你好，
兩天前10月5日發生了體外性行為，陰莖沒有插入，只在陰道外輕輕摩擦，射精不接近陰道，不過唔知有冇precum，不過完全冇插入(陰莖、手指、玩具都沒有)。第一次性接觸，本來兩個都冇打算所以冇用套，有d驚出事。
上次經期10月21日，近幾次經期都正常大概28-30日黎。完左性接觸先醒起係危險期
還有，剛剛今天10月7日到了家計會服用時候避孕丸ulipristal acetate，大概是時候48小時。醫生說是推遲排卵期，但我擔心我已經排左卵。我真係第一次，宜家有d驚。
我本來唔係好驚但係知道precum都有精子嘅時候開始驚驚地，想知道陰莖在陰道外摩擦的話precum導致懷孕的機率是不是幾乎沒有？我幾時/ 需不需要驗孕? 謝謝
update 一下，我上次月經係9月23日，打錯左，經期黎大約5-7日，一個週期28-31日。請問有人可以解答下我上面嘅問題嗎
你好呀 @khv7 
如果無插入式性行為嘅話，其實懷孕嘅風險係好低嘅。如果你已經係家計會食咗緊急避孕藥嘅話，其實都唔需要太擔心懷孕嘅情況嘅，因為你食咗避孕藥，佢已經係身體裡面生效㗎啦，所以唔洗咁擔心㗎啦。 
事後丸唔係淨係透過抑制排卵造成緊急避孕嘅功效，仲會增加子宮頸黏液令到精子難以穿過，亦會令子宮內壁增厚，即使卵子受精亦無法着床，所以只要你係適當時間內服用左事後丸，而且係經醫生處方嘅話，會意外懷孕嘅風險都唔高。雖然懷孕嘅風險唔高，但只要性器官同體液有直接接觸就會有懷孕同傳播性病嘅風險。有時好難講實際個數字係幾多，因為最後能能夠成功造成懷孕都仲有好多因素影響到，所以都鼓勵你日後只要有任何形式嘅接觸都要用安全措施。 
如果真係好擔心嘅話，建議你係性行為後嘅7日後，姐係10月12日驗孕，就可以得到初步嘅結果，而11日後，姐係10月16日驗嘅話就可以得到比較準確嘅結果。記住要跟足說明書上面嘅指示去做，同埋係指定嘅時間內去睇驗孕嘅結果啊。 
唔該晒你先！！不過我想問一問關於我食嗰隻ulipristal acetate，醫生話主要係推遲排卵期，咁相對應即係我冇懷孕的話經期會延遲，請問你地知道大概最多延遲幾多日嗎？同埋好似好多人食完隻藥都會有副作用，例如頭痛，疲倦，作嘔，不過我食完差唔多兩日都冇任何反應是不是正常，還是藥物沒有發揮作用？
仲有，聽講“著床出血”都係好似黎m咁有d血，其實點樣分究竟係有左定真係黎m？
Ulipristal acetate呢隻事後丸，主要功能係延遲或抑制排卵 （Gemzell-Danielsson, & Cameron, 2011)，從而有效咁預防精子同卵子結合，達到避孕的效果 
。
研究（Li, Lo, Ng, & Ho, 2016) 亦指出，若於排卵前服用ulipristal acetate的話，服用後一般下次月經會出現明顯來遲的情況，比預計來月經的日子大概遲3日（此數值為中位數）。而若於排卵後服用ulipristal acetate的話，服用後一般下次月經會出現明顯提早的情況，比預計來月經的日子大概提早1日（此數值為中位數）。
所以，下次月經提早／延遲係正常及常見嘅事後丸副作用，如果下次月經週期提早左黎／黎遲左幾日都無需太擔心啊～ 
的確頭痛，疲倦，作嘔等係屬於常見嘅事後丸副作用 
，而副作用一般唔會持續超過24小時。並非每一個人服用完事後丸都會出現明顯嘅副作用，所以食完之後無任何反應都係屬於正常嘅現象，藥物依然係有發揮藥效，無需太擔心啊 ～
