我係9月3號開始食避孕藥（優悅28粒裝），我睇佢說明書話「應該會係食白色無藥效藥丸時黎m」，我宜家已經食到第2粒白色無藥效藥丸，但仲未黎m。（期間有體內射精過）
知道唔係所有避孕方法都100%有效，所以都有心理準備有機會懷孕
我宜家想請問：如果食曬白色藥丸，依然未黎m，應該開新一排繼續食，定停藥？因為我想驗孕，但唔清楚避孕藥會唔會影響驗孕結果、同埋如果真係有左，會擔心避孕藥影響到bb。
Hello~ 照你所講嘅情況，只要無漏服懷孕嘅機會係唔大嘅 
因為避孕藥嘅人造荷爾蒙既可以抑制卵巢排卵，而且可以令子宮內膜產生變化，使受精卵無法著床，同埋可以增加子宮頸分泌物嘅黏稠度，令精子難於穿過黏液，進入子宮腔內，所以佢嘅避孕成效係好高嘅，根據研究資料，婦女喺第一年使用依種避孕方法後嘅意外懷孕機會為係0.3－9% (https://www.famplan.org.hk/zh/health-info)。不過如果你係初次服用避孕藥嘅話，因為身體需要時間適應藥效，所以開始服藥嘅首7日需要加用外用避孕方法，例如安全套，如果依段時間嘅性行為時無外加避孕方法嘅話，懷孕嘅機會就會相對大。
至於月經方面，通常月經都會喺服食白色藥丸期間黎，但係亦都有機會係開始服食新一盒藥之後先黎，你宜家仲係喺服食白色藥丸期間，所以唔需要太擔心住 
而且服藥初期黎經嘅日子可能會比較浮動，持續服藥3個月後身體會慢慢適應藥效，到時黎經嘅日子就會相對穩定架啦
而驗孕方面，服食事前避孕藥係唔會影響驗孕結果嘅，你可以喺性行為嘅7日後進行驗孕檢測出初步結果，或者喺性行為嘅11日後驗孕，依個時候測出黎嘅結果就係相當準確嘅，如果結果係陰性就應該係無懷孕架啦 如果證實懷孕後依然持續服食避孕藥嘅話的確有機會影響胎兒，但係因為你嘅情況懷孕嘅機會唔大，所以如果距離上一次性行為嘅時間未夠7日嘅話，可以先繼續服藥，等到性行為嘅7日後進行驗孕，如果已經過左7日嘅話就可以趁開新一盒藥之前依兩日驗孕，再決定係唔係繼續服藥。