Hello…
食緊藥第三個月，開咗盒新藥食咗兩日，男朋友好似內射咗小小。想問係咪食咗兩個月都算stable，所以即使開新一盒藥食咗1/2日都會有避孕功效？剛結束經期大概4日。感謝
（雖然都食咗有兩個月，一直都有定時連續食，最多遲一個鐘食，沒有大副作用，但都仲係有啲驚…）
想補充下，性行為係琴晚發生，但今日個腹有小小痛。上網睇過係咪著床(?)會令到下腹痛？但其實著床的話應該起碼6日後？所以腹痛係咪唔關事？另外就係係咪食咗藥後就會一直無排卵，停7日後食新一盒就可以保持無排卵狀態，所以食1/2日都已經可以維持？
你好呀 @Hellooo 
我見你都好準時咁食藥，而且都好乖咁跟足指示食，同埋你都有話食咗兩個月身體都無特別大問題，所以都唔洗擔心住。 
如果你長期同埋穩定咁服用事前避孕藥嘅話，係可以 令體內維持一定嘅「雌激素 (estrogen)」同埋「黃體素 (progestin)」濃度嘅 ，而 高濃度雌激素主要嘅作用是抑制卵巢排卵，黃體素就會令子宮頸黏液增加，令精子難以前進同卵子結合，降低受孕嘅機會 。藥效即使係你停7日藥嘅時候都生效緊，所以基本上懷孕嘅風險係好低嘅。 
受精卵著床係需要6-9日嘅時間，所以唔會話你琴日有插入式性行為第二日就即刻著床嘅，而且你有食事前避孕藥嘅話，其實懷孕嘅風險係非常低嘅。 
其實食事前避孕藥嘅頭3個月都係適應期嚟嘅，但係睇返你嘅情況無特別副作用嘅話，身體都可以適應到。如果你真係好擔心嘅話，可以係頭三個月性行為嘅時候都使用埋安全套，咁樣就可以安心啲啦。
至於話下腹痛嘅情況，而且係性行為第二日就即刻出現，有可能係性行為嘅動作比較激烈，令下腹有少少痛嘅，可能下次就要調整返力度同埋動作啦。 
咁可唔可以咁講，我食咗藥呢兩個月嘅經期都好準，會喺停藥後3日嚟。其實推斷返經後四日加埋食咗藥兩日會算係安全期？sorry 問咗好多，真係好想攞個安心，成日即使食咗藥都會好驚。
就好似 @Kaleo_StickyRiceLove 所講 
，
所以只要你係有一直有按指示定時持續服藥，就無需要再擔心幾時係安全期，因為你嘅身體已經係會因為避孕藥藥效嘅緣故，而抑制左排卵同埋令精子難以同卵子結合及著床。如果有持續穩定咁服藥，其實每一日都係你嘅「安全期」啊
所以有好好按指示服藥就無需太擔心啊！！ 
而一般所講嘅安全期避孕法其實失敗率係比較高，因為月經週期有好多原因可以導致出現變化 ，例如最近呢個月有生病服過藥、飲食唔均衡、生活唔定時、情緒有起伏、壓力過大等原因，都會令黎月經週期變長／變短。所以我地一般都唔建議透過安全期計算法，推測「排卵期／安全期」，去發生唔安全嘅性行為～ 所以於服用避孕藥嘅情況下，亦無需刻意再另外計算「安全期」，一方面因為本身「安全期」其實每個月經週期都可以出現變化，導致難以準確預計「排卵日」；另一方面，其實避孕藥已經會抑制排卵，所以服用避孕藥期間係唔會有「排卵日」 
，亦唔會有所謂嘅「危險期／安全期」（一般需要停藥後第一個月經週期先會恢復排卵）
希望可以讓你覺得安心D啦 
如果依然都係好擔心會因為今次性行為導致懷孕，都可以選擇性行為11日後驗孕。因為一般受精卵著床需要6－9日，所以性行為7日後驗孕已經可以得到初步結果，而性行為11日後驗孕，就會比較準確同埋可靠啦 
Hello 又係我…
今日個胸漲漲地痛，好似要嚟m咁。上兩個月個胸漲痛都係不規律地痛，食藥開頭無點痛，食到差唔多中段又痛咁。會唔會係有咗所以先漲痛㗎
，sorry真係有啲擔心
。同埋因為發生性行為當人我係遲咗一個鐘食藥，係咪都有關事？
當日*
其實只要唔係漏食藥，你有持續咁每日食藥，就會有避孕功效㗎啦，即使你可能未必真係好準時每日都係同一個時間去食藥，只要差唔多時間去食，其實都無咩大問題嘅，唔洗咁擔心㗎。
你真係好擔心嘅話，都可以好似 @Sze_StickyRiceLove 講：
一支驗孕棒其實都非常之便宜，只要去啲個人護理商店，就可以用最平大約$40左右就可以換嚟安心，但係記住係用之前睇一睇說明書，跟返上面嘅指示去做，同埋要係指定嘅時間睇結果，因為如果太早去睇個結果可能會未出，太遲可能啲驗孕棒裡面嘅試紙已經失效，所以要乖乖啲跟時間睇呀。
至於你胸漲嘅情況之前兩個月都出現，所以既然發生性行為之前都有出現，咁唔可能係因為懷孕導致啦，所以都唔洗咁擔心架。