[長文]我擔心身體有問題

交代下資料:
我食yaz已經踏入第五個月,期間雖然有時會遲食,但唔會超過原定時間1小時
未食藥之前,我月經期為6日,頭3日一定要用夜用m巾,好多時仲會有血塊同漏m,第4日先開始減少
食藥之後,以下係我月經期:9/6-11/6(3日)、5/7-9/7(5日)、3/8-6/8(3日)、1/9-3/9(3日)
月經普遍第4日已經無血。

而我遇到嘅問題:
1)31/8當日我有流啡,之後1/9有血,4/9已經一滴血都無,想問流啡係正常嗎?呢3日係月經?

2)我8月中同男友發生性行為嘅時候,我感覺到陰道有啲腫痛(並唔係乾嘅痛)而且有時明明啱啱去完廁所,好快又有尿意,但尿液目察正常,無血、清澈,排尿亦無痛,但尿有啲熱(我體溫長期維持係大約36.5-7度)同間中外陰有啲痕。我仲覺得白帶開始增多(我自小自帶偏多,有時仲好似鼻涕咁「杰」,食藥後有減少稠度,比較似乳液)我之後仲成日覺得肚臍以下有谷m嘅感覺,肚脹脹咁,9月月經過後,我仍然有呢種感覺。

首先,我有穩定嘅性伴侶,而我仲係男友嘅第一個性伴侶,雖然我以前有其他性經驗,但結束關係後4個月後我有到社衞同關懷愛滋驗身,結果全部陰性,我亦有接種預防hpv子宮頸癌疫苗(中學接種,當時未有性經驗)。而且雖然有時會無套性行為,但每次性行為後,我都一定會在15分鐘內去廁所,然後沖涼。

因此我想問我白帶增多同腹脹係因為咩原因?懷孕?發炎?定其他?雖然我已經約好做婦科檢查,但距離檢查仲有啲日子,所以我想問下,等自己有啲心理準備:pray:t2:

你好呀 @5DN1L :wave:t2: :wave:t2:

1)食咗避孕藥之後經血量有改變,特別係變少,都係好常見嘅。因為避孕藥內嘅荷爾蒙會取代咗身體自然釋放荷爾蒙嘅週期,每個月所見到嘅「出血」其實係叫「撤退性出血」,同未食藥之前自然出現嘅「月經」其實唔係完全一樣嘅。而且藥物亦會令子宮內膜增厚嘅幅度減少,所以有好多人係食藥後會發現經血量變少、經期縮短、以及減少出現血塊。而月經前流啡係正常嘅,無論有無食避孕藥都好,都有機會係月經前流啡嘅。食避孕藥之後出現「月經」嘅時間一般係停藥期(最後4粒白色無藥效藥丸)之間,因為個幾粒藥物都不含荷爾蒙,體內荷爾蒙水平都會稍為下降,所以一樣有機會出現流啡架。 :blush:

2)首先如果你有keep住食避孕藥藥的話係可以排除懷孕嘅可能性,而且你暫時嘅症狀都唔係常見嘅懷孕症狀,所以唔駛擔心係因為懷孕。白帶量增加同埋係黏稠狀嘅話,的確有可能係衣原體感染。但因為你以往係轉換性伴侶嘅時候都有恆常進行性病測試,而測試結果一直都係無感染,所以暫時都可以排除係性病嘅影響。而陰道有腫痛一般都係因為陰道內有傷口或者發緊炎。有時雖然你感覺唔係好乾,但都唔排除之前曾經因為性行為摩擦導致陰道內有傷口,係未痊癒嘅時候再發生性行為就有機會再次摩擦到傷口,而令到傷口更難復原。而係無安全套嘅情況下更加有機會將病菌帶入陰道造成感染,以致你覺得痛。不過因為你無出現陰道發炎嘅跡象,例如分泌物顏色改變或者覺得陰道內痕癢刺痛,所以就咁睇機會都不大嘅。暫時來講因為你無出現太多常見嘅感染症狀,所以都唔排除係有其他非性病引起嘅陰道炎、陰道有傷口、或者係單純因為荷爾蒙水平有變化(除咗藥物,其實一啲外在內在因素都可以影響體內荷爾蒙水平,例如:情緒壓力、病過、食過藥等等)而造成嘅症狀。詳細嘅判斷就要等醫生做咗婦科檢查先可以知道得清楚啲啦。如果婦科檢查無發現明顯嘅感染/原因,下腹痛嘅部份有機會要透過做更詳細嘅檢查,例如盆腔超聲波檢查先可以了解到多啲你身體嘅情況。 :wink:

