月經完後一日不安全性行為會否懷孕

我10月11日完結月經,於10月12日進行了不安全性行為但外射的。我的月經多數在月頭或2x號有。我在網上見好多人都話月經完結後3日後才是安全期,我現在是月經後1日,會否懷孕?最快可以什麼時候驗孕最凖確?我現在很害怕會懷孕。

我也見有人說如果早了排卵我就好大機會中招,也有說精子只可存活3天,那是真的嗎?那如果這是真的話,那是否代表10月15日後才排卵就會安全無事?

外射同安全期計算屬於比較高風險嘅避孕措施,失敗率比較高,所以唔建議作為避孕方法。 :no_good_woman:t2:

因為陰莖性興奮嘅時候已經會流出透明嘅尿道球腺分泌液,當中有機會含有少量精子,雖然比直接在陰道內射精嘅數量少很多,但只要一粒精子就有機會導致懷孕。在性交過程期間,男性亦有機會在射精前出現「漏精」,導致少量精子與尿道球腺液混合。而精子進入陰道後,一般係可以存活2-3日嘅。精子係陰道內實際可以存活幾耐,或者係咪一定可以造成懷孕,都有好多其他因素會影響到,例如:當時陰道內嘅環境、性行為嘅體位、雙方當時嘅身體狀況、精子嘅活躍度。好多時呢啲事都唔係我哋嘅控制之內,我哋唯一可以做到嘅係盡量令風險降低,減低造成分泌物同身體直接接觸嘅機會。 :relaxed:

而所謂嘅「安全期」其實係要靠每次月經來潮後先能夠大概推算返上一次嘅『安全期』。安全期係建立係排卵同月經嘅週期日期,一般係指月經前7日同月經開始起計嘅7日(包含月經期間),所以你所講嘅//月經完結後3日後才是安全期//係唔正確嘅。但人體係由好多繁複嘅系統組成,所以月經、排卵呢啲生理現象都好容易受到影響而改變。照你所講,你嘅月經期並唔穩定,月經期同排卵期可能會重疊,咁即使係經期啱啱結束就發生性行為,仍然有懷孕嘅風險。所以更加唔建議用呢個方法避孕。除非你每日都會用排卵棒去測試,否則其實係好難知道今日身體係咪已經排卵,或者係咪處於「危險期」或「安全期」。

驗孕方面,通常性行為發生後7日已經可以得到初步結果,11日後或預計月經嘅日子就可以得到比較準確嘅結果。一定要依照驗孕棒說明書指示去使用,亦可以使用朝早起身後第一次嘅小便,因為此時尿液中hCG(孕激素)含量最高,會比較容易得到更準確嘅結果。

最後,如果未準備好面對懷孕,不如趁今次機會同伴侶就日後嘅安全措施安排溝通商量下,選擇合適你哋嘅安全措施。例如安全套或者事前避孕藥,減低意外懷孕嘅風險。而安全套則可以同時做到減低性病/其他疾病傳染嘅風險。 :wink:

我之後都係太不安心咁係第50個鐘度食左事後丸。

我上網睇左,事後丸係提供多啲的黃體素去干擾/抑壓/延遲排卵,但排卵期唔係會有黃體素大量排出嗎?咁唔係應該反而令我提早排卵咩?

同埋我今日用左排卵紙check左自己係咪排卵,點知係排卵期。。咁即係點。。係咪好大機會其實前幾日就已經排卵,其實已經受左精:pensive:

如果於性行為120小時內,服用醫生處方嘅事後丸,其實避孕嘅成功率係好高 :blush:,無需太擔心。

事後丸嘅原理係透過抑制排卵、增加子宮頸黏液濃稠度,從而阻止精子同卵子結合。並且透過改變子宮內受精卵著床的環境,令受精卵難以著床。受精卵著床,一般需要6-9日,即使性行為當日係有機會已經排卵,不過因為你於性行為後50小時(第3日)左右就已經服用左事後丸,受精卵一般都未會咁快著床,所以事後丸嘅「改變子宮內受精卵著床的環境」藥效都依然能夠發揮到作用,阻礙受精卵著床,從而令懷孕嘅機會大大減低 :wink:

而有關黃體素(progesterone)方面,本身身體自然分泌嘅黃體素嘅作用,係令子宮增厚,為受精卵著床成長提供一個合適嘅環境。黃體素係由卵子中嘅卵泡形成黃體,再而分泌出黃體素。所以正常嘅月經週期,並非透過黃體素影響排卵日子,而係卵子排出後先會增加分泌黃體素,令子宮增厚 :see_no_evil:。能夠影響我地排卵日子嘅荷爾蒙,係黃體刺激素( luteinizing hormone)及其他激素,黃體刺激素嘅功能係刺激卵巢釋放卵子。

而事後丸就透過額外補充的荷爾蒙(黃體素、雌激素),來誤導我地嘅大腦去分泌少D黃體刺激素及其他激素 ,從而做到抑制及延遲排卵嘅效果。所以事後丸內嘅額外黃體素,並唔會令你提早排卵啊~ :relaxed:

如果依然好擔心懷孕的話,都可以好似 @Ching_StickyRiceLove 提及過咁,

可以選擇性行為11日後驗孕,咁到時驗孕結果就已經係可靠同埋準確嘅 :relaxed: 又或者本身喺家計會攞事後丸的話,護士應該都有同你預約大概一個月後覆診,到時會同你驗孕一次,確認一下有無成功避孕。