一般著床性出血嘅血量較少，顏色較淺，可能會少至只有一滴血，部分人可能血量會多少少。血量係護墊可以承載嘅血量，通常只會一日內一瞬間流完，並唔會似月經咁持續黎4-5日。著床性出血時亦唔會好似黎月經咁身體有劇烈感覺（例如肚痛、頭暈等）。所以從經血量、持續日子、身體感覺上，著床性出血同一般月經都有好大分別 ，不難分辨。
參考：
Gemzell-Danielsson, K., & Cameron, S.T. (2011). Ulipristal acetate (ellaOne®) for emergency contraception: review of the clinical evidence. Clinical Investigation, 1(3), 467–472. Retrieved from https://www.openaccessjournals.com/articles/ulipristal-acetate-ellaone-for-emergency-contraception-review-of-the-clinical-evidence.pdf
Li, H.W.R., Lo, S.S.T., Ng, E.H.Y., & Ho, P.C. (2016). Efficacy of ulipristal acetate for emergency contraception and its effect on the subsequent bleeding pattern when administered before or after ovulation. Human Reproduction , 31(6), 1200–1207. Retrieved from https://doi.org/10.1093/humrep/dew055
謝謝你，仲有一件事，關於幾時用驗孕棒驗孕嘅問題，上面見到你地話性行為後11日就可以得到相對準確嘅結果，但我見網上好多人都話要兩個星期，或者等到預計經期未到嘅嗰一日驗先有效。請問邊個說法係真嘅？定係同驗孕棒嘅牌子有關？你地有冇推薦邊一個牌子？
一般驗孕嘅日子可以有兩個選擇：
1）性行為11日後：因為一般受精卵著床需要6-9日，所以如果真係懷孕的話，其實性行為11日後就受精卵已經著左床，並分泌出足夠嘅孕激素（hCG）去令驗孕棒測到懷孕嘅情況。
詳細咁解釋的話，如果真係懷孕，由受精卵著床開始，身體已經會分泌出孕激素，孕激素嘅分泌會隨著懷孕嘅日子增加，直到懷孕第11週左右先會穩定，甚至之後慢慢回落。所以你於越後嘅日子驗孕，就會因為體內嘅孕激素越多，所以就會越容易得到準確嘅驗孕結果 。
2）預計來經日子：月經嘅出現，係因為卵子並無受精，從而令增厚左嘅子宮內膜，因為無受精卵著床，從而脫落成為月經。所以懷孕的話，因為受精卵就已經會著床於子宮內膜上面，隨著雌激素增加，子宮內膜亦會逐漸增厚為受精卵提供適合嘅成長環境，就唔會有子宮內膜脫落嘅情況出現，所以就唔會令月經出現。
不過要留意嘅係，並非每個女性嘅每次月經週期都係穩定，所以如果要於預計來經日子驗孕的話，請以過往「最長的月經週期」日子來計算預計來經日子作驗孕日期，從而避免因為過早驗孕，而得到false-negative結果 。例如你過往月經週期係大概28-32日的話，咁就應該於月經週期第33日或之後先驗孕啦。
不過最重要都係依照驗孕棒嘅說明書，去睇邊日驗孕會得到最準確嘅結果 。