我今日上晝去咗做檢查,醫生話好大機會係發炎。
我依家等緊幾星期後嘅小便結果,但唔知係咪我太擔心(擔心咗大半個月同有啲疑病症)而中午嘅時候又發生咗啲事,我喺幾小時內又大笑又喊,結果一個鐘後去廁所嘅時候突然流啡(上晝留小便嘅時候無)
想請問係咪因為情緒起伏太大而導致突然流啡?定因為其他原因?係咪好快會正常返?

補充一下資料:今個月已經食到第9粒避孕藥,有準時食

如果醫生暫時都話好大機會係發炎的話,暫時都無需太擔心嘅,可以耐心等下小便結果先 :relaxed:

一般黎講,情緒起伏對身體嘅影響,都係需要一段持續嘅時間,身體先會開始出現變化。所以如果中午有少少情緒起伏,相信唔會一個鐘頭後身體就會因為咁樣而突然出現荷爾蒙變化導致流啡 :see_no_evil:。流啡嘅原因,有機會係因為避孕藥嘅一般初期(持續約3-6個月)副作用-不規則陰道出血,或者係因為發炎情況所引起。

都想了解一下,醫生所指嘅「發炎」,有無具體提及到係邊一種發炎情況? :woman_health_worker:t2: :man_health_worker:t2: 或者醫生係處方左咩藥物比你服用? :pill:

流啡嘅情況,亦有機會係因為你下體發炎嘅情況下,但係依然服用避孕藥所引致嘅。因為有D疾病發作緊嘅情況下,其實係唔適宜繼續服用避孕藥。所以想睇睇當時醫生有無建議你停止服用避孕藥,待陰道炎好番先再繼續服用?或者醫生有無曾經同你討論過呢方面嘅情況? :relaxed:

醫生無講係邊種發炎,佢話有機會係性病導致嘅發炎,又有有機會係因為我之前轉安全套牌子後發炎,期間又無套性行為而導致反覆發炎。

依家等緊嘅尿液報告係驗有冇尿道炎/陰道炎,醫生最後只係叫我等報告、可能用返慣用安全套、多啲飲水排尿同可能暫時停止性行為,等陰道休息下,佢暫時無叫我停避孕藥:grimacing:

我想問如果只係尿道炎/陰道炎,有冇可能唔食藥就好返?

另外,我記起今日我係做完子宮頸細胞檢驗之後,由於我無辦法喺短時間內留小便(我因為失誤導致要重做尿液試紙測試)所以我去咗食嘢,之後先再留小便,而做子宮頸細胞檢驗嘅時候,我係感覺到下體有啲唔舒服,有少少痛,我流啡會唔會係因為我做咗呢項檢查?

針對服藥方面嘅情況,想了解一下有無咩原因,所以唔太希望服藥? :pleading_face: 因為如果係尿道炎/陰道炎情況的話,一般醫生會視乎病情嘅需要、細菌抗藥性,去處方適合嘅抗生素 :pill:助身體痊癒,同埋會處方紓緩症狀嘅藥物黎減低痛楚。 :woman_health_worker:t2: :man_health_worker:t2:

