你好呀。我食到第四個月，今晚準備食埋最後一粒。但今日晏晝嚟咗m。我呢三個月嘅經期都好準，停藥第三日就會嚟m。想問提早來是正常的嗎？suppose食咗藥唔係會好準時㗎咩？
Hello 
根據你所講，你應該係食緊21粒裝嘅避孕藥？首先都想了解返你第一次服用之前有冇諮詢過醫生嘅專業意見？因為市面上有好多唔同嘅避孕藥，所以建議在初次服用之前要諮詢醫生，選擇最適合你嘅劑量和款式。同埋要依照指示服用，月經第一日開始，每日一粒，最好定時服用。 
一般嚟講，當正確服用避孕藥一段時間（大概3－6個月，實際數字因人而異）之後，經期日子就會變得比較穩定。如果係21粒裝嘅避孕藥，通常會喺食完第21粒後，就差不多會來經。明白你之前幾個月都好似好穩定，今次第4個月突然有變化會好擔心。除咗可能因為身體仲適應緊藥物而造成提早月經，亦有機會係由其他影響荷爾蒙嘅因素導致嘅變化，例如情緒、壓力、生病、生活習慣有改變等等，但總括而言都唔需要太擔心。雖然你而家已經月經來潮，但都記住要照常食埋最後一粒藥。如果月經唔穩定或者不正常出血連續幾個月出現，咁就建議你睇返醫生，可能隻藥唔適合你，要轉食其他牌子嘅藥。同時都可以留意下生活習慣有無咩改變，又或者有無其他異常嘅情況出現呀。 
係呀，我係食21粒的。我食前有去過家計會睇醫生，啲藥都係喺佢地到配的。但我發現啲m量好小，唔似平時嚟m嘅量。我無漏食過，最多遲3個鐘食。同男朋友都有regular嘅性行為，因為有食藥就無帶套，但無內射的。因為平時嚟m都算準，加上食埋藥唔係應該更加準咩？會唔會係有懷孕嘅機會？
同埋我會有小小m痛，我諗如果坊間講嘅假月經應該唔會m痛？
想講我遲食3個鐘嗰日係第三週，我食緊美意避，睇返佢地網站佢地話只要喺12小時內補食就得。同埋我遲食三個鐘應該無太大影響？我見網站仲有話唔準時食藥可能會有點滴出血。我號情侶會唔會係咁？
我嘅情況*
服用避孕藥後所謂嘅假月經其實係叫做徹退性出血，講緊嘅係以持續服用人造荷爾蒙，取代自然週期，欺騙身體「已經排卵，已經令子宮內膜增厚」，到停藥期嘅時候，荷爾蒙水平下跌，就會刺激子宮內膜出血。所以徹退性出血嘅量係會相對少嘅，但都依然有機會有輕微經痛嘅情況，所以你月經嘅情況係正常嘅
至於遲服藥方面，如果係喺補食時限內服藥，基本上係唔會影響藥效嘅，而且身體亦都會隨住持續服藥嘅時間增加而更適應藥效，所以你所講早左黎經嘅情況應該同嗰次遲服藥無關係，主要係好似 @Ching_StickyRiceLove 咁講有機會係因為一啲影響月經嘅因素或者身體適應緊藥效，如果真係好擔心嘅話都建議去睇醫生了解返身體狀況 
而懷孕嘅機會方面，喺無漏服避孕藥嘅情況下，懷孕嘅機會係好低嘅，因為避孕藥嘅人造荷爾蒙可以抑制卵巢排卵，亦都可以令子宮內膜產生變化，使受精卵無法著床，同埋增加子宮頸分泌物嘅黏稠度，使精子難於穿過黏液，進入子宮腔內。根據研究資料，婦女喺第一年使用這種避孕方法後嘅意外懷孕機會係 0.3－9% (https://www.famplan.org.hk/zh/health-info)，而藥效亦都會隨住身體適應而發揮得更好
唔該你呀！
最後想問如果我打算呢次月經後，暫停唔再食事前藥的話，會唔會有啲咩後續影響？
其實停藥後都唔會有咩後續影響嘅，需要注意返嘅係，只要你停咗藥嘅話，係無做其他安全措施嘅情況底下，你懷孕嘅風險會大大提高，萬一真係無計劃懷孕嘅話，都係建議你用返其他避孕嘅方法，例如安全套等等。
我見你上面都有講食完避孕藥之後月經嘅情形有改變，我建議你都係去搵返家計會嘅醫生，同佢講你依家嘅情況，佢地都好好架，如果你係佢果度配藥，佢地會跟進架，而且醫生會根據你身體情況幫你調整食藥嘅份量或者建議你轉藥。 
當然，究竟繼唔繼續食藥都係要同伴侶溝通下，亦都可以將你嘅擔憂同不安同佢分享，伴侶一向都係互相支撐，係呢個動盪不安嘅世界裡面一齊前行架嘛，係咪？