不安全性行為後

你好啊,我本身係一個月經好規律嘅人,好似半年以嚟唔係早一日、同一日就係遲一日嚟,無遲過一個禮拜。

然後上個星期喺period最後一日嘅時候發生咗不安全性行為(外射),起初覺得應該都係安全期所以無擔心,但漸漸開始咗擔心,呢排仲要超大壓力,而且聽講壓力會影響排卵。所以我想知,其實喺咁樣嘅情況下,懷孕機率會唔會好高?

你好呀 @Shadowe :wave:t2: :wave:t2: :wave:t2:

如果你以往都好規律而又無特別短嘅話,都唔洗太擔心嘅,因為基本上都唔會係嚟月經嘅時候排卵嘅。 :grin:

壓力的確會令月經週期有改變嘅,特別係呢段時間你都好擔心會唔會懷孕,同埋都有可能因為生活習慣嘅改變,或者藥物嘅影響等等,其實都會令月經週期同埋月經嘅狀態有改變嘅。 :blush:

同埋其實體外射精並唔係一種有效嘅避孕措施嚟,因為男性勃起嘅陰莖係射精前都會分泌一啲透明嘅尿道球腺液,裡面都含有少量嘅精子,直接接觸陰道都有懷孕嘅風險嘅,所以建議你係對上一次發生性行為後7日買驗孕棒驗孕,會得到初步嘅結果,係11日後再驗就可以得到比較準確嘅結果。記住要跟返說明書上面嘅指示去做,同埋係指定嘅時間內睇結果呀。 :wink:

另外,如果真係無計劃懷孕嘅話,記住下次使用返避孕措施,例如安全套或者避孕藥,咁就唔洗咁擔心啦。 :laughing: