［巴打入］結婚前先發現條女落過仔 我應該點做
https://lih.kg/2199511
- 分享自 LIHKG 討論區
我無意中見到連登呢個post。 我想知道一般後生女意外大肚嘅話會有咩選擇？
平時睇戲會見到有啲人揀生咗出嚟然之後畀一啲夫妻嘅領養
但係我聽返黎香港好似唔興咁樣,多去大陸落
Hello @Cocochan 
如果香港喺意外懷孕嘅時候，可以考慮 1. 選擇生育；2. 領養服務；3. 寄養服務；4. 終止懷孕。遇到意外懷孕嘅情況時，首先建議同信任嘅人、伴侶等傾訴，並透過搵相關機構（例如家計會、青躍、母親的抉擇等）去同社工討論應該點樣面對呢個處境，同埋點樣嘅處理方式會比較適合當下自己嘅狀態（例如身心狀態、財政能力、成長階段等）。而意外懷孕嘅情況，亦不限於後生女，無論任何女性（例如年紀較大、已婚）亦會有機會出現意料之外嘅懷孕情況 。以下嘅服務，只要你係面對緊你未準備好嘅懷孕情況，都係考慮嘅。
有關意外懷孕嘅資訊，可以參考以下呢兩篇文章。
糖不甩《我懷孕了嗎？》：
《青躍－意外懷孕》：
領養方面，領養嘅意思就係「法律上永久地將所有撫養權由一個家庭轉讓到另一個家庭」。領養父母同親生父母擁有同等權利同埋義務，而領養嘅孩子亦同親生孩子一樣，享有同等嘅權利。有機會係由本地或者海外嘅家庭領養。好多時可能係意外懷孕嘅女仔／女士考慮到自己能力無辦法給予孩子完整嘅家庭，有機會即使自己好唔捨得都好，都決定選擇透過領養家庭比孩子更好嘅成長環境。意外懷孕嘅女仔／女士到時就只會具有「孩子生母」嘅身分，但係其他撫養權、監護權利及義務就會轉讓到領養父母上。現時香港主要由母親的抉擇同埋保良局提供領養服務。
《母親的抉擇－領養孩子》：
而寄養方面，就係為18歲以下，由於原生家庭嘅各種原因，而無辦法得到服務嘅適當照顧嘅兒童／青少年提供暫時嘅家庭照顧，透過寄養服務讓孩子可以享受家庭生活直至能夠同家人重聚。有時意外懷孕嘅女仔／女士未必希望孩子直接被領養，但係自己一時之間未必能夠自立，咁寄養服務可以係其中一個選擇。寄養期間，意外懷孕嘅女仔／女士就能夠透過完成自己嘅學業，或者做好經濟、身心嘅準備，之後再接番孩子。
《母親的抉擇－暫時照顧孩子》：
終止懷孕方面，要知道本港合法終止懷孕的話，係需要得到兩名註冊醫生證明繼續懷孕會對孕婦生命構成嘅生理或心理損害較終止懷孕大比較大 
。如果決定要終止懷孕，首先要確認自己嘅懷孕週數，因為週數嘅長短係會影響自己去邊個機構／醫院接受終止懷孕。例如家計會只會為懷孕期10週內嘅就診者提供藥物終止懷孕／手術終止懷孕（真空吸引術）。
藥物終止懷孕 
，就係透過使用會刺激子宮收縮嘅藥物令胚胎組織排出體外。因為毋須麻醉，對子宮傷害較細，風險亦相對較低。除咗藥物可能有副作用，另一個缺點係有機會未能完全引流，需要進行手術去完成流產。
而真空吸引術，就係將胚胎組織吸出體外。過程需要局部或全身麻醉，雖然完全成功嘅機會率比較大，但對身體特別係子宮嘅傷害亦會比較大，術後需要多加休養身體。
而公立、私立醫院嘅收費、排期長短亦有所唔同，一般醫院可為懷孕12-20週內人士提供終止懷孕服務（實際週數需視乎個別醫院安排及特殊情況安排），而香港法律上亦由規定惟有懷孕期不滿24週的人士可進行終止懷孕程序。但要提醒，因終止懷孕手術屬「非緊急服務」，視乎疫情情況，當所有公立醫院暫停非緊急服務（包括終止懷孕服務）時，有需要人士就只能轉向家計會或私家醫院求助。
《青躍－終止懷孕》：內文有提及家計會、公立醫院、私家醫院的服務收費
《家計會－終止懷孕》：
有人會選擇去內地接受終止懷孕，原因係因為內地終止懷孕嘅合法嘅，不過只有合符條件嘅醫院先會得到衛生局《母嬰保健技術服務許可證》，可以進行終止懷孕手術。不過要留意如果喺衛生環境唔乾淨嘅地方接受終止懷孕服務，其實好容易受到感染，導致身體出現發炎或者大量出血嘅情況，有機會有生命危險。又或者如果內地番黎香港嘅期間，身體出現任何症狀，亦都好較難接受到即時嘅醫療服務，有機會導致嚴重嘅後遺症 
。 所以亦都唔建議於本港接受黑市診所嘅終止懷孕服務，或者自行服藥作藥物終止懷孕啊～！ 
如果遇到懷疑／已經確認遇到自己意外懷孕嘅情況，除左好歡迎搵我地糖不甩 
之外，亦都可以向母親的抉擇、青躍、家計會尋求協助 。
最後，都提醒番發生性行為嘅時候，記得整個過程都戴好安全套，一方面避免懷孕方面，另一方面都有效減低性病傳播風險啊～ 