避孕藥月經問題

我在上個月(十月十二日)首次服食敏高樂28粒裝的避孕藥,昨天已吃完了最後一粒非藥性成分的藥丸,平時經期大約33-39天,而今個月仍未有月經,所以我想問

  1. 月經應何會來?
  2. 因為打算轉服食yaz,在這段期間我應該繼續進食避孕藥嗎?

Hello :relaxed:
首先想問返你服用呢個牌子嘅避孕藥同埋轉食其他牌子之前有冇諮詢過醫生嘅專業意見㗎? :face_with_monocle:
因為雖然喺出面好容易買到唔同牌子嘅避孕藥,但每一款藥嘅荷爾蒙劑量同藥物成份都可能有啲唔同。所以建議喺食之前要等醫生了解完你嘅身體狀況,搵到最啱你嘅一款。同埋醫生會同你講埋注意事項,例如:應該喺月經週期邊日開始服用會開始有避孕效果、有啲咩常見副作用等。而家家計會診所或者某啲私家診所都可以有呢啲服務嘅。 :nerd_face:

避孕藥係通過人造荷爾蒙去抑制卵巢排卵、令到子宮內膜發生變化、增加子宮頸分泌物粘稠度,從而達致避孕效果。
所以初時服用,身體需要一段時間去適應藥物(時間3-6個月不等,因人而異),所以可能令到月經週期發生變化,頭幾個月亦未必一定係非藥性藥丸嘅期間就會嚟月經。而且除咗藥物之外,月經仲會受好多其他因素影響,例如:壓力、作息時間改變、飲食等等。但即使月經未嚟,都係要繼續如常服用下一排藥物先可以維持避孕功效。

建議你喺未睇醫生前唔好自行決定轉藥。如果你暫停服用而又會發生陰道插入式性行為嘅話,記得用返安全套做安全措施呀! :wink: