套穿咗,好擔心

上星期同男友搞,中途個套穿咗,一發現已經立即停止,冇內射,三個小時內亦已經服用事後丸,但係呢排個胸好似脹咗又有啲痛,唔知係心理作用定點,好似成日都好眼瞓,睇google又話係懷孕初期反應,而且發現嗰日係易受孕期,原定下星期嚟m,依家每一日都好擔心…

Hello~ 緊急避孕藥透過人造荷爾蒙抑制排卵或者干擾受精過程,佢嘅避孕成效係好高嘅,成功率達 97 - 99%,所以照你所講嘅情況,你喺緊急避孕藥嘅有效時限內服藥,懷孕嘅機會係好低嘅,唔需要太擔心 :blush: 如果真係好擔心懷孕嘅話,可以喺嗰次性行為嘅11日後進行驗孕,如果結果呈陰性嘅話就應該係無懷孕啦 :relaxed:

至於胸部脹痛同埋容易疲累除左係懷孕初期嘅徵兆之外,亦都有機會係月經前嘅徵象,宜家距離你預期黎經嘅日子只有一個星期,有依啲身體狀況都係好正常嘅 :relaxed: 不過要留意嘅係,服食緊急避孕藥後月經有機會比預期提早/延遲幾日黎,所以如果遇到依個情況亦都唔需要太擔心 :blush:

另外,都提提你地配戴安全套時記住要先擠出儲精囊嘅空氣再套至陰莖根部,避免安全套因為射精時嘅氣壓而破損。因為安全套上嘅潤滑劑會喺性行為期間揮發,所以亦都要按需要配合潤滑劑使用,避免安全套因為磨擦而破損,不過記住油性嘅潤滑劑係唔可以用喺乳膠安全套上嘅,所以建議使用水性/矽性嘅潤滑劑。