女仔幫男仔無套手交驚被傳染性病

唔好意思希望唔好介意我咁問:pray:t2:
想問男仔平時唔受性刺激嘅時候,佢地下體嘅表面係咪乾嘅?佢係性興奮時先會有可能流左啲分泌物出黎?
因為我擔心幫佢無套手交時,我手會有傷口、我掂到佢下體時會有體液交換…雖然佢當時下體望落去無性病疣同疱疹個類可以經皮膚接觸傳染嘅性病,但我驚我會感染到經體液接觸傳播嘅性病。
Thank you so much​:pray:t2::pray:t2:

Hello~ 當然唔會介意阿有任何與性或者戀愛關係嘅疑問都歡迎同我地傾下 :hugs: 的確男性喺受性剌激嘅時候會分泌一啲透明而黏黏地嘅液體,叫做尿道球腺液,不過性刺激並唔單止於性器官嘅接觸,其他方面例如視覺、聽覺、親密嘅身體接觸等嘅刺激都有機會令男性嘅陰莖流出分泌物。

至於有關無套手交後感染性病嘅風險,首先只有對方本身係性病患者先有機會傳播病菌/病毒,所以照你所講嘅情況,當時對方嘅下體無明顯嘅性病病徵或者潰瘍嘅情況,所以都唔洗太擔心住嘅 :blush: 另外,並唔係所有嘅性病都會經皮膚接觸傳播,常見會經皮膚接觸傳播嘅性病有梅毒、陰部疱疹、性病疣同陰蝨。依啲性病係有機會通過直接接觸患者嘅性器官而感染,而如果當時你嘅手有破損、明顯淌血嘅傷口嘅話,亦都有機會增加感染嘅風險,所以如果想加強預防性病感染嘅保障,建議手交或者口交嘅時候都使用返安全套,或者指套、口交膜同口交套。

至於你所講嘅情況,感染經體液接觸傳播嘅性病風險係比較低嘅,因為依類嘅性病通常係通過較薄而有淌血傷口嘅黏膜組織 (例如肛門、直腸、口腔、陰道、眼睛、鼻腔等) 接觸到患者嘅高風險體液 (例如精液、腸液、尿道球腺分液、陰道分泌、血液)而傳播嘅,而你當時只係用手接觸對方嘅性器官,並唔係以上所講嘅黏膜組織,所以感染嘅風險係相對低嘅 :blush:

建議你先進行性病測試,你可以到社會衛生科嘅女性服務診所進行檢驗,以下係診所嘅資料 https://www.dh.gov.hk/textonly/tc_chi/tele/tele_chc/tele_chc_shcf.html 不過因為疫情期間有部份嘅診所暫停開放,所以去之前記住留意診所嘅開放同登記時間,你亦都可以按經濟狀況到私家診所進行測試 :man_health_worker:t2: :woman_health_worker:t2:

多謝你既解答,係咪即係話男性平時正常情況下唔係去小便唔係性興奮既話,下體表面係乾、唔會有任何體液?

另外,其實我有尿道炎有d漏尿問題,我係女仔,我想請問如果我平時出街如果真係唔小心控制唔到漏左d尿係自己既內褲同最外面條褲到,當時坐緊係公眾地方既櫈上面,咁樣會唔會令我感染到櫈上面既性病菌/或者其他病菌而患病? 謝謝/_\ :point_right: :point_left: 我過幾日會去睇泌尿科醫生

另外想問下
(i)汗水會唔會傳播性病,例如我既傷口接觸到性病患者既汗水?
(ii)尿液會唔會傳播性病?

Hello~~

其實男性陰莖都係肌膚組織嚟嘅,會好似其他皮膚一樣,有機會分泌汗液同油脂,所以就唔會好乾燥嘅,但呢啲就都唔會令到陰莖表面有液體。而體液方面就會好似 @Ana_StickyRiceLove 所講,受到刺激嘅情況下會有尿道球腺液流出。而呢啲刺激有時未必一定同性相關,而純粹係因為神經反射呢啲生理現象。 :nerd_face:

關於性病方面,性病係由細菌、病毒或寄生蟲三種致病原所致。而傳播性病嘅主要因素有:血液、精液、陰道分泌等體液交換;有損傷嘅皮膚、眼睛、口腔和鼻腔等黏膜交換兩大類。即係包括:沒有使用安全套的陰道交,沒有使用安全套的肛交,共用針筒,血液輸送和母嬰感染呢啲直接方式;而沒有使用安全套的口交都有傳染性病嘅風險,雖然風險相對比較低;除此以外仲有一啲間接嘅途徑有機會傳播某啲性病(例如陰虱有可能因接觸唔衛生嘅床單/毛巾而感染;短時間内共用抹完完含有性別病菌體液嘅毛巾接觸到性器官/黏膜組織,即係間接令到有體液/黏膜組織交換)。有風險嘅因素雖然唔代表一定會感染到性病,但為咗安全都可以盡量避免,因此會建議性行為中使用安全措施,減低性病傳染風險。 :wink:

你所提及接觸汗水就一般唔會傳播性病,但如果皮膚接觸到某啲性病感染者皮膚上的組織(例如因梅毒而出現嘅潰瘍,疱疹等)都有一定感染風險。尿液都係同樣道理,正常情況下尿液唔會傳播,但如果某啲性病患者嘅尿液含有性病致病原(例如淋病,患者尿道口會排出白色膿液,因此尿液中亦可能含有淋病病菌),接觸到頭先提及嘅黏膜組織或者性器官,都會有一定嘅風險。 :confounded:

而你講有尿道炎困擾,因為會漏尿,其實都會想了解多啲有冇其他症狀令你有呢種諗法?因為常見尿道感染嘅症狀有:尿頻,次數頻密,但每次只能排出小量尿液;小便時感到赤痛、灼熱;尿液混濁,甚至帶血;小腹脹痛(近恥骨位置)。但你受到漏尿困擾,都會建議盡快睇醫生,尋求專業意見。 :two_hearts:

喺未睇醫生呢幾日都建議你著棉質底褲同鬆身通風嘅裙/褲,以免潮濕悶局嘅環境影響陰道嘅酸鹼平衡,容易引發陰道感染;或者令私處皮膚感到不適。日常清潔亦好重要,記得每次去廁所之後都用紙巾由前向後(由尿道口向肛門)抹乾淨;每日沖涼用清水溫和地清潔。每日補充足夠水份,唔好忍尿。你都可以帶定護墊(記得定時更換)/替換底褲,減少不便。因為有衣物隔著,理論上你唔會因為漏尿並接觸公共空間感染到性病,可以唔使太擔心。 :blush: