被口中含水無套口交，而有套性交後，馬些有龜頭炎但用藥有好轉，之後卻又變成尿道口紅腫，後看街佢症有給抗生素吃和塗。
1）請問34天後陰莖龜頭也沒有出現明顯紅疹和硬下疳，中梅毒和皰疹的機會是不是比較低？因看到網上有說梅毒潛伏期是2-4星期，是不是過了4星期不出現說沒事了？因現在右邊股腹溝旁感覺酸軟1個多星期，但沒有摸到明顯腫塊，不知是不是因為龜頭炎而這樣。
2）而過19天時去了社衛科抽血，他們的抽血驗梅毒空窗期是多久？因下星期才要回去一覆診。
3）市面的梅毒快速測試紙的空窗期又是多少？
4）因太過擔心還是應該現在34天了就直接去抽血驗「梅毒血清及螺旋菌抗體測試」&「愛滋病病毒 p24抗原和抗體組合檢測」比較準？
問題有點多，謝謝你的耐心回答！
Hello @swretbbq 
等我一一回覆你嘅問題啦 
1） 梅毒及皰疹，兩種性病都有部分人於感染後無出現病徵，所以都唔能夠話過左潛伏期之後無出現病徵就等於並無受到感染。擔心感染的的話，都建議空窗期（梅毒：最長6星期；陰部皰疹IgM抗體：7-10天，感染病毒2星期後，抗體數量會開始下降；陰部皰疹IgG抗體：4-6星期）後做一次性病測試會比較放心 
。如果股腹溝部分都依然有出現不適嘅感覺，都建議去睇番之前睇開嘅醫生，了解一下感到不適嘅原因。因為部分男士下體出現發炎（例如前列腺炎、睪丸炎等）徵狀時，都有機會令股腹溝部分出現疼痛嘅感覺。
2）梅毒嘅空窗期，最長為6星期。以我地所知，社會衛生科應該抽血的話，暫時主要係進行梅毒抗體快速測試，所以空窗期約45日。不過，因為現時疫情下，社會衛生科嘅測試樣本都會直接送去化驗所做檢測，所以都有機會已經幫你做埋TP及VDRL測試，但係都係有4星期空窗期嘅。所以性行為19日後所做嘅抽血測試，好大機會因為未過空窗期而呈陰性結果，建議覆診嘅時候再諮詢一下醫生係咪需要再覆驗一次，或者做其他更詳細嘅檢查 。
或者你記唔記得你去社會衛生科嘅時候，醫生有無同你提及有關「空窗期」嘅資訊？ 
因為如果你係未夠所檢測性病嘅空窗期的話，醫生應該會有同你提及過，當時所做嘅測試因為未過空窗期，有機會覆診嘅時候再覆檢一次。
3）市面上嘅梅毒快速測試試紙，一般為梅毒抗體快速測試，空窗期約6星期／45天。
4）無錯，現在係35天（昨日為34天），如果宜家好擔心的話，其實已經可以去直接去抽血驗「梅毒螺旋菌（TP）抗體測試」（能有效檢測4星期或之前的梅毒感染）、「梅毒血清抗體測試（VDRL）」（用黎確認梅毒感染），及「愛滋病病毒 p24抗原和抗體組合檢測」（能有效檢測21日之前的愛滋病病毒感染） 。
無論你之後係於社會衛生科做測試，還是去私家診所／化驗所做測試都好，都鼓勵你問醫生多D問題，了解自己嘅情況同埋測試方面嘅資訊。始終有時醫生有責任同你解釋清楚有關性病、空窗期、測試嘅資訊，不過都有機會醫生一時唔記得講。所以有時問多一問醫生有關嘅情況，例如問問醫生用緊邊一套測試工具、呢套測試工具嘅空窗期係幾耐、幾時做測試嘅結果會係最準確等，都可以保障多D自己，同埋掌握自己嘅狀況。
每一套測試工具／生產商製作方式，都會影響實際空窗期嘅長度，所以我地都唔能夠好仔細咁回答到你需要幾多日先有準確嘅測試結果 
，惟有問醫生先能夠準確咁答到你。 醫生亦可能會就住你之前嘅情況（例如出現過咩病徵），尤其係你之前曾經出現過龜頭炎，有服用過藥物，都有機會令醫生在測試上都有其他嘅評估／判斷。所以如果你之後再去做其他測試時，都記得要同番醫生講你曾經有龜頭炎，同埋服用過咩藥物（最好帶埋粒藥過去～），都會方便醫生去評估及判斷你嘅狀況 
首先謝謝你的耐心和詳細回覆！
1）日期是10月4號無套口交（不認識的人），10月22日去了社衛科抽血，醫生只是說驗HIV同梅毒，但好似沒說會不會驗埋疱疹，11月12覆診時，醫生說血報告沒事，但我知道有空窗期，之後叫我1月時才再回去抽血，他像有點不想回答我就不敢多問了。。。
2）打算到11月尾去私人化驗抽血：「HIV Combo」 & 「梅毒血清測試+螺旋菌抗體測試」 & 但不知道需不需要驗皰疹「皰疹病毒2型抗體測試 ELISA 」
3）因為由5號開始龜頭炎到慢慢好了，卻變成尿道口紅腫，到依家尿道口開始好了一點，但又開始有點包皮炎，同時我本身有很多福代斯斑點在不同位置，當現在包皮炎時剛好會在福代斯斑點上紅腫，所以每次會看到福代斯斑點有點紅腫變大，加上會有刺痛感時，常嚇到以為是疱疹，提心吊擔觀察幾天不是水泡才放心。
另外尿道口紅腫時有看醫生，沒種菌，醫生給了Neomycin cream 塗，因皮脂問題同時給了抗生素，不知道是不是包皮較長，而自身反覆傳染不同位置。。。不知道多久才可以好，很困擾。。。
再次感謝你們的耐心和詳細回覆！因為真的不多這一些平台可以發問而又有這樣用心的回覆！！！
唔洗客氣 
希望我地嘅回覆能夠對你有幫助啦。
如果醫生叫你1月時再回去抽血，咁可能都係覺得可以一次過等夠90日／三個月空窗期，到時做嘅性病檢查結果就會比較準確
無套口交的確係有機會透過親密接觸，而傳染到單純皰疹病毒（HSV），陰部皰疹較常見嘅就會係由HSV-2所引起。有無需要驗「皰疹病毒2型抗體測試 ELISA」方面，都可以考慮到時到左私人診所／化驗所嘅時候，再諮詢醫生意見，睇睇醫生係咪覺得你嘅情況都真係有需要做。而呢個測試係測IgG抗體，所以最佳嘅測試時間係當有水泡，或者在喺有風險嘅性接觸後4個星期，11月尾去抽血化驗時，應該都已經過左IgG抗體嘅空窗期，所以有需要的話選擇去做埋都係無問題嘅。
龜頭炎／皮脂問題方面，的確係有機會因為包皮過長，而令包皮位置比較容易生細菌／病菌容易匿藏，或者令包皮於清潔嘅時候難以翻開清洗隱藏的皮脂污垢，令發炎情況持續，難以復原 
。覆診嘅時候，可以問問醫生，係咪真係有包皮過長嘅問題，睇下咩方法可以處理，甚至有無需要考慮進行割包皮。
龜頭炎及包皮炎等，主要係由個人衛生，以及陰莖頭皮膚受到刺激所引起。所以都可以留意一下平日沖涼嘅時候有無好好翻開包皮清潔、沖完涼印乾下體範圍嘅水先再著番內褲、內褲唔能夠太緊及需要保持下體乾燥通爽。平日亦無需用沐浴乳清潔陰莖，有機會因為沐浴乳成分對龜頭皮膚過分刺激，用清水清洗就可以了 。亦記得好好依醫生嘅指示，依時搽好藥膏。
如果對於反覆發炎嘅情況感到困擾，都可以有需要覆診嘅時候，再問問醫生有無咩方面需要做得更好，避免再復發啊 。