而驗孕嘅時間，一般都會建議取「晨尿」去作驗孕。因為早上起身第一泡尿液，內含嘅hCG值濃度會係最高，亦會比較容易取得準確嘅驗孕結果。不過其實現時好多驗孕棒嘅牌子，敏感度同埋準確度都好高，除非驗孕棒說明書有建議／寫明，否則未必一定需要用「晨尿」去作驗孕，取其他時間嘅尿液去驗孕，都唔會有太大嘅影響。
理想的話，你都可以選擇性行為11日後驗孕一次，然後再等待於預計來經日子再驗孕一次，從而透過反復測試去確認驗孕結果係咪準確。不過就要留意唔太建議於太近嘅日子持續驗孕，因為部分人可能會因為驗孕，而持續飲好多嘅水，都有機會稀釋左尿液內嘅hCG值，令驗孕結果無咁準確 
。
而驗孕棒方面，我地都無特別推薦嘅牌子，一般連鎖個人護理商店售賣嘅驗孕棒，相信都係可靠嘅 最緊要都係驗孕棒牌子及來源係可靠嘅就OK～ 
唔放心的話，都可以考慮購買兩個唔同牌子嘅驗孕棒，如果兩支驗孕棒嘅結果都係一樣的話，咁驗孕結果就更加可信啦。又或者想準確D的話，都可以考慮購買有電子顯示嘅驗孕棒，呢類驗孕棒係比較新型，準確度較高，而且一般能夠顯示埋懷孕嘅週數。所以如果真係懷孕的話，就已經能夠顯示埋懷孕週數。
網上可能唔同人對於驗孕嘅日子都有唔同講法，或者會分享自己過往嘅經驗。當然可以透過睇其他人嘅經驗比自己作參考，但係有時透過對方嘅文字，都好難讓我地掌握當時實際嘅情況及資訊，去理解點解當時驗到／驗唔到 
。部分人可能會提及自己驗孕驗左好幾次先準確，又或者表示自己一開始驗孕嘅結果唔準確，原因有機會係：1）可能部分人驗孕前幾日都發生過其他嘅性行為，導致驗孕結果唔準確；2）有機會驗孕嘅過程中，未有依足驗孕棒說明書嘅指示（例如等候驗孕結果嘅時間唔夠或過長、沾取尿液的步驟出錯等），導致驗孕結果唔準確。
所以最重要都係性行為後，至有效驗孕日子之前，都唔好再發生其他性行為住，而驗孕過程中亦要依足說明書嘅指示驗孕，咁到時嘅驗孕結果就會係可靠同埋準確架啦 
我應該21-23/10黎m，不過到宜家仲未黎…? 係食左緊急避孕藥嘅原因，定係有左…? 食完到宜家一d副作用都冇，所有一切正常… 我係咪應該買驗孕棒驗下
正如之前有提及過，
暫時月經只係黎遲左大概1-2日，都無需太擔心住啊，本身服用左事後丸係會有機會延遲下次嘅月經週期 
，可以等多幾日，甚至一個禮拜先。另外，有時最近情緒有起伏、壓力過大、生活作息唔定時、飲食唔均衡等因素，亦都有機會延遲月經黎嘅日子 
，可以留意一下過往呢段時間有無出現類似嘅情況。
另外無出現副作用方面，之前都有解釋過 ，
如果真係好擔心的話，買驗孕棒驗左先，都係可以嘅 因為宜家距離性行為（5/10）已經多過11日，所以宜家驗孕嘅結果已經會係準確同埋可靠架啦 
驗孕結果如果係顯示無懷孕，令你心情放鬆番D的話，都有機會有助月經更準時出現
我已經買了驗孕棒，測試到陰性，沒有懷孕，但係我經期仲未黎 我本身已經唔擔心架啦，不過點解咁耐都唔黎嘅？？？我聽講都係遲2-3日，我已經遲左6日啦…
既然你已經驗孕並且結果係陰性，咁就唔使擔心意外懷孕啦。
其實之前都解釋過，服用事後藥係有機會影響月經，呢個係正常副作用之一，所以你可以放鬆下心情。而實際上會遲／早到幾多都係無一個特定嘅標準，無話一定係2－3日之內，6日或以上亦都係常見嘅數字。而且如果你係家計會見醫生食藥嘅話，一般都有同你約定一個日子上去覆診驗孕，如果對自己驗孕嘅結果無信心，可以留待去覆診嘅時候再確認結果呀。
同埋就算冇服用過藥物，每次月經週期嘅長度和日期不同都係好正常嘅事。因為人體係好複雜嘅組織，月經係由好多系統相互影響而產生嘅生理現象。所以月經期好容易受到飲食、作息、壓力、情緒、藥物等等因素影響。加上你已經驗孕結果亦係無懷孕，暫時當需要咁擔心呀。