尿道炎/陰道炎嘅情況,如果唔服藥的話,當然過左一段時間後,症狀會減退。不過症狀減退唔代表細菌已經完全消失,可能只係因為飲多左水導致細菌量少左。所以唔服藥的話,好大機會再過多一段時間後,就會再次出現發炎嘅症狀,原因並非重複感染,而係細菌一直都依然藏於身體之中。

醫生無提及到需要停止服用避孕藥的話,咁依番醫生指示去做就可以 :blush:

如果係做子宮頸細胞檢驗(又稱柏氏抹片檢查)之後一至兩日,出現流啡情況,咁係好正常嘅現象啊,無需太擔心~ 一般做檢查嘅時候,應該護士都會提到檢查後出現流啡情況係正常現象 :grinning:。 因為有時子宮頸位置比較脆弱,或者採檢嘅時候已經有發炎嘅情況,所以就會造成點狀出血/微量出血嘅現象。不過如果出血情況持續/增多,咁就要記得諮詢番醫生啦 :blush: :relaxed:

最後,因為醫生都有提及到有機會係性病導致嘅發炎,所以都建議可以考慮去衛生署社會衛生科去做一個較全面嘅性病檢查,係免費、保密同埋無需預約嘅~ 咁可能會更有效咁了解發炎嘅原因。同埋都要記得未搵到發炎嘅原因之前,都唔好發生性行為啊~ 因為如果發炎嘅原因真係由性傳染疾病引起,透過無套性交,係有機會讓細菌/病毒傳染到伴侶身上:wink: 當伴侶身體感染細菌/病毒嘅時候,即使你本身已經痊癒好,都有機會再次收到感染。

明白:smiling_face_with_three_hearts::smiling_face_with_three_hearts:

但我仍然有幾個問題想請教:pray:t2::pray:t2:

1)我試過伸手指入陰道,首先會摸到好多凹凸嘅地方,然後喺深處會摸到一個平滑但硬硬地嘅嘢(左邊無,係偏右先摸到,摸到嘅時候無感覺)其實呢兩個地方係咩嚟?

2)之前上網見到一啲討論區話女性食事前避孕藥會多咗有念珠菌同陰道炎嘅機會,係咪真?

3)我一直係用杜蕾斯倍滑至薄幻隱安全套,但有次試用岡本0.03白金超薄安全套之後開始唔舒服(上面講嘅開始發炎嘅症狀),呢兩款唔係都係乳膠咩,點解前者用咗幾個月都無事,後者反而會令我唔舒服?
(我本身對任何膠布都敏感,另外前者係比後者多啲潤滑劑)

  1. 陰道係由黏膜、肌層同纖維組織膜構成,所以摸落去會感覺到凹凸不平同埋有好多紋路,而你所講嘅位於深處平滑而硬硬地嘅嘢係子宮頸,佢位於子宮底部,連接住陰道,含有平滑肌纖維、血管同彈力纖維。

  2. 事前避孕藥之所以有機會增加感染念珠菌陰道炎嘅風險,係因為服食避孕藥會令體內嘅荷爾蒙水平轉變,而依啲轉變可能會令念珠菌大量繁殖以致陰道炎。不過事前避孕藥並唔係感染念珠菌陰道炎嘅主要原因,只要平日保持陰部亁爽同清潔,例如穿著透氣度高嘅內褲及衣物、定時更換護墊或衛生巾、沖涼後徹底抹乾陰部先穿上內褲等,就可以有效預防念珠菌感染架啦 :blush:

  3. 雖然你所講嗰兩款安全套嘅主要成份都係乳膠,但亦有機會係你對於後者嘅其他成份敏感,或者可能因為後者嘅潤滑劑較少而令性行為時陰道嘅磨擦增加,以致好似 @Kaleo_StickyRiceLove 咁講令陰道內有傷口以致發炎。安全套同衫褲一樣都係要試過先知道適唔適合自己,所以如果嘗試新款嘅時候可以先選擇數量較少嘅包裝,亦有啲情趣用品店可以單個購買唔同款式嘅安全套,咁就唔怕買左好多返去但又發現唔岩用啦 :relaxed: