擔心懷孕 次次做完都驚

平時約28日一個cycle 都幾準 但上兩個月都早黎 宜家day 26
Day 13做過 全程戴套+外射 當日應該接近排卵期 因個一兩日有大量蛋清分泌
當時戴完見到套個膠環附近有一滴液體(透透地) 男友話應該係潤滑劑 其實有少少驚係pre-cum
亦因為個日係第一次用0.01套 做做下有幾下覺得好乾 所以特別驚
做完純觀察唔見個套有穿爛 當日同之後個日分泌變淺啡 應該係性交後出血?
之後幾日分泌亦都少左+變杰身
今日day 26 尋晚開始白帶多左 質地同量似平時m完比較透
但無平時黎m前嘅胸漲(上個月都無)
最令我驚係上星期開始胃脹氣同肚痾 腸胃蠕動好多(無肚痛 軟便越痾越少)
所以有少少擔心有左
不過最近兩星期比較夜訓 有幾日熬夜 精神壓力比較大(學業+擔心懷孕) 又飲過酒
加上早兩個月早黎 明白宜家可能過慮 同腸胃問題未必關事(男友都咁講)
所以為安心都想再問下1.懷孕機會係咪唔高?

其實唔係做過好多次 頻率亦好低 加上試過有念珠菌幾個月 因此唔想考慮避孕藥
但每次差唔多m到就會擔心到上網查 之後更加驚(我應該有疑病症 呢兩日搞到有少少心悸)
最後想問下2. 建議點樣可以再安心少少?

文都幾長 多謝定你地解答 :smiling_face_with_three_hearts:

補充一下 呢幾日下腹耐唔耐會抽一下 但無痛 唔知係腸胃定子宮
呢兩日白帶多左 有時候無感覺到有分泌 但底褲會濕濕地

Hello 唔使太擔心住,如果根據你所講,其實你懷孕嘅風險都比較低嘅。 :wink:

首先陰道分泌物嗰度,女性有陰道分泌係好正常嘅生理現象 :wink:。呢啲分泌物由陰道黏膜、子宮頸腺體同子宮內膜嘅分泌混合而成,有抗菌、保護同清潔陰道嘅作用。而分泌物嘅狀態會受好多因素影響,例如排卵期前後會呈現蛋白狀,經期前後可能質地會變黏稠、白色加深、量會增多;飲食、作息同藥物等亦有機會影響。每人每日、每個週期都會出現變化。而你所講呢兩日白帶增多可能就係因為即將月經。建議最好著棉質底褲同通風嘅褲/裙保持私密處清爽,做好日常清潔(但唔需要灌洗),同清潔好底褲,咁就可以避免陰道喺潮濕悶局嘅環境容易發炎(例如你所講嘅念珠菌感染) :relaxed:

如果你哋發生性行為全程都有正確使用安全套,並且事後確定安全套並無破損,咁意外懷孕嘅機會都比較低。你所講嘅安全套環附近嘅液體可能係潤滑劑或者陰道分泌物或者係兩者嘅混合物。但要注意嘅係,建議下次使用安全套嘅時候配合潤滑劑一齊用(你都有提及使用過程中覺得乾),避免因為安全套本身潤滑不足,摩擦導致安全套破裂或者陰道受損。你所講嘅啡色分泌物應該就係因為潤滑不足,插入式性行為時導致陰道輕微受傷 :persevere:。潤滑劑建議使用非油性嘅,因為油性潤滑劑會令乳膠安全套破損(雖然0.01安全套一般係由PU或者PI製造,唔會被油性物質侵蝕),亦會影響陰道嘅酸鹼值平衡,所以建議選用水性/矽性/水矽混合嘅潤滑劑。想了解多啲都可以參考返糖不甩嘅fb/ig post: :sunglasses:https://www.instagram.com/p/B5cf5Z9FCaS/

你所講嘅腸胃不適可能係因為睡眠不足、情緒壓力大、飲食同酒精等影響;月經前都可能出現輕微腹痛同腹瀉嘅情況;但如果長期係咁都會建議你去睇下醫生。

而安全措施方面,其實荷爾蒙避孕法(口服避孕藥、避孕針)都可以配合安全套使用,更加減低意外懷孕風險。都明白你之前受念珠菌感染困擾,唔敢考慮口服避孕藥。其實念珠菌本身就存在係我哋身體內,當陰道pH值有變化、天氣比較潮濕悶熱、抵抗力下降等嘅情況都會令體內嘅念珠菌容大量繁殖而造成發炎。你可能會係網上見到唔少人試過服用含高劑量雌激素嘅荷爾蒙藥物,令陰道環境改變,變得比較酸,更加適合念珠菌呢種真菌繁殖。但其實呢種狀態係服用抗生素,類固醇藥物,或者賀爾蒙水平有變動嘅時候都有機會出現,並唔係話食避孕藥就一定會誘發念珠菌感染。現時市面上有嘅荷爾蒙避孕藥牌子有好多,亦有好多係屬於低劑量嘅荷爾蒙藥物,並唔會增大念珠菌感染風險,有機會都適合你嘅情況架。因為荷爾蒙避孕法相比安全套會失敗嘅機率比較低,配合安全套同時使用的話亦可以將安全性大大提高。如果想考慮食藥/打針,可以係事前要諮詢醫生嘅專業意見,等醫生了解同評估完你嘅身體狀況後,再推薦適合你嘅方案。而如果都係唔會考慮荷爾蒙避孕法,其實都可以考慮子宮環,選擇物理性(銅質)嘅子宮環就可以係無額外荷爾蒙進入體內嘅情況下達到較高嘅避孕效果。不過同藥物一樣,不妨先諮詢醫生意見再決定呀! :gift_heart:

因為係一戴完見到 所以排除係陰道分泌物
戴之前有口交 所以擔心係pre-cum 但我suppose有口水混合 戴個時又隔左至少幾十秒 有精子機率都會相對地低?

Anyways thanks for the reply! 放心左少少 但當然仲等緊m到 :pleading_face:

其實精子嘅存活好容易受其他因素影響,例如你呢度所講嘅口水,會改變酸鹼值,而令精子難以生存。同埋精子暴露係空氣中都會幾分鐘後就死亡。所以有精子嘅風險都會比較低。下次再進行性行為嘅時候都可以用紙巾抹乾陰莖同雙手先戴安全套。 :wink:

下次再進行口交嘅時候都可以考慮使用口交膜/口交套/甚至抹走潤滑劑嘅安全套(不過記得口交完要更換新嘅安全套先進行陰道插入式性行為,避免口交造成安全套破損),可以避免體液接觸,減低性病/其他疾病嘅傳染風險呀~ :two_hearts:

好多謝你嘅詳細解答 :smiling_face_with_three_hearts: