我食緊事前 21粒個隻 我第14日(3/9)唔記得食 1第二日補返 嗰陣陰道分泌已經有啲淺紅色 依家去到第16日(5/9) 啲血越嚟越多 好似嚟m咁
想問我仲應唔應該繼續食淨低嘅藥？
麻煩曬你哋
Hello @Hihibyebye 
首先，都了解番你服用呢款避孕藥之前，有無到家計會／婦科診所諮詢醫生嘅建議？ 
因為每個牌子／款式嘅避孕藥內含有嘅荷爾蒙類型同埋劑量都會有唔同，有機會某部分避孕藥唔適合你嘅體質，係有機會引致嚴重嘅副作用。 避孕藥亦並非每個人都適合服用 ，一般常見唔適合食藥嘅情況，例如有心血管疾病、不規律陰道出血、體重過高等。所以一般都會建議服用避孕藥之前，必須諮詢醫生嘅意見，等醫生評估你嘅體質／生活習慣，係咪適合服用避孕藥，或者適合服用邊一個牌子／款式嘅避孕藥。
另外，亦都想了解一下你係幾時開始服用呢款避孕藥？已經服用左耐？如果呢次係你第一次服用呢款避孕藥的話，你係月經期間第幾日開始食，還是月經後先開始服用？
如果係第一次服用呢款避孕藥，而亦係於月經期間開始服藥的話，服用初期出現陰道不規則出血（例如隔幾日會有少量點滴出血情況）係正常嘅副作用。不過睇你嘅情況，因為分泌物嘅顏色係淺紅色，而且係有持續流出（現時持續左大概三天），並且血量有越黎越多嘅跡象，日子上亦只係服用嘅第14日，未接近月經黎嘅日子，所以都唔屬於正常嘅現象。建議儘快聯絡之前諮詢開嘅家計會醫生／婦科醫生，睇睇係咪身體唔適合呢款避孕藥，有需要選用其他牌子／款式嘅避孕藥 。
第一次服用避孕藥的話，一般都會建議月經期間就開始服用，因為係最容易調節到月經週期。如果你係月經後先開始服用，中間亦曾經漏食過藥，其實都會比較容易出現副作用。特別係如果你係月經後過左一段時間先開始服用避孕藥的話，咁有機會你今次出血，就係本身呢個月自然會黎嘅月經，但係因為食左避孕藥所以加速左子宮內膜剝落嘅速度，變左早過過往預期嘅日子來經。所以都會建議你儘快去睇睇家計會／婦科醫生，了解今次出血嘅原因係咩，同埋有無需要調整避孕藥嘅服用情況 
Hello
我係家計會攞呢隻藥㗎 已經食咗3個幾月 之前都有試過漏服同出血 去過家計會複診 護士話係正常嘅因為我漏服
因為我係夜晚9點食嘅 無食藥個晚(3/9)之後嘅第二日(4/9)晏晝就有啲粉紅色分泌 到夜晚7點倒返到屋企就即刻食返藥 同一晚嘅9點再食 但個血量好似無少到 反而多咗
謝謝你講多少少你嘅情況比我哋知～如果係啱啱開始食藥頭幾個月之內都有試過漏食嘅情況的確有機會令周期變得唔完全規律，亦有機會會出現比較多副作用。頭幾個月身體需要慢慢去適應人造荷爾蒙，停止自行排卵同釋放荷爾蒙嘅。係身體未完全適應嘅時候如果漏服，會令身體以為唔會再有外來嘅荷爾蒙，引發身體想回復返自然釋放荷爾蒙嘅機制，所以更加容易影響週期同副作用嘅出現。
不過現時嘅情況你覺得出血嘅情況越來越嚴重，亦感覺同一般月經好想相似的話，其實都唔係常見嘅。建議你聽日打去家計會，盡快約見醫生檢查一下。
另外見到你都試過幾次漏服，可以試下下載一啲紀錄同有提醒功能嘅避孕藥Apps，希望可以改善到唔記得食藥嘅情況。因為避孕藥係需要持續定期地服用先可以發揮到最大嘅功效，漏食藥係最容易令避孕藥失效嘅原因呀。或者都可以考慮其他荷爾蒙避孕法，例如係打避孕針或者用子宮環，都係相對上唔需要每日都做一啲事嘅方法，可能會更加適合你嘅情況
多謝你哋咁詳盡咁覆我血量係無一般月經咁多嘅 但都有1/3
我聽日會去睇醫生㗎喇
1個讚