食左4個月避孕藥。每日都固定晚上11點食
琴晚9點飲醉咗所以有嘔
但係11點我都有準時食藥
食藥後無再嘔過訓到天光
請問藥效有無影響？
食藥後幾耐有嘔過要補食或者做其他措施？
咁樣計其實我係當日食藥前有嘔過，嘩係咪無影響
Hello~ 如果係嘔吐完之後先服食避孕藥嘅話係唔會影響藥效嘅，除非服藥後嘅5小時內有出現嘔吐嘅情況，咁藥物就可能因為未完全消化曬而經嘔吐排出體外，因而影響藥效。如果出現服藥後嘔吐嘅情況嘅話，可以喺之後嘅7日都額外用返安全套。另外，因為你已經持續服藥超過3個月，其實身體都已經好適應藥效，所以會意外懷孕嘅機會都唔高，唔洗擔心 
咁我想醉酒係吾盒影響藥效？
姐係我當日醉左，嘔完先再食當日藥係無影響？
之後都無性行為，去到6日之後先有無套
咁其實都吾洗擔心？
係今日至啱
上次醉酒係上星期六
我係固定晚上11點食藥
當晚醉咗9點有嘔，但11點食藥後無再嘔，之後每日都準時食藥
到今日先有無套外射
而今日係食呢一排藥嘅第21粒
酒精會吾會令之前藥效前功盡廢？
定我其實都係好安全？
正如 @Ana_StickyRiceLove 所講， 如果係嘔吐後先服藥的話，係唔會影響到避孕藥嘅藥效啊，無需太擔心 
加上你之前已經有持續服用避孕藥4個月，藥效已經於身體內建立左，所以6日之後發生無套性行為，導致意外懷孕嘅風險都好微。
暫時研究指出 酒精並唔會直接影響避孕藥嘅藥效 。不過有時透過因為飲左酒，就有機會導致部分女性唔記得服藥，導致影響避孕藥嘅藥效 
又或者如果因為飲左太多酒，導致服用避孕藥後未夠2小時就嘔吐，咁亦都會影響避孕藥嘅藥效。咁就可能需要即時服用多一粒避孕藥，並儘快諮詢醫生嘅意見～
所以除非你係服藥後先嘔吐，否則都無需要太擔心會影響避孕藥嘅藥效 
。
另外，如果平日都會固定經常飲酒，亦希望繼續服用避孕藥的話，都可以考慮將食藥時間同飲酒嘅時間錯開 ，例如將食藥嘅時間改做朝早，咁就起碼服藥前後4小時內都唔會飲酒，避免擔心因為飲酒後嘔吐／唔記得食藥，而影響藥效啦
Hello 都想再問下
食滿7日先有避孕效果係指首次服用嘅人？
如果我已經有食幾個月，係開新一包藥嘅第6粒都已經有充分避孕效果？
例如我每個月都係白色最後一粒個日尼m day1
而開新藥第一粒係day2
我食左6粒 係day8有無套外射
都係安全？
定每個月都要食滿7粒先可以
Hello @Ppp1 
無錯啊，食滿七日先有避孕效果嘅，係指服用第一盒避孕藥嘅人。所以建立藥效之前，係需要頭七日都需要配合番阻隔性嘅避孕工具（e.g.安全套）一齊使用。即使之前有服用過避孕藥，如果轉左其他牌子嘅避孕藥，首次服用新牌子／款式嘅避孕藥時，頭七日都需要配合番阻隔性嘅避孕工具（e.g.安全套）一齊使用啊～
不過要留意番，以下情況，都需要 再次配合阻隔性避孕工具 使用， 持續7天 ，因為藥效有機會消失，需要重新建立，避免期間有懷孕風險。
服藥期間曾經漏服藥，有補食藥丸
服藥期間曾經漏服藥，無補食藥丸
曾經停藥（不包括該四粒非活性成分藥丸）
有穩定依足指示持續服藥的話，服用第二盒避孕藥嘅時候，已經 唔需要 配合其他阻隔性避孕工具黎 避孕 因為本身避孕藥嘅藥效已經喺體內已經建立左，即使第一盒最後四日係服用 非活性成分嘅藥丸 （白色藥丸）， 避孕嘅效力會依然持續 。
所以只要你係有一直有按指示定時持續服藥，就無需要再擔心幾時先可以放心無套內射／外射 
，因為你嘅身體已經係會因為避孕藥藥效嘅緣故，而 抑制左排卵（即係服用避孕藥期間係唔會有「排卵日」） 同埋 令精子難以同卵子結合及著床 。如果有持續穩定咁服藥，其實每一日都係你嘅「安全期」啊
所以有好好按指示服藥就無需顧慮邊一日先可以無套內射／外射啦 
所以以下呢個情況都係安全嘅，當然前提係你開新一盒之前，過去服用嘅果盒藥已經有持續依足指示服用啦
不過記得單純服用事前避孕藥係無辦法阻隔性病啊～！ 戴安全套先有效減低性病傳播風險
我已經持續食咗5個月，係上個月有嘔吐過( 上面情況) ，係day 13 ，不過都係嘔完兩小時後先食當日藥， 之後都係正常服用，上一個cycle 都有準時尼m，咁係咪我算係按時服藥？
其實我每次有關係都會搵好多野擔心，明明已經跟規矩做好都會想問好多野求安心
補充 其他每一粒藥我都好準時食曬 雖然好驚不過呢5個月經期都好準時白色最後一粒個日尼
可唔可以再答下我
首先講咗嘔吐嘅情況先，好似之前 @Sze_StickyRiceLove 講：
所以嘔吐後食藥都無問題，只要你唔係食完藥即刻嘔，啲藥可以落到個胃到，被胃酸分解咗，身體吸收咗，就有避孕功效架啦。
如果你話食完藥無耐就反胃嘔咗粒藥出嚟，咁就緊係無效用啦，因為粒藥都無入到胃，釋放唔到啲化學物，咁咪無咗避孕功效啦。 
明白有時每日食避孕藥，但好似乜事都發生，相比起每次性行為都確確實實咁射咗入去，真係比較虛無飄渺啲嘅。避孕藥唔係好似感冒藥、頭痛藥咁，食完即刻收鼻水、即刻舒緩頭痛，避孕藥食完同無食你嘅生活同身體都無咩大變化，的確又真係令人懷疑避孕藥食咗係咪真係生效緊。
但係避孕藥同感冒藥唔同嘅地方係，感冒藥係用於治療嘅，而避孕藥係用於預防嘅。而且本身懷孕都唔係一個病嚟，所以都唔會話有啲確實嘅效果俾你睇到嘅。不過我相信你都會認同一個效果，就係每次食到白色藥丸嘅時候就嚟M，呢個都係比較確切嘅憑證嚟。
咁不如你當食避孕藥好似食龜苓膏、飲涼茶咁，佢係一個減低風險嘅措施嚟，並唔係一個治療嘅作用，你食避孕藥係為咗預防懷孕呢件事嘅出現，而唔係為咗治療佢。 
避孕藥係差唔多時間食就得架啦，唔一定要準時到琴日幾點幾分食，今日就一定要幾點幾分食，只要唔好差得太遠，例如隔咗成日先食，其實都OK架，如果怕真係唔記得嘅話，可以選擇係訓醒或者訓之前食，咁樣就唔怕會唔記得啦。同埋唔同牌子都會有自己嘅補食時間嘅，只要係佢指定嘅補食時間內食返，都無需要太擔心嘅，而且你食咗5個月，藥效都好穩定架啦，都唔需要太擔心嘅。建議你都可以下載一啲幫手提醒食藥嘅Apps，夠鐘就會彈提示出嚟提醒你食藥嘅。如果你真係好怕唔記得食藥嘅話，其實都可以試下打針嘅，每個月打一次，就唔洗每日都記住食藥，但係就睇下你想每個月定期去家計會打針定食避孕藥啦。
我有啊 已經用鬧鐘提自己，藥每日都好準時食，係成日都懷疑自己做得唔夠好
有時又會驚食錯野影響，總之無論人哋同我講完無事我都會繼續質疑自己，比好多問題自己。明明每個月都準時尼m，明明人哋講咗吾會排卵，明明每日鬧鐘響就食藥，仲會記錄低，但都會有好多理由令我覺得吾夠安心。
好想有人話比我知我已經做得好夠，吾洗成日太擔心
其實你好叻女，做咗好多準備去令自己嘅懷孕風險都降到最低 的確，真係有時明明知道自己做咗好多嘢都會好唔安心，好似你咁講，成日懷疑自己做得唔好，因為好似最好都解決唔到你擔心嘅情況。如果真係，食避孕藥唔係一個令你安心嘅方法去避孕，會唔會有空間可以同你嘅伴侶傾下，可唔可以轉第二種避孕嘅方法，例如安全套，或者打避孕針咁樣，我相信好多時比到壓力或者令你擔心嘅，未必真係你自己做咗嘅嘢，係一啲你無辦法控制，好無力嘅人或者事 你話，雖然自己做咗好多嘢，所有嘢都好似完美咁，但「都會有好多理由令我覺得吾夠安心」，我想聽下果啲理由呀，如果你唔介意嘅話，可唔可以都係呢度分享俾我知呀？
其實我諗都吾係方法問題，係我對自己無信心，成日會將個0.幾%可能性放到好大，明明正常人食咗藥會安心咗開心咗，但我反而仲多野諗 幾年前咩措施都無做都吾會咁多野擔心，吾知點解有一下懷疑就搞成咁，當然以前係吾好嘅示範，但我好想令依家嘅自己放鬆啲
暫時世界上並無一種避孕措施係能夠做到100%避孕成功率 ，而口服避孕藥嘅避孕成功率已經係可達99.7%（perfect use，完全正確使用），及91%（typical use，一般使用）。雖然避孕藥嘅避孕成功率其實都已經算好高，不過的確當中避孕失敗嘅機率0.3%，都會令唔少女性會好擔心會唔會因為自己少少嘅錯失，就會有懷孕嘅風險 
。只能講嘅係，呢0.3%係就算自己已經完全正確使用，都無辦法控制到嘅意外。
其實係你分享嘅過程中，都見到你已經用盡左最大嘅努力（例如有較鬧鐘提醒自己，亦都有持續每日準時食藥，仲有自己記錄低添！ 
），去減低因為人為因素，而導致避孕措施失敗嘅機會。你已經努力去令避孕藥發揮佢最大嘅避孕功效，餘下嘅機率除左再配合安全套使用作多一重保障之外，其實都係我地無辦法控制到嘅因素。
可以令自己放鬆D嘅方法，一方面就如 @Kaleo_StickyRiceLove 所講，會唔會考慮同伴侶討論會唔會再配合安全套發生性行為，進一步提高避孕成功率之外，及考慮使用香港可考慮的更高避孕成功率的避孕措施外（例如避孕針Depo-Provera 99.8%、可釋放荷爾蒙的子宮環99.8%） ，甚至自己能夠放鬆心情前都暫停發生任何性行為；另一方面都要學習接受有時我地有D野確實係無能為力 。正如有時身體嘅健康狀況（例如長時間（prolonged）嘅腹瀉或嘔吐－並非單單一次嘅嘔吐／腹瀉 ，影響避孕藥吸收狀況），我地確實係無辦法一一去控制得到。當自己盡左最大努力都無辦法做到嘅時候，能夠做到嘅就係學習接受 及放眼自己已經努力左的部分及過程 
。
學習接受生活上嘅無力，係需要長時間以及沈澱（我自己都學習緊 
），亦唔好忘記時刻欣賞呢個已經盡左好多好多努力嘅「自己」 我亦都想講聲，其實你已經好叻好叻好叻架啦！
如果仲有其他嘅憂慮／擔心，都歡迎再同我地分享啊，我地糖不甩一直都在
其實單一使用避孕藥成效已經好高？
有時我都會同自己講，其實我盡咗努力去左，已經有99%保護，點解吾好好享受自己嘅努力，仲要每次做完都擔心 但係有時就會好負能量無限放大個1%
我已經試過停性行為一個月，都證明咗經期會如常到來，而且個吓又會諗，我咁辛苦食藥，就係為左係開心同時有更好保障，食完又吾做，咁樣為咩呢 另外其實呢5個月，無論我擔心咩，最後經期都係會如常尼，但每個月我都會搵好多野擔心，挑剔自己
令自己吾好病，又會好關注自己食d咩，驚同d藥撞
伴侶其實好就我，以前都無理咩安全期，依家食藥我反而會就住，第二個禮拜都會拒絕佢，通常第一個星期同第三個星期先咁做，我知道其實係我問題，但佢都會就我，我可以一日問十萬次自己係咪會無事，每個月都問到尼個日，佢都好有耐性答我，我知係我無用
真係好想比d信心自己好好享受明明我每日都好努力準時食曬藥，過往又好準時尼m，點解我要擔心太多 明明係一件開心事，但我開心完有要諗太多 覺得做完就有bb，但以前個5年都吾會咁諗，奇怪
知道你同伴侶未準備好面對懷孕，所以你有盡力做到最好去減低意外懷孕風險，你已經做得好好啦！除咗唔發生性行為，無任何安全措施係可以做到100%安全嘅，所以只要係自己能力範圍內做適合自己嘅選擇就已經好足夠！ 
正如之前所講，避孕藥嘅避孕成效，喺正確服用嘅情況下已經好高【完美使用（服用前有徵詢醫生意見、每日準時服藥、無漏食藥等）：99.5-99.7%； 平常使用：91-92%】，所以你唔需要太過擔心。同埋你已經服藥5個月，身體都應該已經適應咗藥物，有避孕嘅功效。如果你想加多一分保障，都可以考慮叫伴侶喺性行為嘅時候使用安全套。
同埋你有分享係呢排先有呢種焦慮嘅情緒，之前冇咁緊張。其實會唔會係最近發生過一啲事或者聽到身邊朋友嘅情況而令你開始有擔憂？見到你都有同伴侶討論過你嘅擔心，或者你哋都可以討論下如果真係意外懷孕要點面對，會選擇終止懷孕定係繼續懷孕（香港現時有領養和寄養服務），有共識之後可能都可以令你嘅擔心減少呀！如果都係覺得好擔心，承擔唔到任何風險，咁或者現時並唔係適合發生性行為嘅時機。可以同伴侶商量考慮暫停插入式嘅性行為，改為一啲低風險嘅性行為（例如指交、口交、互相自慰等等），甚至係暫停一切嘅性接觸。直到有一日，你覺得自己心理上準備好，係合適嘅時機再去考慮發生性行為。
我今日多手去驗孕 初時都係一條線 之後我隔每兩鐘去睇下都係一條 點知去到夜過左十個鐘，竟然有一條好幼嘅直線 我好驚 過左10個鐘突然咁，因為以前驗過好多次，就算放好耐，無嘅話都吾會有第二條線，但今次竟然有
我好擔心，已經係過左14日我係咪咁樣都有左bb
驗孕棒嘅結果超過左一個特定嘅時限就會被視為無效，因為放耐左之後有好多因素會影響顯示嘅結果，所以照你所講嘅情況，初時驗嘅結果係一條線，就代表係無懷孕啦，唔洗太擔心 因為唔同牌子嘅驗孕棒喺使用方法上都唔同，所以你可以參閱返你用嗰個牌子嘅說明書，通常都有講驗孕結果嘅有效時限嘅。
如果真係好擔心嘅話，可以去見醫生驗多一次同埋了解下身體狀況，或者可以去醫院驗血，佢嘅結果係好準確嘅
Hello 我用嘅係cB 今日第15日一早我又再驗多次 我分別係1分鐘 3分鐘 同10鐘都係顯示一條橫線
我琴晚因為呢件事成晚失眠，好痛苦
問咗好多人，話我有咗機會近乎零，但點知我多手去驗，佢竟然放左8至10個鐘後多左條幼線，雖然説明書上寫十分鐘後結果無效，但我以前驗咁多次，就算放幾星期都吾會多條線，今次真係好驚，嚇到我傻