避孕藥後流啡

Hello,
我係10月12號第一次食yaz,果日係m 完後第4日
之後每日都有定時食,直到25號有性行為(安全),但係27號就開始流啡
小腹都有啲脹痛,好似就快嚟m咁

yaz就仲淨低7日先食白色藥丸,想問下如果真係呢兩日嚟m,仲應唔應該繼續食呢排,定係需要開新一排呢?

你好呀 @122333 :wave:t2: :wave:t2: :wave:t2:

同你講返先,避孕藥最理想係喺月經期間開始食,因為要確保無懷孕,同埋月經嘅時候開始食先最可以令你嘅月經變得規律,你係月經之後第四日先開始食,有打亂你原本月經週期嘅風險架,而月經週期就係有月經開始嘅第一日去到下一次月經嚟嘅第一日嘅日數。當你月經嚟嘅第一日,身體已經開始釋出一啲荷爾蒙,以你嘅情況,月經期間+月經之後嘅四日,其實都已經過咗你嘅月經週期大概四分一嘅時間,身體裡面已經有一定嘅荷爾蒙啦,擾亂月經週期嘅情況就更強架啦。 :relaxed:

其實流啡都係食避孕藥一個常見嘅副作用嚟,當你第一次用荷爾蒙避孕法嘅時候,都有出現流啡或者點狀出血呢啲情況嘅風險嘅,你暫時可以照跟著流程去食先。同埋啱啱開始食嘅時候,因為藥物都要時間係體內適應,所以月經週期都未必可以咁規律嘅,未必真係會係食緊白色藥丸嘅時間嚟月經嘅。 :wink:

另外,雖然事前避孕藥係香港嚟講都唔係處方嘅藥物,但係唔係全部人都啱食呢種避孕藥嘅,因為唔同人都有唔同嘅情況,而且有唔同嘅牌子同唔同嘅劑量,其實都建議見下醫生先嘅。如果你真係擔心依家呢個情況嘅話,都可以帶埋隻藥去返開藥俾你嘅醫生度查詢返嘅,又或者家計會同普通家庭醫生都可以架,睇下需唔需要轉藥或者有其他建議,但暫時嚟講都唔需要話停藥嘅,都可以繼續食嘅。 :grin:

咁想問下,假設真係未食曬成排,包括白色藥丸,就已經嚟m
係咪都應該keep 住食曬成排為止?之後再開新一排?
如果咁嘅情況,係咪食多一陣經期時間會正常返?

正如 @Kaleo_StickyRiceLove 所講,服用避孕藥初期出現流啡/點滴出血等輕微陰道出現情況,屬常見嘅避孕藥副作用,始終身體內嘅荷爾蒙都需要時間慢慢調整,令月經週期於初期嘅時候未必好規律 :blush: 暫時都可以繼續keep住食曬成排(包括白色非活性藥丸)先,然後再開新一排服用。一般亦唔會因為出現左月經,就突然中斷左服用緊嘅果排避孕藥,都係需要服用曬整排避孕藥(包括白色非活性藥丸),先再開新一排服用嘅 :wink:。食多一段時間,等身體適應左之後,月經週期一般都會慢慢變得穩定 :relaxed:

此外,想了解番你服用YAZ呢款避孕藥之前,有無到家計會/婦科診所諮詢過醫生嘅建議? :woman_health_worker:t2: :man_health_worker:t2: 因為每個牌子/款式嘅避孕藥內含有嘅荷爾蒙類型同埋劑量都會有唔同,有機會某部分避孕藥唔適合你嘅體質,係有機會引致嚴重嘅副作用。而且避孕藥亦並非每個人都適合服用,一般常見唔適合食藥嘅情況,例如有心血管疾病、不規律陰道出血、體重過高等。所以一般都會建議服用避孕藥之前,必須諮詢醫生嘅意見,等醫生評估你嘅體質/生活習慣,係咪適合服用避孕藥,或者適合服用邊一個牌子/款式嘅避孕藥。

所以,如果服用YAZ/其他避孕藥之前,未諮詢過醫生意見的話,其實都會建議搵醫生諮詢一下先,咁樣之後繼續服用都會比較放心 :relaxed: :wink: 而睇醫生嘅時候,都可以同醫生講你宜家服用緊YAZ避孕藥,睇睇醫生覺得係咪適合繼續服用,或者有其他牌子/款式嘅避孕藥比較適合你 :blush: