選購。

同時都建議如果試用新嘅牌子或者型號嘅安全套時,可以選購數量較少嘅(例如3片裝),嘗試之後再決定。每個人嘅喜好同感覺都會唔同,所以可能都要靠你同伴侶去嘗試唔同嘅安全套,從而搵到最適合嘅。 :relaxed:

4)其實並唔會建議使用安全期計算作為避孕方法,因為人嘅身體是一個非常複雜的系統,生理週期、排卵與否受好多因素影響。而且往往要等經期出現才能推算已發生嘅排卵期及安全期,無辦法準確預計下一個月嘅「安全期」。 :confounded:

如果有正確使用安全套,並且喺性行為整個過程都有使用,完結後亦可以確定安全套冇破損,咁就可以有好高嘅避孕成功率,即使喺排卵期都唔需要太擔心。 :two_hearts: