帶套射完先發現戴反咗安全套

噚晚同女朋友做,我自己戴安全套,戴嗰陣無為意戴反咗,就插入去佢陰道入面,射完之後拎返出嚟,除個套先發現戴反咗,雖則個套無穿無爛,但我好驚佢會中,點算好?

Hello~ 首先如果安全套戴反咗嘅話係套唔到落陰莖根部嘅,所以陰莖嘅分泌物都有機會漏咗出安全套外,所以都有懷孕嘅機會,你地可以考慮去見醫生拎取緊急避孕藥,緊急避孕藥主要分為兩種,分別係要喺性行為嘅72小時/120小時內服食,如果過左依個服食時限就無效,所以如果決定採用依個措施就建議盡快去見醫生拎取藥物,因為緊急避孕藥喺香港係法律規定必須經醫生處方嘅藥物,而且亦都唔係每個人嘅體質都適合服用,所以係必須向醫生持取嘅。你地可以到家計會、母嬰健康院或者私家診所拎取緊急避孕藥,不過要留意家計會嘅診所係必須預約嘅,有關緊急避孕藥嘅詳細資料可以參閱以下網址:https://www.famplan.org.hk/zh/health-info/contraceptive-methods/emergency-contraception

另外,你地亦都可以選擇喺性行為嘅11日後進行驗孕,因為驗孕棒係透過檢測尿液中嘅人類絨毛膜性腺激素 (hCG) 水平去測試有無懷孕嘅,依啲激素會喺受精卵著床後釋出,而受精卵著床大概需要11日,所以喺性行為嘅11日後驗孕嘅結果係好準確嘅,你地可以買兩個牌子嘅驗孕棒,按照說明書嘅指示進行驗孕,如果兩個嘅結果都係陰性就應該係無懷孕啦 :blush:

至於正確配戴安全套方面,可以透過觀察安全套膠圈嘅位置去分辨正反,如果膠圈喺外面就係正面,而如果喺入面就係反面,如果發現係反面嘅話,可以輕輕吹一口氣令膠圈喺返安全套嘅外面,留意如果套左落陰莖之後發現戴反咗嘅話, 就要換過一個新嘅安全套,因為安全套有機會已經接觸到陰莖嘅分泌物,如果再反返轉黎用就有機會將分泌物帶入陰道。可能就咁睇文字會有啲難理解分辨安全套正反嘅方法,所以你地可以參閱糖不甩網站上有關正確配戴安全套嘅文章 https://www.stickyricelove.com/post/__安全套
,入面有圖解同Facebook影片試範 :relaxed: