之前龜頭突然變到好乾,乾到反包皮出黎時會有少少痛,後來會變偏白色,仲甩皮,甩皮之後就好似之前咁回復正常,因為一直無痛無紅點乜都無,所以無睇醫生,但再一次同女朋友進行性行為之後又係咁樣,會唔會係因為對安全套既物料敏感?
另外,第一次(我第一次)同女朋友進行性行為時時間比較長,但二三次反而變到好敏感,好容易就出左,想問係咪可以用凱格爾運動黎改善問題?
仲有想問敏感既問題可以點樣改善
你好呀 @yter174， 睇得出你都好擔心，但係龜頭脫皮嘅原因都有好多嘅，都想問下你用開嘅安全套係邊一種物料嘅，因為安全套都有分幾種物料嘅，包括乳膠、PU（聚氨酯）或者PI（Polyisoprene），你可以係買安全套嘅時候睇返佢嘅成份，可以揀一個你未試過，睇下會唔會再有敏感嘅情況。如果真係唔得嘅話，可能就要同女朋友仔傾下轉第二種避孕方法，例如食避孕藥或者避孕貼，當然要係雙方都同意嘅情況下先得啦。 
同埋都想知道你平時清潔嘅情況係地點樣嘅，有時過度嘅清潔都可能會引致甩皮嘅情況，特別依家秋天，都開始乾燥，陰莖都係皮膚嚟嘅，都會乾燥同敏感㗎。另外，如果甩皮令你好唔舒服，盡量都唔好夾硬嚟呀，淨係將包皮反一半都可以去到廁所嘅。真係好擔心嘅話，你都可以去問醫生幫你檢查下㗎。 
至於係性行為期間覺得敏感嘅情況， 你都可以做凱格爾運動嘅，不過係比較偏向改善陰莖硬度嘅情況。另外你都可以試下「斷續刺激」治療法，做法係先刺激陰莖至勃起，然後繼續刺激到有想射嘅慾望，然後停止三十秒，再繼續刺激，不斷循環知道你覺得足夠嘅時候，就可以釋放，咁樣嘅訓練會係幫助你延遲射精嘅時間，令性行為嘅時間可以拉長一啲，不過要量力而為呀，如果覺得唔舒服就要即刻停止啦。 
另外都建議你同女朋友討論下呢個性行為時間長度呢個問題，其實對於女方嚟講，唔係越長時間就越好㗎，最緊要係過程中你地兩個都感到滿足同歡愉啊。 