好擔心呢家唔知點算

我女朋友 9月6日黎M 之後佢平時M length係6 日 大約30 日黎一次
琴晚1/10 我地有帶套咁做左一次 但係之後我發現原來套穿咗 但係我射果下係有體外射嘅 柑佢會唔會有左。我之後同佢去左買事後丸 佢食左呢家好暈 想嘔
有冇人知道點算?

Hello @Marlee :blush: 首先,都好欣賞你同女朋友發現安全套穿左之後,有去買事後丸,希望可以及時做好補救嘅措施 :relaxed: 不過都想了解一下,你同女朋友係去左邊度買事後丸?

因為事後丸喺香港係屬醫生處方藥物,係唔能夠於藥房/個人用品護理店購買得到。一般可以選擇去家計會/母嬰健康院/普通科門診/婦科診所/急症室睇醫生攞事後丸 :relaxed: 如果女朋友服用嘅係醫生處方藥物,應該醫生或者護士都有解釋過事後丸嘅常見副作用,包括:頭痛、噁心、頭暈、疲倦、經痛、腹痛、背痛、乳房脹痛等。所以女朋友服用完事後丸之後,出現頭暈、想嘔嘅感覺,係正常嘅,無需太擔心 :wink: 一般情況下,呢D副作用不會持續超過24小時。

不過如果你地買事後丸時,並非由以上地方嘅醫生處方的話,咁藥物嘅成效、質素及來源就會比較令人擔心。建議儘快攞番之前買藥的包裝盒(如有),去番家計會/其他婦科診所睇醫生,了解一下之前服用過嘅藥物係咩,會否對身體造成影響。同時,睇睇有無需要服用番來源及質素可靠嘅事後丸,減低懷孕嘅風險。(提醒番,事後丸嘅最長服用時效為120小時 :blush:

詳情可以參考:
《家計會-緊急避孕》

而懷孕風險方面,因為陰莖性興奮嘅時候,已經會分泌出透明嘅尿道球腺液,內含少量精子,係有機會導致懷孕嘅。所以即使射精時係體外射,射精前分泌嘅尿道球腺液依然有機會透過安全套破裂嘅地方,流入女方陰道內導致懷孕。所以你地之後有即時去攞事後丸都係一個明智嘅選擇 :blush: :smiling_face_with_three_hearts: 而月經週期方面,因為排卵期好容易有變動同埋好難單憑過往嘅月經週期日子去準確預計,再加上月經週期好多時會被其他因素影響(例如最近生活作息唔定時、情緒有起伏、壓力過大、最近有服藥等),所以我地都好難推斷今次發生性行為嘅日子係屬「安全期」還是「危險期」。

一般如果係去家計會攞事後丸的話,護士應該有約女朋友下一次覆診嘅時候(約一個月後),再進行一次驗孕。不過如果好擔心的話,都可以考慮性行為11日後進行一次驗孕,到時嘅結果已經會係準確同埋可靠嘅 :relaxed:。因為一般受精卵著床需要6-9日,所以性行為7日後驗孕已經可以有一個初步嘅驗孕結果,而性行為11日後驗孕,就會較準確及可靠。